Keriekitho 28

1Süsie Isak-e Jakob kielie di japie puo tsüshü, mu puo ki pu bei di sie, “N bu Kananpfüko miapuorei lielie lho. 2Sielie, di Padan-aram nu n zuo pfutsa Bethuel kinu volie; sidi n meiu Laban nuonuoko miapfü puo liepie n kimia chüliecie. 3Kepenuopfü Kuokejokejüu#28:3 Ibri El Shaddai. bu japie n tsülie. N chü pekruo mu chü pekrashücie, n bu seyie kekra pfutsau chülieketuo la. 4Puo bu Abraham thejau pie n tsülie, no mu n ze ketuo n nuosenuoyieko pete, sidi n bu rühou ketuo kijüko Ukepenuopfüe khapie Abraham tsüwaketa kijüko pie n vie chülietuo.” 5Sidi Isak-e Jakob ketsewa, mu puoe Padan-aram nu Arammia Bethuel nuou Laban, Jakob mu Esau unie zuopfü Rebeka prüu kinu vota.

Esau Ishmael Nuopfü Liekelie

6Siro Esaue Isak japie Jakob tsüshü di puo ketsepie Padan-aram nu shü di puo bu sünunu thenu lielienukeshü, mu japie puo tsü di puo ki pu bei di “No Kananpfüko miapuorei lielie lho,” ikeshü 7mu Jakob-e puo puo mu puo zuo die ze di Padan-aram nu voketa ngushü. 8Sidi Esaue puo puo mu puo zuo unie Kananpfüko ngu unie nei mo zokecü silie. 9Sitse Esau puo kimia bata zorei Ishmael ki vo di Abraham nuou Ishmael nuopfü Mahalat, Nebaiot üpfü liepie puo kimia chü la salie.

Bethel nu Jakob Mho-u

10Jakob-e Beersheba khawa di Harantsa vota. 11Sidi puo thechü puo nu vorlie di süzhü sünu bata. Kekreilamonyü niaki leketa la. Puoe süki kezhü ketsie puo chüpie puo tsükhe chülie di zelietuoü zhüta. 12Sitse puo mho pema mu kheya puo kijü doupie tha, tsiu puo tsüu kho tei tso ba; siro harie, Ukepenuopfü dielieko sügei kho mu ke ba! 13Siro harie, Jihovae puo khieki tha di pucü, “Ae Jihova, n puo Abraham Kepenuopfü mu Isak Kepenuopfü; no zhükecü kijüu, a pie no mu n nuosenuoyie tsütuo; 14tsiu n nuosenuoyieko bu kijü nu nyophe mhietuo, sidi n bu niakra mu niathu ketso, peso mu pekhro pete nu tshupfü votatuo; siro no mu n nuosenuoyieko geinu kijü nu ketuo kikru pete bu thejapfütuo. 15Harie, a n ze tuo zo, mu n kevo cha pete nu n rüguose tuotuo, sidi n ze la thechü hau nu vorshütuo; a n ki pukeshüko chüshüwa kemochie a n khawalie lho zocü la.” 16Sitse Jakob-e keze nunu cosier di pukecü, “Jihova thechü hanu ba tou zo mu a süu si tuo mo.” 17Siro puo michieta di sie, “Thechü hau u ngo za! Hauha Ukepenuopfü ki kemo puorei mota zo, mu hauha teigei kharuuta zo.”

18Siro Jakob khiserüna sielie di puo tsükhe chüpfü kezhü ketsieu chülie di süu doupie tsiese puo chüshü, sidi tier lapie süu tsüle gei shü. 19Sidi puo thechü süu za thopie Bethel#28:19 Puoca Ukepenuopfü Ki. chüwa; sümhodzü we nadi süu üse Luz üya. 20Süsie Jakob rüse di sie, “Ukepenuopfü a ze tuo, mu a kevo cha nu a rüguo se tuo liro, tsiu thiethie va niekhrüda se a tsü siro dziemeneiketuo la pfhemenei se a tsü üliro, 21a bu vi di a puo kinu la vorlie üro, a Jihova pie a Kepenuopfü chütuo. 22Tsiu a ketsie hau pie tsiese puo chü di sekeshüu bu Ukepenuopfü ki chütuo, mu no mha kha a ketsü peteko nunu a ker-zapuo pie n tsü petuo zotuo.”

Currently Selected:

Keriekitho 28: ANBRBSI

Highlight

Copy