Mhakechüko 11

Pitor Mhatho Dze

1Judia nu keba Apostelko mu kepelekoe#11:1 Gk Siezedzürieko. Judakemoko rei Ukepenuopfü dieu lielieketa silie. 2Süla Pitor-e Jerusalem nu vorlie tse zhükeremiako puo ze kemeü di 3sie, “No kiüdi zhürekemoko ki vo uko ze mhacümhakrieta ga?” sita. 4Süla Pitor sie uko ki süu dze pu kemenuoshütuo üdi sie, 5“A Jopa nadiu nu kecha chü keba ki, a sie si mozhü di ziemho puo ngu. Ru mhapuo, pfhe kezha tuoikecü puo, puoke diako pete khe di teigei nu kerünuo se tsur a khieki balieta. 6A süu meho menuoshü tse sünusü nhachü phidiapfü, mha tekecü nhachüko, mu gou ketuo khunuoko mu teirako rei tuo di ngu. 7A mhapfhe puo a ki pu sakecü si, ‘Pitor, sielie; dukhrilie di cülie,’ isi. 8Derei a sie, ‘Suotuomu, Niepuu: Kekreilamonyü rhukecü vie morei mesa kemo puorei se a me nu shüya momu.’ 9Sitse va kenieu rei teigei nu mhapfheu la sie, ‘Ukepenuopfü chü kemesawaketau, no rhu üdi pu hie,’ si. 10Mha hau va se chüta, süsie süko pete teshüse teigei la khota. 11Sütei touki Kaisaria nunu ketsekeshü mia seko vor a kebachüu tsolieta. 12Siro Ruopfüu a bu mhapuorei kenoudo mo zo di uko ze volienuta. Jopa nunu kepelemia sorou a ze kepeza di themiau kinu volie. 13Sitse puo hieko ki puo kimhie di teigeidielieu ngu shi mu süu puo ki mha pu di, ‘Mia ketsepie Jopa nu Simon Pitor ükecüu ki shü di puo ze vorcie; 14puo n ki die pushütuo mu süu la no tsiu n kinuko pete kelalietuo,’ si. 15Sidi a diepuvü tse hadzü u gei chüketa tuoi, Kemesa Ruopfüu uko gei tsurta. 16Süki Niepuu thiedzü pukeshü, ‘Johan dzü nunu mia dzülu khashü, derei nieko we Kemesa Ruopfü nunu dzülupfütuo, ikeshü dieu a rükralie.’ 17Siro hadzü u Niepuu Jisu Khrista pelelie tse Kemesa Ruopfü methuo pie u ketsü touu pie uko rei tsü üliro, a supuo di Ukepenuopfü khalietuo mu?” sita. 18Siro hau sikelie ki, uko kemekrie zeita. Mu uko Ukepenuopfü tshe di sie, “Ukepenuopfü thuo Judakemoko bu rei kerhei nu volieketuo la thenoukedikelie pie uko tsüshüte,” sita.

Antiok nu Kehouu

19Kepechü sier di Stefan dukhrikewa ki kepelemiako phruo kecürepie lukihaki keshü nu uko huomia Foinikia, Saipras mu Antiok nu vo di dieu pie Judako ki rübei pu. 20Derei huomia Saipras mu Kurini nunu kevorko Antiok nu vo di Grik die kepu Judako ki rei Niepuu Jisu dze pushü. 21Niepuu dzie uko ze tuo mu themia kekra pelelie di rürei Niepuu kitsa vorta. 22Thedze hau Jerusalem kehou tsota, süla uko Barnaba ketsepie Antiok nu shü. 23Puo vo di Niepuu ngukemezhieu ngu di puo nei phita; puo uko pete bu thenou pete se dietho di Niepuu kitsa chüsechü tha zolienu tarhoshü. 24Puo themia kemezhü puo, Kemesa Ruopfü, mu kepele puo tshupfü di mia kekra ze Niepuu ki vorlie. 25Süsie Barnabae Saul pfhü Tars nu vo, 26sidi vo puo ngulie tse, puo ze Antiok nu vor di ciete puo sünu kehouu ze ba di mia kekra pethashü, mu Antiok nunu pethakelieko üse, “Khristamiako” idi kielie kerietho chü.

27Süki Jerusalem nunu siedzekesimiako Antiok nu vor. 28Uko mia puoe puo za Agaba ükecüu siethalie di Ruopfü kekuou nunu sie, kijü pete nu pekrie kemeriekecü puo vorketuo dze pu, mu süu Klaudia kedi teiki chü. 29Siro pethakeliekoe Judia nu keba kepeleko khruohiketuo la u thuo chülie keviu ketseshüketuo pepilie; 30uko hau chülie di Barnaba mu Saul unie dzie nunu ketsepie phichüko tsüshü.

Currently Selected:

Mhakechüko 11: ANBRBSI

Highlight

Copy