Toukepra 10

Kuprie Chüpie Mha Pekakewa

1Sitse Jihovae Mosa ki, “Faro ki volie; ae a zasi hako pie uko pekieshütuo üdi, puo mu puo kituoko nou chü perewatakecü la. 2Sidi nie bu nie nuonuo tsiu nie tsunuoko kesikengu ki nu ae Ijiptmiako pie kethekrekeshü mu uko donu zasi kikecü kro puo chüshü shikecü pu tuotuo; nie bu ae Jihova zo ücü silieketuo la.”

3Süla Mosa mu Aron unie Faro ki vo, di puo ki, “Jihova, Ibriko Kepenuopfüe puya, ‘Kichiepuo no a mhodzüki n thuo n bie kerünuoshü mvü ba zotuo ga? A themiako bu tuoliecie, uko bu a rüsuoketuo la. 4Mhanuü noe a themiako bu tuo mvüta ro, harie, sodu, a kuprie se vor n kijü nu shütuo. 5Mu ukoe kijüu zie zepfülietuo, sidi miapuorei bu kijü bacü ngu motatuo. Tsiu ukoe prü bu va kepeshako cülietatuo, mu ukoe nie lie nu keba seiboko pete cülietuo. 6Siro ukoe n kiko nu, n kituoko pete kiko nu, mu Ijiptmia pete kiko ketshu chülietuo, nie puotsanuoko, morei nie puonuoko kijü nu lhou vor tse nunu vor thie ketso ngu kemo chüshütuo.’ ” Süsie puo rüreilie di Faro ki nunu tuo prata.

7Sitse Faro kituokoe puo ki, “Kichiepuo themia hau bu u la kebie puo mhiei ba zotuo mu? Uko bu tuotacie, Jihova uko Kepenuopfü rüsuolieketuo la; no tsie rei Ijipt pekawaketa si moluo me?” 8Süla Mosa mu Aron unie ze la Faro ki vor; ru puoe unie ki, “Volie, di Jihova nie Kepenuopfü rüsuolie; derei nieko suomia bu votuo ga?” 9Sitse Mosae sie, “Hieko phichünhicu ze votuo; hie hie nuonuo thepfu mu thenuko tsiu hie kuokro siro hie thukro rei ze votuo, thenyi puo nyipie Jihova ki shü morokesuo la.” 10Sitse puoe unie ki, “Mhanuü ae nie nuoko bu nie ze votuoücü siewe, Jihova nie ze tuotie. Nie nou mha kesuo rhü bata tou zeru. 11Mo, lho zo, nie donu thepfumiako vo di Jihova rüsuolie, nieko kemengu süu ze di,” sidi Faro mhodzü nunu unie whuowa.

12Sitse Jihovae Mosa ki, “Kuprieko la n dzie yhapie Ijipt kijü mho shücie, uko bu Ijipt kijü pete nu vo di prü bu va kepesha nha pete cülieketuo la” 13Süla Mosae puo theu yhapie Ijipt kijü mho shü, mu Jihovae kijüu mho niathu teikhrie se vor di sünhie zhate mu teizeizha pete rükhrie bata, sidi teiso vor tse niathu teikhrieue kuprie hepfü vorshü. 14Tsiu u kupriekoe Ijipt kijü pete mho vor di Ijipt rüna pete nu bata, kuprieko krakrapie thiedzü mu thiesie rei süde ngulie kelho parta. 15Sükoe kijü pete zepfülie, sidi kijüu zeibouita, mu sükoe kijü nu nhako pete tsiu seiboko gei nhasi pete prü va peshakeshüko cülie, Ijipt kijü pete nu nha kepejo yopuorei tuo mota, seibo morei lie nu nhabo rei. 16Sitse Faroe rükri Mosa mu Aron unie kieshü, di unie ki, “Ae Jihova nnie Kepenuopfü mu nnie mhodzü phoumawate. 17A kephouma tsieu va la vashücie, sidi Jihova nnie Kepenuopfü bu a kinu kesia vie hau setaketuo la chashücie.” 18Süla puo Faro mhodzü nunu prata; di Jihova ki chashü. 19Sitse Jihovae niakra teikhrie re sekecü puo chü kerükhrieshü di süu bu kuprieko he se vo Kemerie Dzükezha#10:19 Moro Tekhrie Dzükezha. nu shüwa, sidi Ijipt kijü pete nu kuprie yopuorei tuo mota. 20Derei Jihova Faro nou chü perewa, mu puoe Israel nuonuoko bu tuo mota.

Ijipt Kijü Pete Zeibouiketa

21Süsie Jihovae Mosa ki, “N dzie yhapie teitsa vashücie, Ijipt kijü mho zeibouikecü bu bataketuo la, zeipie bielie kevi chü zokecü puo.” 22Süla Mosae puo dzie yhapie teitsa vashü, ru Ijipt kijü pete mho zha se zeibouita. 23Uko huoniehuo ngulie kenjüta, mu zha se we miapuorei puo ba nunu sie rei mota; derei Israelko ba nu we zie ba zo. 24Sitse Faroe Mosa kieshü di, “Volie, di Jihova rüsuolie, nie nuonuo rei nie ze volie vi; nie kuokroko mu nie thukroko rübei khapie bawalie.” 25Derei Mosae sie, “No hie bu Jihova hie Kepenuopfü rüsuolieketuo la ruosuo mu kethe ruosuo khashülie kevi chü morosuo. 26Hie kiri bu rei hie ze vo morosuo, puomou puorei khawalie lho, Jihova hie Kepenuopfü rüsuoketuo la süko ze vo morosuo, mu hie sünu vo tsolie kemo ki kedipuo se Jihova rüsuotuo shikecü si kemo la.” 27Derei Jihovae Faro nou chü perewa, di uko bu tuo mvüta. 28Sitse Faroe puo ki, “A kinu tuotalie, n thuo menuolie; a zie ngu la sa hie; no a zie ngu lakecü nhie no siatuokecü la.” 29Mosae sie, “N kepu tuoi, a n zie ngu lalie lho.”

Currently Selected:

Toukepra 10: ANBRBSI

Highlight

Copy