Toukepra 9

Thesa Chüpie Kicükiri Pekakewa

1Süsie Jihovae Mosa ki, “Faro ki vo di pushücie, ‘Ibriko Kepenuopfü Jihovae puya: A themiako bu tuotacie, uko bu a lie chüketuo la. 2Noe tsie rei uko bu tuo mvü di uko kha ze ba zo ro, 3harie, Jihova dzieue thesa kere se puo se n lie nu ketuo n kiriko, kierko, gadako, utko, thukroko, mu tekuokroko gei shütuo. 4Derei Jihova Israelko kiriko mu Ijiptko kiriko kho kekreishütuo, sidi Israel vieko puorei siatalie lho.’ ” 5Sitse Jihova puotei puo chieshü di, pukecü, “Sodu Jihova kijüu gei mha hau chüshütuo.” 6Sidi süsienhie Jihova mha hau chüshü; Ijiptmia kiriko pete siata, derei Israelko kiriko we yopuorei siata mo. 7Sitse Faroe mia ketsepie ketso ru Israelko kiriko puo rei siata kemo silie. Derei Faro nou chü perewata, sidi puoe themiako bu tuo mvüta.

Tichü Thesa Kere Puo Chükeshü

8Sitse Jihovae Mosa mu Aron unie ki, “Miphu nunu mige thedzie ketshu pielie, sidi Mosa bu Faro mhodzü nunu süko kelhoupie teitsa vashülie. 9Sitse süu Ijipt kijü pete mho nyophe kememhie chütatuo, sidi Ijipt kijü pete nu tichü thuo themia gei mu khunuo gei chü partuo.” 10Süla unie miphu nunu mige pielie, di Faro mhodzünu thalie, sidi Mosae süko kelhoupie teitsa vashü, sitse süko themia gei mu khunuo gei tichü chü parta. 11Siro tichü la kemeduoko rei Mosa mhodzü thalie kenjüta, tichüe kemeduoko gei mu Ijiptmia pete gei baketa la. 12Derei Jihovae Faro nou chü perewa, sidi puoe unie pfhe rünyü mvüta; Jihovae Mosa ki pukeshü mhiei.

Prü Bu Vor Mha Pekakecü

13Sitse Jihovae Mosa ki, “Khiserüna sielie di vo Faro mhodzü thalie, sidi puo ki pushülie, ‘Jihova Ibriko Kepenuopfüe puya: A themiako bu tuotacie, uko bu a lie chüketuo la. 14Tsieu va a thesa puo ketsepie n gei mu n kituoko gei, tsiu n themiako gei shütuo, kijü nu a tuoikecü miapuorei tuo kemo n bu silieketuo la. 15Tsie we a dzie khashü di thepie pie no mu n themiako pechüshü ro kijüu nunu n dathewata zotuo. 16Derei hau la a n perheipie ba, a kekuo pie n pesishütuoü, kijü pete nu a za pu pesishüketuo la. 17No tsie rei n thuo n chü pezhapie a themiako petsou ba, sidi uko bu tuo mvü ba zo. 18Harie, sodu ha meseki a prü bu krü se tsurtuo, Ijipt kijü chülie tse nunu vor tsie ketso mhakipuorei süde krü kemo chüshütuo. 19Süla tsie mia ketseshü di, nie kiri mu terha nie vie ketuo pete se puo keya kenyi nu vortalie, kekreilamonyü themia rei khunuo rei ze kinu vorta mo di terha ketuo khe gei prüu tsurtuo, mu ukoe siatatuo.’ ” 20Sitse Faro kituoko donu Jihova die kepreimia u diemia mu u kiriko bu ta kinu vorta; 21derei Jihova die pie mhaükemo khe u diemia mu u kicükiri pie terha bawa.

22Sitse Jihovae Mosa ki, “N dzie yhapie teitsa vashüyi kijü pete nu prü bu themia gei, khunuo gei mu lie nu nha pete gei, siro Ijipt kijü puochapuochie pete nu krü tsurlieketuo la.” 23Sitse Mosae puo theu yhapie teitsa vashü ru Jihovae teikese mu prü ketseshü, tsiu mi te kijü nu tsurta; sidi Jihovae Ijipt kijü nu prü pekrüshü; 24prü krü mu prü donu mi meva sei ba zota, prü krüthorshü zo, Ijipt-e seyie puo chükelie sie Ijipt kijü pete nu mhakipuorei süde krü chie mo. 25Sidi Ijipt kijü puochapuochie nu prü bu mha pete vawa, themia siro khunuo rei tsiu lie nu nha pete vawa, mu terha seiko pete vatshevatshawa. 26Israelko keba Goshen kijü nu rübei prü krü kemo zo.

27Sitse Faroe mia ketsepie Mosa mu Aron unie ki shü di sie, “A tsieu va phoumawate Jihovae mezhü zo, a mu a themiako jote. 28Jihova ki chashücie, teikese mu prükekrü hau hai zorei vite; a nieko bu tuolietuo, mu nie bu ba salie lhote.” 29Mosae puo ki, “A nadi nunu pralie mumetha ae Jihova ki a dzie yhashütuo; sitse teise motatuo, sidi prü bu krü motatuo, n bu kijüue Jihova vie zo ücü silieketuo la. 30Derei no mu n kituoko we, tsie rei Jihova preilie mo zokecü a si ba.” 31(Flax siro barli lha we peka phrewa, Barli lha we puokre pfü ba tsiu Flax pou thebe batacü la. 32Derei thoulha mu nhalha we pekawa mo, hanie we rüchü menuokecü la.) 33Süla Mosae Faro nadiu nunu prata, di puo dzie yhapie Jihova ki shü; ru teikese tsiu prükekrü khawata, mu teirüpie kijü va sa mota. 34Derei Faroe teirü, prükekrü siro teise sa moketa ngu tse, puo phouma lata, di puo nou re lalie, puo mu puo kituoko rei. 35Sidi Faro nou chü perewa, di puo Israelko bu tuo mvüta; Jihovae Mosa geinu pukeshü tuoi.

Currently Selected:

Toukepra 9: ANBRBSI

Highlight

Copy