Keriekitho 25

Abraham-e Ketura Liekelie

(1 Seyie 1:32-33)

1Abraham-e thenu kekreipfü puo lie la, puo zae Ketura. 2Süpfü geinu lhoukelieko hako Zimran, Jokshan, Medan, Midian, Ishbak mu Shua. 3Jokshan-e Sheba mu Dedan unie Puou. Dedan nuoko Ashurim, Letushim mu Leumim. 4Midian nuonuoko ro: Efa, Efer, Hanok, Abida mu Elda. Hako pete Ketura nuonuo. 5Abraham-e puo vie keba pete khapie Isak tsüwa. 6Derei Abraham-e puo pelipfüko nuonuo la rei mha methuo khapie uko tsü. Sidi puo rhei baluocü nu Isak kinu uko ketsepie niathutsa rüna nu shüwa.

Abraham Se

7Abraham kelhouzha, cie krie puo di hietheniepengou. 8Abraham-e phichümia puo chü tsatota mu teicie kekra lhoulie di puo keha thelau chüwa di siata, mu puo themiako ki vota. 9Puo nuonie Isak mu Ishmael-e Hitmia Zohar nuo Efron lieu nu, Mamre niathutsa kezhü Makpela tsiepfüu nunu puo khruwa. 10Lie hau Abraham-e Hitmia kinu khrülie. Sünunu puo kimia Sara mu Abraham khru. 11Abraham se sie Ukepenuopfü japie puo nuo Isak tsüshü mu Isak-e Beer-lahai-roi nu lhouta.

Ishmael Yiemiako

(1 Seyie 1:25-31)

12Hakohae Sara die Ijiptpfü geinu penuopie Abraham ketsü nuou Ishmael nuosenuoyieko. 13Ishmael nuonuo kesieso di penuokelieko za hamhie: Ishmael nuorieu Nebaiot, süsie Kedar, Adbil, Mibsam. 14Mishma, Duma, Masa, 15Hadad, Tema, Jetur, Nafish mu Kedema. 16Hako Ishmael nuonuoko mu uko za, uko rüna tsiu kebachüko mu uko seyie geinu lekeshü kedinuo kerekenie. 17Hako Ishmael lhoukelie teicieko, cie krie puo di serethenie sidi puo siata, mu puo ze puo themiako kinu vota. 18Ishmael nuosenuoyiekoe Havila nunu vo Shur ketso donu lhou, süu Asiria kevatsa Ijipt kepetsou nu zhü mu puo siezedzürieko donu lhou tuota.

Esau mu Jakob Unie Kepenuo

19Hako Abraham nuou Isak nuosenuoyieko: Abraham-e Isak Puou 20mu Isak-e Rebeka, Padan-aram nu Arammia Bethuel nuopfü mu Laban üpfü kelie ki puo kelhouzha cie hiediata. 21Isak-e puo kimia nuojüpfü puocü la Jihova ki cha; sitse Jihova puo kecha chü puo tsü, di puo kimia Rebeka bu nuonipfülie. 22Puo nuonie puo vanu tuoluocünu kegei tuota; süla puoe sie, “Haituoü ro, kiüdi a bu rheituo shi?” ituoya. Süla puoe Jihova ki ketsotuoü vo. 23Sitse Jihovae puo ki,

“Seyie kenie-e n va nu tuo,

tsiu n geinu penuokeshünie kepfüphrotatuo;

mu mia puoe kekreiu ki kuokuotuo,

phichüu nhicuu lie chütuo.”

24Puo nuoze tei tsolie tse, harie puo va nu nuobi tuo. 25Phichüu penuolie ru puo mo pete merie mu puomie tsüpie pfhemie tuoi zo; süla uko puo za thopie Esau chülie. 26Süsie puo siezeu penuolie, mu puo dzie-e Esau phitshü teshü par; süla puo za thopie Jakob chülie. Siro Rebekae nuo sünie penuokeshü ki Isak-e cie hiesorouta.

27Unuonie zha sierkelie ki, Esaue nha nu chüwhuo kevimia puo chü, derei Jakob-e zei-i di pfheki nu baya. 28Isak-e Esau khrieya, kekreilamonyü puoe süu chügei puo neiyakezha la, derei Rebekae Jakob khriekuoya.

Esau Phichüzhau Zecükelie

29Khunhie puo Jakob-e gadzü puo kemeluopie zha; süki Esau lie nunu vor, mu puo va merü se tuo. 30Süla Esaue Jakob ki, “A bu no mhacha kemerieyharapie kebau huo cücie, a merüketa la.” (Süla puo za üse Edom#25:30 Puoca Merie.) üya. 31Jakob sie, “N phichüzhau se a ki ze riecie.” 32Esau sie, “A siatatuo üzhie, mu a a phichüzhau se kedipuo chü ta?” 33Sitse Jakob sie, “A ki rüseshü riecie.” Süla puo rüsewa di puo phichüzhau se Jakob ki zewa. 34Süsie Jakob-e niekhrüda tsiu rücü galuou pie Esau tsüshü; mu puo mhacümhakrielie di sie tuota. Hamhie di Esau puo phichüzhau zhasewa.

Currently Selected:

Keriekitho 25: ANBRBSI

Highlight

Copy