Keriekitho 35

Jakob Bethel nu La Kevor

1Ukepenuopfüe Jakob ki, “Sielie, Bethel nu volie, di sünu lhoutalie, sidi sünunu ruosuoba puo chüpie, no n dzürieu Esau kinu ta kevor ki n pengukeshüu Kepenuopfü tsüliecie.” 2Süla Jakob sie puo kinuko mu puo ze ketuo kheko üse, “Nieko donu seyie kekreimia rhuoko kha phrewalie, nie chü kemesalie mu nie pfheneiko kedilie; 3sidi úko sielie di tuo Bethel nu kho khe, siro a sünunu ruosuoba puo chüpie a kemezhiekelie ki a pfhekhokeshüu, mu a kevo cha pete nu a ze ketuou Ukepenuopfü tsüshütuo.” 4Süla uko seyie kekreimia rhuo u dzie nu ketuoko, mu menyie uko nyie nu ketuoko khapie Jakob tsüwa, sitse Jakob-e süko pie Shekem khieki phriebo-u khro nu keviewa.

5Siro uko rüvecha nu, Ukepenuopfüe uko khieümhou keba nadiko bu uko preiketuo puo chüshüwa. Uko bu Jakob nuonuoko whuo molie. 6Sidi Jakob-e Kanan kijü nu keba Luz (süu Bethel) nu vorlie, puo mu puo ze ketuo pete. 7Sidi puo sünunu ruosuoba puo chüshü di thechüu za pie El-bethel#35:7 Süu Bethel Kepenuopfü. chülie. Kekreilamonyü puoe puo dzürieu kinu tatakezhü ki Kepenuopfüe puo pengukeshü la. 8Siro Rebeka kituopfü Debora siata, sidi Bethel khro ki phriebo-u khro nu puo khru; mu thechü süu za pie Alon-bakut#35:8 Süu Kekra Phriebo. chüta.

9Ukepenuopfüe Jakob Padan-aram nu vorkelie ki puo pengu lashü, puo sidi japie puo tsü. 10Siro Ukepenuopfü sie puo ki, “N zae Jakob zo; derei n za pie Jakob üdi kie salie lhote, n za bu Israel chütatuo.” Süla puo za Israel üdi kieta. 11Süsie Ukepenuopfü puo üse, “Ae Kuokejokejü Kepenuopfü#35:11 Ibri El Shaddai. we: kruolie mu kra miemieliecie, n geinu seyie puo tsiu seyie kekra siertuo, mu n geinu kediko siertuo. 12A kijü khapie Abraham mu Isak ketsüu pie n tsütuo, mu kijü süusü pie n sie n nuosenuoyieko tsütuo.” 13Süsie Ukepenuopfü kinu puo rüchü kethachüu nunu tuo khota. 14Mu Jakob-e thechü süu nu tsiese puo seshüwa, di kekrie ruosuo rupie sügei shü mu tier lashü. 15Süla Jakob-e Ukepenuopfü puo rüchükecü thechü süu üse Bethel idi kieta.

Benjamin Kepenuo mu Rachel Se

16Süsie uko Bethel nunu tuo lashü; mu uko Efrat nu volieketuo petse za baluokecü nu, Rachel-e nuoze vachü chülie, mu puo kechü reta. 17Siro puo mhachü kemezhie se keba ki, nuoze kethekepfü puo üse, “Michie hiecie, no tsie thepfumia puo ngu lalietuomu.” 18Siro puo ruopfü tuotakezhü ki, (puo siaketa la) süpfü puo za pie Ben-oni#35:18 Puoca A nousuo nuou. chü; derei puo puo we puo za pie Benjamin#35:18 Puoca Thezatsa dzie Nuou morei Pekhrotsa Nuou. chü. 19Sidi Rachel siata, mu Efrat nu vokezhü cha nunu puo khruwa (süu Bethlehem), 20tsiu Jakob-e puo mekhru gei tsiese puo seshü; Rachel mekhru gei tsieseu thie ketso rei ba zo. 21Israel-e tuoshü di vo Eder tsiepfhe tse kevo ki nu puo pfheki pethoulie.

Jakob Nuonuoko

(1 Seyie 2:1-2)

22Siro Israel kijü sünu lhou keba ki, Reuben vo di puo puo pelipfü Bilha ze zhüwa; mu Israel süu sishü. Siro Jakob nuonuo thepfu kerekenie 23Leah nuonuoko: Reuben (Jakob nuorieu) Simeon, Levi, Juda, Isakar, mu Zebulun. 24Rachel nuonie: Josef mu Benjamin. 25Rachel thekepfü Bilha nuonie: Dan mu Naftali; 26Leah thekepfü Zilpa nuonie: Gad mu Asher. Hako Jakob nuonuo Padan-aram nu ketuo ki penuoshü puo ketsü thepfuko.

Isak Se

27Süsie Jakob-e Mamre morei Kiriat-arba (süu Hebron) nu puo puo Isak ki vor, Abraham mu Isak unie solhimia chü di lhou kevor-u nu. 28Siro Isak-e cie krie puo di hiethethata. 29Sidi Isak tsata mu teisozha kekra lhoulie, tsiu puo keha thelau chüwa di siata, di puo ze puo themiako ki vota, siro puo nuonie Esau mu Jakob unie puo khruwa.

Currently Selected:

Keriekitho 35: ANBRBSI

Highlight

Copy