Keriekitho 26
26
Isak mu Abimelek
1Abraham teiki kesier pekrie therieu rübei kemo pekrie kekrei puo kijü nu la sier, süla Isak-e Gerar nu Filistinko kediu Abimelek ki vo. 2Sitse Jihova puo pengushü, di sie, “Ijipt nu vo hie, a n ki pushütuo ükezhü kijüu nu lhoulie. 3Thechü hau nu rüsomia chü di lhoulie, derei a n ze tuotuo mu ja n tsütuo, kijü hako pete pie no mu n nuosenuoyieko tsüshüketuo la, siro a n puo Abraham ki rüsekeshü chü tseishütuo. 4A n nuosenuoyieko chü pekrapie teigei themvüko mhieshütuo, mu kijü hako pete pie n nuosenuoyieko tsütuo; tsiu n yieko geinu kijü nu seyie pete bu thejapfütuo, 5Abraham-e a pfhe rünyü mu a dieko se balie, a diekhakeshüko, ae chünukeshüko mu a zhoko zekelie la.”
6Süla Isak-e Gerar nu lhouta. 7Siro thechü sünu themiako puo kimia dze ketsocü ki, puoe sie, “Puo a üpfülie.” Puoe puo a kimia icü pu michieketa la, puo lekecü, “Thechü hau nu themiako Rebeka la a dukhriwa rei si lhomu” icü lecü la, hapfü ngu zivi phi eru. 8Puo thechü sünu ba pechaketa sie, Filistinko kediu Abimelek-e khirki nunu mha mehoshü ru Isak-e puo kimia Rebeka ze kemeruo keba ngulie. 9Süla Abimelek-e Isak kielie di sie, “Harie, hapfü n kimia zo! No kiüdi ‘Puo a üpfülie’ idi pu ga?” Isak sie puo ki, “Kekreilamonyü ae hapfü la a bu siata rei si lhomu itelie.” 10Sitse Abimelek sie, “Hieko gei chükeshü mha hau kedipuo ga? Themiako donu mia puo n kimia zezhüwaketuo sü rüü phi ze, siliro no kejo se vor hieko gei shütie.” 11Sidi Abimelek-e themia peteko ki sie, “Kehoupuorei themia hau morei puo kimia kebieu bu sia petuo zotuo.”
12Siro Isak-e kijü sünu tsia prushü, ru süu teicie nu süde thekrie ngu lalie. Jihova japie puo tsü. 13Sidi themiau mhanyilie, mu puo mhanyi philie kemochie kruo miemiezhüta. 14Puoe tekuo mu mithu kro rei nyi, mu puo kirinuoko rei kra seta, süla Filistinko puo ngu u rota. 15Sitse puo puo Abraham teiki puo kituoko bu thiekeshü dzükhouko pete rei Filistinkoe khawa mu rünyo pie luowa. 16Sitse Abimelek-e sie Isak ki, “Hie kinu tuotacie; noe hieko ki kuo phiketa la.”
17Süla Isak-e sünunu tuota, di vo Gerar razha nu razhü chü ba di sünu lhouta. 18Siro Isak-e puo puo Abraham teiki thiekeshü dzükhouko thie kesa lalie; Filistinko Abraham se sie khakewa la; mu puo thiedzü puo puoe thokeshü zako se süko kie lalie. 19Derei Isak kituoko razhau nu dzükhou thielie di dzüluo ngukelie ki, 20Gerar nu thupfhekoe Isak thupfheko ze kegei di sie, “Dzü hieko vie.” Süla puo dzükhouu za thopie Esek#26:20 Puoca Kegei. chüwa, kekreilamonyü ukoe puo ze kemeüketa la. 21Süsie uko dzükhou kekrei puo thie lalie, süu la rei uko puo ze kegei lata; süla puo süu za thopie Sitna#26:21 Puoca Kengumvü. chü la. 22Sitse puo sünunu tuota di vo dzükhou kekrei puo thie lalie, süu la we mia uko ze kemeü mota; süla süu za thopie Rehobot#26:22 Puoca thechü kemeyako moro Kibou. chülie, di pucü, “Tsie we Jihova u la thechü khashüte ru úko kijü hau nu kruolietuo.”
23Sünunu puo tuose Beersheba nu vota. 24Sitse Jihova süzhü puo mho geinu puo pengushü di sie, “Ae n puo Abraham Kepenuopfü zo, michie hie, a n ze ketuo la, mu a ja n tsütuo, tsiu a kituou Abraham la n nuosenuoyie chü pekrashütuo.” 25Süla puo sükinu ruosuoba puo chülie di Jihova za kieshü, mu puo pfheki pie süki pethoupie balie. Sidi Isak kituoko dzükhou puo thielie.
Isak mu Abimelek Unie Kepfhekhokelie
26Sitse Abimelek-e Gerar nunu puo tarhoyakezhau Ahuzat mu puo rüpfhünuo mhokezhau Fikol zelie di puo ki vor. 27Isak-e uko üse, “Kiüdi a ki vorzhü ga, nie a ngumecü di nie kinu a ketsewata mo me?” 28Sitse uko sie, “Jihova n ze ketuo hie ngu toute; süla úko donu pfhekho puo bu balie di hie bu n ze dietseidiekho puo chüwacie idi hie puya. 29Siliro hieko rei n bie mo mu n gei mha kevi sie kesuo puo rei chüwa mo di kezekevi nunu n ketsekewa tuoi, n bu rei hieko pechü kelho la. Noe Jihova theja kepfüute ru.” 30Sitse puo thehe puo kesepie uko tsü, di uko bu cüükrielie. 31Süsie uko khiserüna sielie di kesekiewa; mu Isak-e uko cha nu uko ketseshüwa, mu uko nou mene di puo ze kekhota. 32Teisozha sünhiesü Isak kituoko vor di uko thie keba dzükhou dze pie puo ki pu di, “Hieko dzü nguliete.” 33Puoe süu za thopie Shiba#26:33 Rüsecü dielou ze kerie. chüwa; süla thie ketso rei nadi süu za üse Beersheba#26:33 Puoca rüse dzükhou moro thenie dzükhou. üdi kietuoya zo.
34Esau cie hiedia-keta ki Hitmia Biri nuopfü Judit mu Hitmia Elon nuopfü Basemat unie lielie; 35tsiu unie la Isak mu Rebeka unie bu lhou re phita.
Currently Selected:
Keriekitho 26: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
