Keriekitho 32

1Jakob-e puo cha nu vozhü tse Ukepenuopfü dieliemia kro puo ze kese; 2mu Jakob-e uko ngu tse sie uko ki, “Hauha Ukepenuopfü razhüchü zo,” sidi puo thechü süki za üse Mahanaim#32:2 Hanu keseu ca ro Razhüchü Kenie. chüwa.

Jakob-e Esau Nei Chütuoü Mha Ketsekeshü

3Siro Jakob-e puo mhodzü dieliemia ketsepie Edommia rüna Seir kijü nu ketuo puo dzürieu Esau ki shü. 4Mu uko tarho di, “Nieko a niepuu Esau ki hamhie di pushücie: N kituo Jakob-e puyawe, ‘A solhimia chü di Laban ze tsie ketso lhou vorwate, 5mu a thudo, gadako tsiu tekuokroko; siro kediemia mu kediemiapfü rei nyite; a bu n neipfülie thienyü idi a niepuu ki dielie ketseshüzhüwe.’ ”

6Sitse dielieko Jakob ki la vor di die pucü, “Hieko n dzürieu Esau ki vowate, mu puo mia krie dia ze di n ze kesetuoü vorzhie.” 7Sitse Jakob-e michie mu puo nou kemezhie phita; sidi puo puo ze ketuoko, siro tekuokroko, mithu kroko mu utko kezapie kro kenie chülie; 8puo lekecü, “Mhanuü Esau vor di kro kerieu pekawa ro, kro kekreiu bu talietuo, idi.”

9Sidi Jakob sie, “He-i, a puo Abraham Kepenuopfü mu a puo Isak Kepenuopfü, he-i Jihova, no a ki hamhie di pukeshü, ‘N ra mu n seyieko ki la votalie, siro a n gei mha kevi chüshütuo, ishüe,’ 10a we n kekhrie mu n kedietho peteko no se n kituo kecütho-u pekiekeshü ngulie sü molie, a the rübei se di Jordan hau cie voketa ze ru, tsie we a kro kenie parliete. 11A n ki chaya, a dzürieu dzie nunu, Esau dzie nunu a kelashücie, a puo preiketa la, puo vor di a mu uzuopfüko tsiu unuonuoko pete dukhriwa rei silie lhomu. 12Sirei noe pucü, ‘N gei mha kevi chüshü zotuo, sidi n nuosenuoyie chüpie dzükezha nu huocanyo phrü hulie kelhoko tuoishütuo,’ size.”

13Sidi puo süzhü süki bata, siro puo se ketuoko nunu keneishie pie puo dzürieu Esau tsüketuo puo dojülie, 14mvükrü krie kenie mu mvüdo mepfü, tekuokrü krie kenie mu tekuochü mepfü, 15u nudzü khashükezha ut ser mu süko nuonuoko sa, thukrü hiedia mu thudo ker, gadakrü mepfü mu puochü ker. 16Sidi puo süko khapie puo kituoko dzie nu shüshü, puo thuo puo kro-u bu kreikrei di; mu puo kituoko ki, “A mhodzü vozhülie, mu khunuo kroko bu kepecie sei tuolie.” 17Sidi puo kerietho-u ki, “A dzürieu Esau n ze keselie mu n ketso di, ‘No kiramia ga? Kirapuo votuo üzhü ga? mu n mhodzü ketuoko supuo vie ga?’ iro 18no hai di pucie, ‘Hako n kituou Jakob vielie; hako pie a niepuu Esau tsütuo üdi ketseshüzhülie; sizomonyü puo rei hieko sie tuowe’ sishülie.” 19Puoe sükemhie di kro kenieu mu kro seu tsiu puo siemedziketuo kro pete ki, “Nieko pete rei Esau ze kesecü ki sükemhie pu phreliecie. 20Siro, niekoe sie, ‘Sizomoü n kituou Jakob hie sie tuowe,’ si phreliecie.” Puoe lecü, “Mha pie puo ketsüko a mhodzü voketako bu puo nei chülietuo süsienu a puo zie ngutuo; puo rei a zelietuo nhiemu” iya. 21Süla mha khakeshüko puo mhodzü vota, mu puo zo we süzhü thechü sünu bata.

Jakob-e Ukepenuopfü Ze Kenekecü

22Siro puo süzhü sielie di puo kimianie, puo kituopfünie mu puo nuonuo mia kerepuokrüko zelie di Jabok rüu cie vota. 23Puo uko ketsepie rücüu ciewa mu puo ze ketuo khe sümhie di ketse phreshüwa. 24Sidi Jakob puo rübei bata; süki mia puo puo ze kene ba teisotie tso. 25Siro themiaue Jakob penyülie lhoketa ngu tse, puo leikhei puo kere nu bieshü; sitse Jakob puo ze kene keba nu puo leikhei rülata. 26Sitse themiau sie, “A bu tuotacie, teisotazhiemu.” Derei Jakob sie, “No jashü a tsü kemosie a n bu tuolie lho.” 27Siru puoe puo ki, “N za supuo ga?” Puoe sie, “Jakob.” 28Süki puo sie, “N za üse Jakob üdi kie salie lhote, derei Israel#32:28 Puoca Ukepenuopfü ze keperhie moro Ukepenuopfü perhie. ituo; noe Kepenuopfü tsiu themia ze kebie di kuolieketa la.” 29Süsie Jakob-e sie, “N pezie rei n za se a ki pucie.” Derei puo sie, “Kedipuo la üdi no a za ketso ga?” Sidi puo sükinu jashü puo tsü. 30Süla Jakob-e thechü süki za thopie Peniel#32:30 Puoca Ukepenuopfü zie. chüwa, di pucü, “A mhotsou Ukepenuopfü nguwate, sizorei a kerheiro kelashüte.” 31Siro puo Penuel cie vokezhü ki niakithu puo vata mu puo do rüyho tuota. 32Süla Israelmia thie ketso rei khunuo leikhei gei puozhüdau cüya mo zo; kekreilamonyü puoe Jakob dokhrü nu puo leikhei zhüdau biekeshü la.

Currently Selected:

Keriekitho 32: ANBRBSI

Highlight

Copy