Keriekitho 34

Dina Perhukewa

1Siro Leah-e penuopie Jakob ketsü nuopfü Dina sü kijü süu nu thenuko ze kesetuoü pra. 2Sitse Hivmia Hamor, thechü sünu kediu nuou Shekem sü puo ngukeshü ki, puo telie di puo kemvü chü puo ze zhüwa. Sidi puo perhuwa. 3Siro puo noue Jakob nuopfü Dina kitsa tuota; puo rüüpfü khrie mu menuo di süpfü rüchü. 4Sidi Shekem puo puo Hamor ki “Rüüpfü liepie a kimia chüshücie.” 5Siro puoe puo nuopfü perhuwata ücü Jakob-e si bata; derei puo nuonuo thepfuko lie nu periko ze tuo zo, süla uko vor kemochie Jakob-e kemekrie ba zo. 6Sitse Shekem-nuo puo Hamor-e Jakob rüchütuo üdi par. 7Sütei touki Jakob nuonuoko lie nunu vor, sidi uko thedzeu sishü tse, themiako u nou kekrü mu u nou meyie phita, kekreilamonyü puoe Jakob nuopfü ze zhükewa ha Israel nu kenya mhatho puo chüwata zo, sicü chü zhü mo zocü la.

8Derei Hamor uko ki pu di sie, “A nuo Shekem noue n nuopfü mengu bate; puo bu puo ki nyitanu di, a n ki a mezhiemeloya. 9Sidi hie ze kese kerilie; nie nuopfüko pie hie tsü mu hie nuopfüko rei lieliecie. 10Siro nie bu hie ze lhou balietuo; mu kijü kha nie tsütuo; süra lhou mu thelhi chülie, tsiu sünunu n vie n ya balie,” ita. 11Shekem rei thenupfü-nuo puo mu puo prünuoko üse, “A bu nieko mhiki nieko neipfülie üthienyü, mu nieko a ki mhakehoupuo cha rei se nie tsütuo. 12Mha cha kenyü de chaliecie, siro a nie kepu de khashütuo; derei rüüpfü pie a ki penyiu penyishü zocie.”

13Siro Jakob nuoko Shekem mu puo puo Hamor se kedowa, kekreilamonyü puoe uko üpfü Dina perhukewa la. 14Sidi uko sie unie ki, “Hie mha hau chülie kenjü, hie üpfü khapie zhürekemomia tsülie kenjü, süue hie la thenga mhatho puota zo. 15Mha hau nu rübei nieko ze kediekholie kevi zo; nieko rei hieko mhie di thepfumia pete zhürelie üro. 16Süsie nu hie nuopfüko kha nie tsü mu hie rei nie nuopfüko lielie, di hie nie ze lhou tsiu úko keze themia puo chülietuo. 17Derei nieko zhükere nu hie pfhekholie kemosie, hie nuopfü zelie di tuotatuo.” 18Sitse Hamor mu Hamor nuou Shekem unie uko dieu unie medolie. 19Sidi khriesau sü mha süu chüketuo kethe mo zo, puoe Jakob nuopfü ngu puo nei zocü la, mu puoe puo kikru nu kekrei pete ki rei therhupfükuo. 20Siro Hamor mu puo nuou Shekem unie uko nadiu kharu nu vor, di nadiu nu themiako ki pu di, 21“Themia hako u khriethomia zo, süla uko bu u kijü nu lhou di sünunu thelhi chüliecie, mu harie, kijü meyapie uko kelhuo rei chülie vi zhü zo; úko uko nuopfüko lielie, mu úko rei u nuopfüko pie uko ki penyishülie. 22Siro themiako u ze lhou balieketuoe we hauha chükelie geinu zotuoü ba, keze puo chüketuo la ukoe u zhürekepfü tuoi, u donu rei thepfumiako pete u zhüre morosuo. 23Süze uko kiri, uko nyako mu uko khunuoko u vie chüta motuo me? Uko ze kediekho-u kediekholie khe, siro uko u ze balietuo.” 24Sitse nadiu nu kharuki kepar pete Hamor mu puo nuou Shekem unie die zelie; sidi thepfumia khe u zhürelie, nadiu kharu nu kepar pete.

Dina Prünuoko Uko Üpfü Khepukelie

25Siro zha se nhie, thepfumiako u zhükere la u gei chü keba ki, Jakob nuo kenie, Simeon mu Levi, Dina prünie, zhiecha unie tse selie di mia le mo keba nu, nadiu nu vor thepfumia pete dukhriwa. 26Siro unie zhiecha pie Hamor mu puo nuou Shekem dukhriwa, sidi Shekem kinu Dina ze parlie di tuota. 27Siro Jakob nuo kekreikoe dukhrikewako kinu vor di nadiu pekawa, sükoe uko üpfü perhukewa la. 28Ukoe süko kuo kroko, u thukroko mu u gadako, nadiu nu kebako mu terha ketuo pete lielieta. 29Uko kinyi pete, u nuonuo pete tsiu uko nupfünuo pete telie mu kinu keba pete valie. 30Sitse Jakob-e Simeon mu Levi unie ki, “Nnie kemezhiekecü se a gei vorshüte, Kanan kijü nu kelhouko tsiu Perizko bu a mecülie kevi chüshüte; a we themia tsa, mu mhanuü mia kepekrolie di a ngumvü sier ro, a dukhriwatie, sidi a mu a kikruu pekawatie.” 31Derei unie sie, “Mia bu hienie üpfü üse thethenumia puo mhie zotuo me?”

Currently Selected:

Keriekitho 34: ANBRBSI

Highlight

Copy