Keriekitho 27

Isak Japie Jakob Ketsü

1Isak-e tsata mu puo mhi merü di mha ngu moketa ki, puo nuo phichüu Esau kieshü di puo ki, “A nuo,” siru puo sie, “A haki bawe.” 2Isak sie, “Harie, ae tsate; a se zha si mote. 3Süla no tsie n rünyieko, n theütsie bouko mu theü selie di nha nu tsucie di chügei se vor a tsücie. 4Sidi a neiyakezha, gacha chülie di se vor a bu cü di a siaketa mhodzü a bu japie n tsüshüketuo la.”

5Rebekae Isak puo nuo Esau rüchü keba ki unie die rünyü ba. Süla Esau chüwhuo di se vortuoü nha nu tsuketa ki, 6Rebeka puo nuo Jakob ki, “N puoe n dzürieu Esau ki, 7‘Nhachü se vorlie di cü kevi mhacha chüpie a bu cücie, a bu siaketa mhodzü Jihova mhodzünu japie n tsüshüketuo la’ ikeba a si ho. 8Süla a nuo, tsie a die ze di a n ki pukeshü chüliecie. 9Khunuo kro nu vo di temvünuo puo phou kevi kenie se vorlie, siro a n puoe puo neiyakezha gacha chü puo tsüshütuo; 10mu n bu se vo n puo tsütuo, sidi puo bu cülie di puo se mhodzü jashü n tsütuo.” 11Derei Jakob sie puo zuo Rebeka üse, “Harie, a dzürieu Esaue puomie kenyi puo, mu a we themia kemeju puoe. 12Mhanuü a puoe a kese di a puo seketuo silie ro, theja monyü rüse se vor a gei shülietatie.” 13Puo zuo sie puo ki, “rüseu bu a gei vortacie, a nuo a die ze di vo sünie se vorlie.” 14Süla puo vo di sünie se vor puo zuo tsüshü; mu puo zuoe puo puo neiyakezha gacha chülie. 15Süsie ki nu puo nuo phichüu Esau pfhenei kevithoko chülie di pie Jakob bu selie. 16Siro khunuo zhü lopie puo dzienie mu puo vo kemeju gei rei dashü. 17Sidi puoe kesekelie cü kevi gachau mu niekhrüda khapie puo nuo Jakob dzie nu shüshü.

18Sitse Jakob-e puo puo ki vo di sie, “A Puo” ishü; ru puoe sie, “A haki bawe, no supuo ga, a nuo?” 19Jakob sie puo puo ki, “Ae n nuo nuorieu Esau we, no a ki kepu kemhiei chüliete; tsie sielie di a chügei cülie di, n bu jashü a tsüketuo la se tuolie.” 20Derei Isak sie puo nuou üse “A nuo kedipuo mhie di mha ngu mhailiete mu?” Puo sie, “Jihova n Kepenuopfü a bu khriekelie la zemu.” 21Sitse Isak sie Jakob ki, “A nuo phircie, a bu n keseshüketuo la, no a nuo Esau tou zo mo mo shi silieketuo la.” 22Süla Jakob-e tuo puo puo Isak penuo phi, ru puo puoe puo kese di sie, “Puo pfhe we Jakob pfhe, derei puo dzie we Esau dzie ze.” 23Sidi puo silie mota, kekreilamonyü puo dzienie-e puo dzürieu Esau dzie tuoi puo mie nyiketa la; süla puo japie puo tsüwa. 24Isak sie, “No a nuo Esau tou zo mo?” puo sie “N zo,” si. 25Süla puo sie, “Süu se phirshücie, a bu a nuo chügeichüu cülie di jashü n tsüketuo la.” Süla puo süu se puo penuo phishü di puo bu cülie; siro puo khubedzü se vorshü ru puo krielie. 26Süsie puo puo Isak-e sie puo ki, “A nuo, penuo phir di a meboshücie.” 27Süla puo puo penuo phi di puo meboshü, ru Isak-e puo pfhenei thengu di jashü puo tsü di sie,

“Harie, a nuo re sü,

Jihova japie ketsü lieu re mhielie!

28Ukepenuopfü bu teigei thezeiu se n tsücie,

tsiu telha mu khubedzü ketshukelhuo kechü.

29Themiako bu n theke chücie,

tsiu seyieko bu tsu n kelucie.

N siezedzürieko mhokezha chücie,

mu n zuo nuonuoko bu tsu n kelucie.

N kerüse kehoupuo bu rei rüsepfücie,

mu ja n ketsü kehoupuo bu rei thejapfücie!”

Esau Theja Pejükewa

30Siro Isak-e japie Jakob tsü tseiwa di Jakob-e puo mhodzü nunu tuo prata mumetha puo dzürieu Esau sü chüwhuoketuo nunu vorlie. 31Sidi puo rei ga chapie cü vi selie, di se puo puo ki vor. Sidi puo puo ki, “A puo bu sielie, di puo nuou chügeichü cücie, n bu jashü a tsüketuo la.” 32Sitse puo puo Isak sie puo üse, “No supuo ga?” Puo sie, “A n nuo, nuorieu Esau lie.” 33Sitse Isak pekhrukhru di sie, “Di siro no vor kemonu khunuo chügei üdi chase vor a bu cülie mu a bu japie puo tsüwaketau supuo ga? Uwe, puo thejapfülieta zotuo!” 34Esau sü puo puo die sikelie ki kra meleimekuoi di sie, puo puo ki, “Jashü a rei tsü zocie, a puo,” ita. 35Derei puo sie, “N siezeu vor a sewa di n thejau sete.” 36Esau sie, “Puo za thopie Jakob chü toulie mo üme? Puo tsieu va sa va kenie a selieketa la. Puo a phichüzhau lielie, mu harie, tsie we a theja rei lieliete.” Sidi puo sie, “No a la theja puorei khapie ba mote me?” 37Isak-e Esau üse, “Harie, a puo bu n niepu chüketuo chüwate, siro puo siezedzürie pete bu puo kituo chüketuo a kha puo tsüwate, tsiu a telha mu khubedzü kha puo khruohishüwate. A nuo, a bu n la kedipuo chü salietuo mu?” 38Süsie rei Esau sü puo puo ki, “No theja puo rübei bacü zo me? Japie a rei tsü zocümu, a puo.” Sidi Esau sü puo pfhephra di kra bata. 39Sitse puo puo Isak sie puo ki:

“Harie, n bu kijü kekruoko nu lhou motatuo mu tei peso geinu thezei khashüyakezha n ketsüko nu lhou motatuo,

40Siro zhiecha se di n bu lhoutuo,

mu no n siezeu theketuo;

derei no puo petsou kesie nhie we,

n vo gei puo vocieu lhouwatuo.”

Jakob-e Esau Nouyie Therhieketa

41Süsie Esaue puo puo japie Jakob tsükewa thejau la Jakob ngumecüta, süla Esaue puo thuo puo rüchü di sie, “A puo la thekrü chüketuo zhako penuo bate; süla a a siezeu Jakob dukhriwatuo.” 42Derei puo nuo phichüu Esau dieko pu vo Rebeka bu silieta; sitse puo puo nuo nhicuu Jakob kielie di sie, puo ki, “Harie, n dzürieu Esau sü n dukhriwatuoü rhükelieu pie puo thuo puo nou thupeluo se bate. 43Süla a nuo no tsie a die zeliecie; sidi sielie di tase a prüu Laban Haran nu kebau ki votalie. 44Sidi dopuo puo ze batalie, n dzürieu bu puo noupfhünouyie rükreta kemochie; 45n dzürieu bu puo noukemeyie nu rüdita, di no puo gei chükeshüu rükra moketa sie, a mia ketseshü di sünunu n zelietuo. Kiüdi a bu khunhie puo nu nnie kenienie pejü phrewatuo dimu?”

46Süsie Rebekae Isak ki, “A we Hitmiapfüko la a nyieta zolie. Mhanuü Jakob rei rüna hau nu lhou keba Hitmiapfü haikecüpfü puo lie latuo üro, a kelhou kedipuo kemevi ba ta?”

Currently Selected:

Keriekitho 27: ANBRBSI

Highlight

Copy