Keriekitho 31
31
Jakob Laban Ki nu Taketa
1Sitse Jakob-e Laban nuokoe haikecü puketuo silie, “Jakob-e úko puou vie pete pielietazhie, mu hadzü úko puou vie keba pete se puo kinyi chülietazhie.” 2Mu Jakob rei Laban-e hadzü mhie puo ngu puo nei ba moketa ngulie. 3Süsie Jihova Jakob üse “Tuo la n puonuoko kijü nu n seyieko ki votalie, mu a n ze tuo zotuo.” 4Süsie Jakob-e mia ketsepie Rachel mu Leah unie kiepie khurinuo kro-u ketuo lieu nu shülie, 5sidi unie üse, “A ngukecü nnie puou thiedzü tuoi a ngu puo neiya mote. Derei a puo Kepenuopfü we a ze tuo zo. 6Siro a a kekuo pete se nnie puo lie chüshü zo ücü nnie si ba; 7sirei puo a sewa mu va ker a zha kediwa, derei Ukepenuopfüe puo bu a pechüwa molie. 8Mhanuü puoe sie, ‘Thepfü kepfüko pie n zha chütuo’ iro, khunuoko kro pete thepfü kepfü penuoshüyie; mu puoe rürhücüko pie n zha chütuowe, iro puo kro pete rürhücü penuoshüyie. 9Hakemhie di Ukepenuopfüe nie puo kiriko pielie, di se a tsüshü.
10“Siro khunuoko kerüpuokecü teiki ae a mho si ru a mho geinu tekuochü puo krüko temvükrüu mho prou vo kebakoe puorhie chü, krarha mu rümho. 11Sitse Ukepenuopfü dielieue a mho geinu a ki, ‘Jakob,’ siru mu a sie, ‘A haki bawe,’ ishü. 12Puo sie, ‘Tosie mehoshücie, tekuochükoe puo krüko mho proukesie pete puo rhiechü, krarha, mu rümho die: Laban n gei chükeshü pete ae nguwaketa la. 13Ae Bethel Kepenuopfü we, no sünu tier pie tsiese puo kenheshü di a ki rüseshü, tsie sielie, kijü hanunu tuo mhatalie di n thuo n kepenuo chü nu la votalie.’ ” 14Sitse Rachel mu Leah unie puo ki, “Tsie hienie puou kinu mha hie ya mese morei hienie phruoketuo ba saluo me? 15Puo hie pie rüsorünamia chüwata mo üme? Puo hienie zelie mu hienie la raka khakeshüko zecü phrelieta ze. 16Ukepenuopfü hienie puo kinu kinyi seketako sü pete hienie vie mu hienie nuonuoko vie ze, süla tsie Ukepenuopfü n ki pukeshü kehoupuorei chüliecie.”
17Sitse Jakob-e sie di, puo nuonuoko mu puo kimiako pie ut gei shülie, 18sidi puo riko pete whuolie, puoe krakelie puonya puora pete, tsiu puoe Padan-aram nunu kengukelie khurinuoko pete selie di Kanan kijü nu puo puo Isak ki la votatuoü dojülie.
19Sidi Laban puo kuomie betuoü vota mu Rachel-e puo puo vie terhuorhiko rügulieta. 20Tsiu Jakob rei tatazhü ücü Laban Aram-u ki pu mo di süu sewa zo. 21Sidi puo vie pete selie di tata, siro puo sie di tuo Eufrat#31:21 Ibri Kerüu. cie vota, mu puoe tuo Gilid kijüthoutsa va vota.
Laban Ta Vo Jakob Tsokelie
22Zha se nhie Jakob taketa se Laban ki pushü. 23Sitse puo puo siezedzürieko zelie di zha thenie Jakob tsolie kemochie puo whuo mu puo siemedzi zo Gilid kijüthou gei vota. 24Derei Ukepenuopfü süzhü Laban Aram-u mho geinu sie puo ki, “No mha kevi morei kesuo rei pie Jakob ki pu molieketuo la n kireiliecie.”
25Sitse Laban vo Jakob tsolie. Hateiki Jakob-e kijükhru geinu puo pfheki pethoupie ba. Siro Laban mu puo siezedzürieko rei Gilid kijükhru geinu razhü chü balie. 26Sitse Laban-e Jakob ki, “No kiüdi a sekedo di mhatho haicü chüya ga? Zhiecha pie kediemia ze taketa tuoi a nuopfüko ze tatuote. 27No kiüdi pekhre tazhümu, a se tsiu a ki pu mo di tatazhü ga? A u kenei mu ütsaliko, tambourin mu lyre se di n ketseshüwatuomu ru! 28Siro a bu a nuonuoko mu a nuopfüko mebokelie tei rei khashü moketa kiüdi ga? No chükecü hau kenya mhatho chüwate. 29A n pechülie kevi kekuo a dzie nu ba, derei n puo Kepenuopfü n zhü a ki pu di, ‘No mha kevi morei kesuo rei pie Jakob ki pu molieketuo n kireiliecie, site.’ 30Siro n thuo n puo kiko mengu di tatazhü zorei, kiüdi a rhuoko rügulie ga?” 31Jakob la sie Laban üse, “Kekreilamonyü a michiete, a lecü no a kemvü chü di a kinu n nuonie seketa preite. 32Derei kehoupuo geinu rei n rhuoko ngukelieu bu rhei tuolie lho. N siezedzürieko mhodzü nunu, a gei n vie kicüpuo tuo shiü meholie di setalie.” Jakob-e tsie Rachel-e süko rügu se tuo ücü si kemo la.
33Süla Laban-e Jakob pfheki nu le, siro Leah pfheki nu puo kituopfünie pfheki nu rei le, derei süko ngulie mo. Süsie puo Leah pfheki nunu tuo parta di Rachel pfheki nu le, 34süki Rachel-e terhuo mharhiko chülie di khapie ut chie gei thebau gei shüwa di süko pebapfü bata. Laban pfheki nu mha pete kese vo, derei süko ngulie mo. 35Sitse süpfü puo puo ki, “A n mhodzü sie thashülie kenjü keba la a niepuu bu puo nou meyieta hiecie, thenumia zho-u a gei keba la.” Sidi puo terhuorhiko pfhü rei ngulie mota.
36Sitse Jakob puo nou meyie di Laban kerhieta; siro Jakob sie Laban ki, “Kejo-u kicüpuo ga? A kephouma kicüpuo chüwa üdi no a whuo hathede chü vor ga? 37No a nya pete kese vowate, mu n kinu vienya kicüpuo ngulieta ga? khapie a siezedzürieko mu n siezedzürieko mhodzünu shü di, uko bu avu donu mha pepiwacie. 38A cie mepfü n ze vorshüe; n kuokrüko mu n mvükrüko u nuonuo krüta mo ze, tsiu n rikro nu tekuochüko rei a cülie mo ze. 39Nhachü bu tekewa a se n ki vor mo zo; kaketa souko a pfü lashüya; no we teiso geinu morei teizei geinu rügukelieko rei a dzie nunu lietaya. 40A we, khinhie gei teile mu theva gei kemeku la kemezhie phi, tsiu keze rei a mhi kinu tataya. 41Cie mepfü hako a n kinu lhou vor; n nuopfünie la cie keredia n kituo chü, mu n riko la cie sorou; ru no a zha va ker bie kediwa. 42Mhanuü a puo Kepenuopfü, Abraham Kepenuopfü mu Isak kepreiu a kitsa tha mocü sie we, no a bu a dzie methuo di a ketsewa mecie zomuü, Ukepenuopfüe a mezhieko mu a dzie mhathoko nguliete, sidi nzhü n kerhieshüte.”
Laban-e Jakob Ze Dietseidiekhokelie
43Sitse Laban sie Jakob ki pu di, “U nuopfüko rei a nuopfüko zo, u nuonuoko rei a nuonuoko zo, peri kroko rei a ri kroko zo, mu no ngu keba pete a vie zo. Derei thie a nuopfüko morei uko penuokeshü unuonuoko gei a kedipuo chülie vituo ga? 44Khe, vorlie, avu donu dietseidiekho puo chüwatuo; sidi süu bu avu donu zhapu puo chü tuotalie.” 45Süla Jakob-e ketsie puo chülie di doupie tsiese puo chüshü. 46Süsie Jakob-e puo siezedzürieko üse, “Ketsie pa kengulie,” siru uko ketsie palie di pfhelie, sidi uko tsiepfheu khieki nu mhacülie. 47Siro Laban süu za pie Jegar-sahadutha#31:47 Aramaik nu Zhapu Khru. chü; derei Jakob-e süu üse Galid#31:47 Ibri nu Zhapu Khru. chü. 48Laban sie, “Tsiepfhe hau bu thie avu donu zhapu puo chüte ho;” süla süu za pie Galid üta, 49mu Mizpa#31:49 Puoca Rükhouba. tsieseu üya, puo sie, “Avu huoniehuo ze tuo moketa ki Jihova bu avu donu pfhe balie. 50No a nuopfünie pese, morei unie sie rei thenu kekrei lie sa ro, themia puo rei avu ze tuo mo zo ürei, rükraliecie, Ukepenuopfü thuo avu donu zhapu chü ba zo ho.”
51Süsie Laban-e Jakob ki, “Avu donu ae sekeshü tsiepfheu mu tsieseu mehoshü phi. 52A n pechütuoü morei n bu a pechütuoü tsiese hau morei tsiepfhe hau cie volie lho ücü, tsiepfhe hau bu zhapu chü mu tsiese hau bu zhapu chütuowe. 53Abraham Kepenuopfü mu Nahor Kepenuopfü, unie puo Kepenuopfü bu avu donu capiu chücie.” Süla Jakob puo puo Isak-e Kepreiu se rüseshü, 54tsiu Jakob-e kijü kerükrie geinu ruosuo puo chüshü di puo siezedzürieko bu niekhrüda cütuo üdi uko kieshü, mu uko niekhrüda cülie di teizeizhau pete kijükhru gei bata.
55Süsie Laban-e khiserüna sielie di puo tsunuoko mu puo nuopfüko meboshü di japie uko tsüshü; süsie puo tuota di la puo kinu vota.
Currently Selected:
Keriekitho 31: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
