Popular Bible Verses from Keriekitho 32

Share

Süki puo sie, “N za üse Jakob üdi kie salie lhote, derei Israel ituo; noe Kepenuopfü tsiu themia ze kebie di kuolieketa la.”

Sitse themiau sie, “A bu tuotacie, teisotazhiemu.” Derei Jakob sie, “No jashü a tsü kemosie a n bu tuolie lho.”

Sidi Jakob puo rübei bata; süki mia puo puo ze kene ba teisotie tso.

Süla Jakob-e thechü süki za thopie Peniel chüwa, di pucü, “A mhotsou Ukepenuopfü nguwate, sizorei a kerheiro kelashüte.”

Siro themiaue Jakob penyülie lhoketa ngu tse, puo leikhei puo kere nu bieshü; sitse Jakob puo ze kene keba nu puo leikhei rülata.

Siru puoe puo ki, “N za supuo ga?” Puoe sie, “Jakob.”

Süsie Jakob-e sie, “N pezie rei n za se a ki pucie.” Derei puo sie, “Kedipuo la üdi no a za ketso ga?” Sidi puo sükinu jashü puo tsü.

a we n kekhrie mu n kedietho peteko no se n kituo kecütho-u pekiekeshü ngulie sü molie, a the rübei se di Jordan hau cie voketa ze ru, tsie we a kro kenie parliete.

Süla Israelmia thie ketso rei khunuo leikhei gei puozhüdau cüya mo zo; kekreilamonyü puoe Jakob dokhrü nu puo leikhei zhüdau biekeshü la.

Sidi Jakob sie, “He-i, a puo Abraham Kepenuopfü mu a puo Isak Kepenuopfü, he-i Jihova, no a ki hamhie di pukeshü, ‘N ra mu n seyieko ki la votalie, siro a n gei mha kevi chüshütuo, ishüe,’

A n ki chaya, a dzürieu dzie nunu, Esau dzie nunu a kelashücie, a puo preiketa la, puo vor di a mu uzuopfüko tsiu unuonuoko pete dukhriwa rei silie lhomu.