Mhakechüko 9

Saul Puo Nou Kedikelie

(Mhak 22:6-16; 26:12-18)

1Sükisü Saul-e thete dieu se mu Niepuue pethakelieko dukhrituoü khuboupfü di zievokezhatho-u ki vo, 2di puo bu Damaska nu sinagogko nu voketuo la leshü chalie, sidi puoe kehoupuorei Chau zeyakezha thepfu rei thenu rei ngukelieko teze Jerusalem nu votuoü tuo. 3Sidi puoe tuo Damaska penuo vozhü tse, vapuochü teigei nu kezie puo tsur puo khie lutsahatsa va ziekruoita. 4Sitse puo te kijü tsuta mu mhapfhe puo, “Saul, Saul, no kiüdi a pechüpenyüya ga?” 5Siru puo sie, “Niepuu, no supuo ga?” Sitse puo die kela di, “A Jisu, no puo pechüpenyüyakezhau. 6Derei no sieliecie, sidi tuo nadiu nu lelie, sünu n bu kedipuo chü morosuo shicü pushütuo.” 7Süki puo ze rüveketuoko mhapfheu we si zo derei miapuorei ngu kemo la thopfü thata. 8Saul kijü nu sielie di mhirhoshü, derei mhapuorei ngu mota; süla uko puo dzie teshülie di puo ze Damaska nu leta. 9Sidi puo zha se mhapuorei ngu mo mu mhacümhakrie rei mo bata.

10Süki puo za Anania ükecü pethakeliemia puoe Damaska nu ba. Niepuu ziemho geinu puo ki, “Anania,” si. Puo sie, “Niepuu, a haki bawe,” sishü. 11Süki Niepuu puo ki, “Sieliecie, sidi tuo cha Kemezhüu üyakezha nu volie mu vo Juda kinu keba Saul ükecü Tarsmia puo ketsocie. Puo tsie kecha chü bate, 12mu puo ziemho geinu Anania ükecümia puo vor puo bu mha ngulieketuo la puo dzie yhapie puo gei keshü ngu bate,” sita. 13Derei Anania sie, “Niepuu, mia kekra themia hau dze mu puo Jerusalem nu n themia kemesako gei suo phikecü mhatho chükeshü dzeko pete a ki pute, 14siro puo hanu zorei zievokezhako kinu Damaska nu keba n rüsuoyakezhako telietuoü kekuo chaliete.” 15Derei Niepuu puo ki, “Tuoshülie, kekreilamonyü a puo bu Judakemoko mu kediko tsiu Israelko ki a zau se pushüketuo la puo kedaliete; 16a a thuo puo bu a za la kedithede kemezhie morosuo shicü peteko thashü puo kietuo,” sita. 17Süla Anania sie di tuo Saul keba ki nu vo di puo dzienie yhapie puo gei shü di sie, “A Siezeu Saul, Niepu Jisue no cha nu vorkezhü ki n pengukeshüu thuo n bu mha ngu lalieketuo mu Kemesa Ruopfü bu n tshulieketuo la a ketseshüwe.” 18Sishü tse mezemo puo mhi geinu mha lhe mhiekecü huo tetsuta di puo mha ngu lalieta. Sitse puo sielie di dzülupfülie, 19süsie puo mha huo cülie di metei lalie.

Saul Damaska nu Pethakecü

Süsie puoe pethakelieko ze di zha huo Damaska nu bata, 20Sidi puo kenourhei sinagog nu vo di Jisu dze pu di sie, “Puo Ukepenuopfü Nuou zo,” sita. 21Siro puo die kesiko pete u ngo di, “Puo Jerusalem nu theza hau kieyakezha kheko pekatuoyakezhau mo me? Puo thechü hau nu rei süu la themiako telie di ze zievokezhako ki voketuo la kevor-u zo mo me?” sita. 22Derei Saul kepetha dieu kuo kechü sa di Jisue Khrista zo ükecü thashü di Damaska nu kelhou Judako ti pejüwa.

23Siro zha huo sie Judako kedova di puo dukhriwaketuo rhü bata, 24derei puo uko mharhü süu silieta. Ukoe puo dukhriwatuoü teizeiteiso kharuko nu puo chadze bata; 25derei khuzhü puo puoe pethakelieko puo pie mekho puo nu shülie di dahou kecie puo nunu puo petepie dahou sie shüwa.

Saul Jerusalem nu Kevo

26Sidi puo Jerusalem nu vorlie tse, puoe pethakelieko ze kepekrolie nyü sie; derei uko puo üse pethakeliemia ücü pele mo di uko pete puo preita. 27Sirei Barnaba puo ze apostelko ki vo di, uko ki puo kimhie di chala nu Niepuu ngu shi mu Niepuu puo rüchü, siro puo thepfu se di Jisu zau pie Damaska nu mia petha shicü dze pushü. 28Süla puoe uko ze Jerusalem nu kho mu ke di Niepuu za nu thepfu se di mia petha tuota. 29Puo Grik die kepu Judako ze kerüchü mu keprüli, derei uko puo dukhriwatuoü sieta. 30Süla kepelemiako#9:30 Gk Siezedzürieko. hau silie tse, uko puo ze Kaisaria nu vo di puo ketsepie Tars nu shüwa.

31Süteiki Judia, Galil tsiu Samaria nu kehouu bu mene mu metei sielie. Siro Niepuu khrüprei di lhou mu Kemesa Ruopfü bu unou chü peluo tsiu tsüphrü kra miemielie.

Pitor Lida mu Jopa nu Kevo

32Pitor rüve lukihaki kepeleko donu vo,#9:32 Gk Pete ki vo. mu puo Lida nu keba kemesako ki rei vor. 33Sünu Aenia ükecü lasiamia puo, cie thetha puo zhü nu zhüketa puo ze keselie. 34Sitse Pitor sie puo ki “Aenia, Jisu Khristae n chü keshürhoshütuo üzhie, sielie, di n zhü tshüwalie.” Sitse puo mhai sielie. 35Ru Lida mu Sharon nu kelhou pete hau ngu di rürei Niepuu kitsa vorta.

36Siro Jopa nu Tabitha ükecü pethakeliemiapfü puo baya, Grik die nu puo za Dorka.#9:36 Aramaik nu Tabitha mu Grik nu Dorka icü zau ca liro chüzhie. Süpfü mha kevi kechü mu methuo mha pie mia ketsü nu chüsechüya. 37Si ba ru puo mhachülie di siata, sitse uko puo mo-u khrüwa di pie kibou peso-u gei zhü. 38Lidae Jopa kepenuoki ba, mu pethakelieko Pitor sünu keba sishü di uko mia kenie ketsepie puo kie bei di, “No rükri hieko ki vor zocie,” ishü. 39Süla Pitor sielie di sünie ze tuota; siro puo vor tsolie mu uko puo ze kibou peso-u gei kho. Sitse samipfüko pete vor puo houpfülie, di Dorka rhei keba ki boulie mu pfhemenei chükeshüko chüpie puo pekie di kra ba. 40Süla Pitor uko pete bu chazou prata, mu puo khoutoulie di kecha chüshü; süsie puo rürei vo themo-u kitsa valie di sie, “Tabitha, sieliecie.” Sitse puo mhirhoshü di Pitor ngulie tse, puo sie balieta. 41Ru puo hapfü mengupie puo bu siethalie, süsie puo kepelemiako pete mu samipfüko rei kie lashü di puo chü perheilieketa se uko pekieshü. 42Siro thedze hau pu kezapie Jopa nu mia pete ki vota mu themia kekra Niepuu peleta. 43Siro Pitor telhe Jopa nu Simon chüzhükechüu ze ba.

Currently Selected:

Mhakechüko 9: ANBRBSI

Highlight

Copy