Keriekitho 30

1Rachel-e puo nuo puo rei penuoshü Jakob tsülie moketa ngu tse, puo dzüriepfü ngu puo rota; sidi sie Jakob ki, “Nuo kha a tsücie, kemosie a siatatuo.” 2Sitse Jakob Rachel gei puo nei mo se di, sie, “A Ukepenuopfü di n nuobvü siu khase bata zo memu?” 3Sitse süpfüe, “A kituopfü Bilha haki ba, puo ki vocie, puoe penuopie a do gei shü di, a bu rei puo geinu a nuonuo ngulie rei si lhomu.” 4Sidi puo puo kituopfü Bilha khapie puo kimia chüwa; mu Jakob puo ki vo. 5Sitse Bilha nuonipfülie di thepfumia puo penuoshü Jakob tsü. 6Süsie Rachel-e sie, “Ukepenuopfü a capi chüshüte, mu a pfhe rünyülie di a nuo khashüte,” sidi puoe puo za thopie Dan#30:6 Puoca Puoe pecapepishü. chülie. 7Siro Rachel kituopfü Bilha nuonipfü lalie di thepfumia kenieu penuopie Jakob tsü. 8Sitse Rachel-e sie, “Ae keperhiekecü kere se puo a dzüriepfü ze keperhie#30:8 Ibri Niphtal. di kuoliete;” sidi puoe puo za thopie Naftali chülie.

9Leah rei puo penuo sa moketa ngukelie ki, puo kituopfü Zilpa ze vor di khapie Jakob bu puo kimia chü lalie. 10Sitse Leah kituopfü Zilpae thepfunuomia puo penuopie Jakob tsü. 11Sitse Leah sie “Ruokuo ze!” idi puo puo za thopie Gad#30:11 Puoca Ruokuo. chülie. 12Leah kituopfü Zilpae thepfu kenieu penuopie Jakob tsü lashü. 13Leah sie, “A nei za! Thenumiapfüko a üse kenei üdi a kietuocü la;” sidi puoe puo za thopie Asher#30:13 Puoca Kenei. chüwa.

14Siro Reuben-e thoulha lieyie ki tsu lie nu nuolhouprü nha ngulie di se vor puo zuo Leah tsü, sitse Rachel sie Leah ki, “N nuou nuolhouprü nha huo se a tsücie,” si. 15Derei Leah sie puo ki, “No a nupfu seseketa mha kecü üdi, a nuou nuolhouprü nha rei sa selie nyüya me?” Rachel sie, “Siro n nuou nuolhouprü nha la puo bu tsiezhü n zezhülie vi.” 16Siro Jakob-e thevatie lie nunu vorkezhü ki, Leah vo puo ze kese di puo üse, “No a kinu vor morosuo; a a nuou nuolhouprü nha pie n zha khrülieketa la.” Süla puo süzhü puo zezhü. 17Siro Ukepenuopfü Leah pfhe rünyülie, mu puo bu nuonipfülie di thepfu pengouu penuoshü Jakob tsü. 18Leah-e sie, “Ukepenuopfü a zha#30:18 Ibri nu ro Sakar. chü a tsüshüte kekreilamonyü a a kituopfü kha a nupfu tsükeshü la,” süla puo puo za thopie Isakar chülie. 19Süsie Leah nuonipfü lalie, di thepfu sorouu penuoshü Jakob tsü. 20Sitse Leah sie, “Ukepenuopfü a phruo pevi seshü a tsü zo; tsie we a nupfu a rhulietatuo, kekreilamonyü a thepfumia sorou penuopie puo tsüshüte ru;” sidi puo puo za thopie Zebulun chü. 21Kenuotsa puo thenumia puo penuolie, mu puo za thopie Dina chülie. 22Siro Ukepenuopfü Rachel rükrashü mu Ukepenuopfü puo pfhe rünyüshü di puo nuobvü khrüshü. 23Sidi puo bu nuonipfülie di thepfumia puo penuolie, ru puo sie, “Ukepenuopfüe mia a kepeseu chüsete;” 24sidi puoe puo za thopie Josef#30:24 Puoca Puoe bashü. chülie, “Jihova bu thepfumia puo pie a tsü sashüyi.”

25Siro Rachel-e Josef penuokelie sie Jakob-e Laban ki, “A bu a kinu mu a thuo a ra la volieketuo la a khashücie. 26A bu uko la n lie chü kevor a kimianie mu a nuonuoko khashü a tsüwa di a bu tuotacie; a kimhie di n lie chü vorshü shicü no a mhatho si ba ru.” 27Derei Laban sie puo ki, “No a bu n ki mha pulie vi üro, a bu pucie, Jihovae n la japie a ketsü a siliete; 28süla n zha chieshüliecie, siro süu kha n tsütuo.” 29Jakob sie puo ki, “Noe a kedipuo mhie di n lie chüshü shi, tsiu n kiriko a dzie nu kimhie di kruolie shikecü si ba ze. 30A kevor mhodzü süko keduoyo zo, derei tsie we kra philietacü la; a kevo cha pete nu Jihova jashü a tsü. Derei a bu kikecüpuo nunu a kikru la mha kesetuo ga?” 31Laban sie, “A bu kedipuo pie n tsü ta?” Sitse Jakob sie, “No mhapuorei pie a tsü hie, no mha hau chüshü a tsütuo ro, a n kuo kro-u vachü mu pfhe lashütuo: 32A bu thie n ri kro, pete nu vo di, tekuo kehoupuorei rürhücüko, krarhacüko mu keteiko kela kreiliecie, siro temvü rei krarhacüko morei rürhücüko keda kreiliecie, sidi sükosü pie a zha chücie. 33Siro kenuotsa a kedietho a zha pushütuo, no a n ze mhachü kevorko zha le kevo ki. Temvüko kehoupuorei rürhü morei krarhakemo huo mu tekuo donu teikemo huo a kitsa nu ngulie ro, a süko rügulietaücü letalie.” 34Laban sie, “Viwe! N kepu mhielie.” 35Sidi sünhie Laban-e mvüdo puorhie kenyiko mu krarhakecüko siro temvükrü rürhü tsiu krarhakecüko, mu kekrako pete kelakreilie di pie puo nuonuoko bu mehota. 36Siro Jakob unie donu zha se rüve kepeciekecü nu khapie bawa, mu Jakob-e Laban ri kro keshako theke ba. 37Süsie Jakob-e poplar mu almond sei kerhei bielie, di süko zhü hüshü, sitse süko nu zie kekrako ngu parlie. 38Sidi puoe puo seizhü hükelieko se vor peri kroko bu dzü krieyakezha dzürüko nu khashü. Mu uko dzü krie kevor ki kerüpuoya. 39Tsiu kirikoe vor seiko mhodzünu u thuo u yieu pelhoukecü ki rürhü mu krarhakecü parlieta. 40Sitse Jakob-e tekuonuoko kho kekreilie, di peri kroko zie kereipie Laban kiri krarhakecüko mu keteiko kitsa vashü, di puo thuo puo vieko whuo kreilie, sidi süko khapie Laban vieko donu shü molie. 41Sidi kehoukipuorei peri puoyie keviko vor kesekelie ki Jakob-e seiko pie periko mhodzünu dzükhou nu shüshü, sidi süko bu seiko donunu nuonipfülieya. 42Derei peri kro kethachüko la we puo seiko khashüya mo; süla kethachüko Laban vieta mu puoyie keviko Jakob vieta. 43Sidi themia süu mhanyi phi sieta, mu perinuo rei kra philie, siro kituo thepfu rei thenu rei tsiu ut mu gada rei kra phita.

Currently Selected:

Keriekitho 30: ANBRBSI

Highlight

Copy