Mhakechüko 10

Pitor mu Kornelia

1Kaisaria nu Kornelia ücü puo Itali Rüpfhünuo ükezha nu kriemhokezha chü ba. 2Puoe puo kepele nu pecü phi di puo kikru pete ze Ukepenuopfü khrüprei; siro puo mha pie mia tsü mia za phiya mu sidi Ukepenuopfü ki cha sei baya. 3Khunhie puo thehesie keba se meseki puo ziemho ngu mecümecie, mu Ukepenuopfü dieliemia puo vor puo kie di, “Kornelia,” si. 4Sitse puo puo michiepfü puo meho terü di sie, “Niepuu, kedipuo ga?” sita. Puo sie, “N kechako mu n mhazako kerükra vie puo chü si kho Ukepenuopfü mhodzünu tso bate. 5Mu no tsie mia ketsepie Jopa nu shü di Simon Pitor üyakezhau kieliecie, 6puo vo chüzhükechüu Simon ükecü dzükezha khie bayakezhau ki nu ba ho,” sita. 7Teigeidielie puo rüchükeshüu tuota tse, puo puo kituomia kenie mu puo lie chü bayakezha chüpahi kepecü puo sa kielie, 8sidi mha pete uko ki pushükewa sie uko ketsepie Jopa nu shüshü.

9Süsienhie thehe meseki uko rüve nadiu penuo vokezhü ki, Pitor kecha chütuo üdi ki mho gei kho. 10Süki puo va merü di mha huo cü nyüta; sidi mha kese keba ki, puo ziemho nu vorta. 11Puoe tei kokeshü ngu mu pfhe kezha puo, puoke diako khe di petepie kijü keshü ngu. 12Sünu kijü nu khunuo phidiapfü, gou ketuo khunuoko mu pera neiü tuo di ngu. 13Süki mhapfhe puo sie, “Sielie, Pitor; dukhrilie di cülie,” sita. 14Derei Pitor sie, “Sisuomu, Niepuu; a mhakipuorei rhuketa morei mesa kemo vie cüya chie mocü la,” sishü. 15Mhapfheu va kenieu puo ki, “Mhakehoupuorei Ukepenuopfüe chü kemesawaketau no süu üse rhukecü vie isuo,” sita. 16Va se sükemhie chüshü di mha süu se teigei la mhai khota.

17Sitse Pitor ziemho hau ca lelie mo di puo kemha chüpfü keba ki Korneliae ketsekeshüko vor tsolie. Ukoe Simon ki ketso vor di care ki thata. 18Ukoe mia kieshü di Simon, Pitor ükezhau sünu ba mo mo shicü ketso. 19Süki Pitor ziemho-u ca kedipuo shicü le ba tse, Ruopfüu sie, “Harie, mia se n pfhü tuo ho. 20Sielie, di kelie, mu kenoudo moto zo di uko ze volie; a uko ketsekeshü la.” 21Süla Pitor ker süko ki, “Nieko mia puo pfhü ketuou a we, nieko kedipuo la vorzhü ga?” 22Uko sie, “Kriemhokezhau Kornelia, miatho tsiu Ukepenuopfü khrü preiyakezhamia puo, mu Judamia seyie pete mhodzü thetshe kepfümia, kemesa teigeidieliemia puoe puo bu n kie ze puo ki vo di no kedipuo pushütie shi rünyünushülie,” si. 23Süla Pitor uko kie ze kinu lelie di uko pesolie.

Süsienhie puo sie di uko ze vota, mu Jopa nunu kepelemia#10:23 Gk Siezedzürie. huo puo ze vo. 24Süsienhie uko vo Kaisaria tsolie. Korneliae uko merü di puo kicükinumiako mu puo khriethokhriechüko kie ze vo ba. 25Pitor vor tse Kornelia puo ze kese, ru puo mhodzüki khoutoulie di puo rüsuota. 26Derei Pitor puo phoulie di sie, “Sie thalie, a rei themia zo,” ita. 27Tsiu puoe chatuo chakhrie puo ze kerüchü di kinu le, ru sünu themia kekra kengu ba di ngulie, 28sitse puo uko ki, “Nie thuo zorei Judamiae vo Judakemomia ze kepekro morei süko kitiekinu leya kemo si ba, derei Ukepenuopfü a bu miapuorei le perhu, morei thita hienucü tha a kie. 29Süla a keliekeshü ki ze, a mhapuorei panya mo zo di vorte. Süla nieko kedipuo la a kelie shiü a ki pushütuo mo?”

30Sitse Kornelia sie, “Zha dia voketa ki tsie mese thehesie keba se ki a ki nu kecha chü ba ru pfhenei kekra se di mia puo vor a mhodzünu thalie. 31Sitse puo sie, ‘Kornelia, n kecha rünyüliete mu no mha pie mia tsü mia zakecüko Ukepenuopfüe rükra bate. 32Süla mia ketsepie Jopa nu shü di Simon, Pitor ükezhau kieze n ki vorliecie; puo vo dzükezha khie keba chüzhükechüu Simon so chü ba ho!’ 33Süla a kenourhei mia ketsepie n ki shü mu no vorcü vi sewe. Siro tsie hieko n kinu Niepuu n ki pukecüko rünyütuoü vor Ukepenuopfü mhodzünu ba phrewe.”

Judakemoko Dieliekeviu Rünyükecü

34Sitse Pitor tiehie sie: “A tsie we Ukepenuopfü mia puo gei rei puo nei si kreiya mocü siliete, 35derei seyie kehoupuo nu rei puo khrüprei di puo mhodzünu puotouu chükezhamia puo neiyakecü si touliete. 36Puoe dielie ketsepie Israelko ki shü di, Jisu Khrista, peteko mho Niepuu zo, puo geinu vitho pie pethakeshü nie-e si batuo. 37Nie dielie süusü Johan-e dzülukepfü dze pupie mia pethakecü sie nu Galil nunu sede di Judia peteko nu pu vokecü si batuo: 38Süusü Ukepenuopfüe kimhie di Kemesa Ruopfü mu puo kekuo kha puo gei shü di Nazaret Jisu kenhelie shicü dze zo; puo lukihaki vo mha kevi chü mu terhuo kesuoko bu u keyhukezhie ze tuoketa khe chü keshürhoshü, Ukepenuopfü puo ze ketuo la. 39Siro puo Judia mu Jerusalem kijü peteko nu mhachükeshü khe zhapuko sü hie zo. Ukoe sei geinu puo gou khriwa; 40derei Ukepenuopfüe zha se nhie puo chü perheilie di puo bu vo, 41themia pete monyü Ukepenuopfüe zhapu la kedakelie hieko rübei mhingu chüshü, mu puoe kesiako donunu rheilasieketa sie rei hie puo ze mhacümhakrie zo. 42Tsiu Ukepenuopfüe puo kedapie puo bu kerheiko mu kesiako nyie pepiketuou ükecü dze puoe hie bu pu mia pethanute. 43Sizomonyü puo pelekelie khe puo za nunu kephouma valieketuo siedzekesiko pete rei puo zhapu chü vor zo.”

Judakemoko Kemesa Ruopfü Ngukelie

44Siro Pitor die pu ketha nu Kemesa Ruopfüu die süko kesi khe gei vorta. 45Süki Pitor ze kevor zhürekepfümia pelelieketakoe, Judakemoko gei rei Kemesa Ruopfü rushüketa la u ngota, 46kekreilamonyü ukoe pfheneiü se mha pu di Ukepenuopfü tshekecü siketa la. Sitse Pitor sie, 47“Themia hako rei we ngulieketa tuoi Kemesa Ruopfüu ngulieta liro uko dzülupfükecü kekha huo ba me?” 48Sidi puo uko bu Jisu Khrista za nunu dzülupfülienuwa. Sitse uko puo bu zha huo uko ze sa banu di chata.

Currently Selected:

Mhakechüko 10: ANBRBSI

Highlight

Copy