Mhakechüko 12

Kepechü Kra Sierketa

1Süteiki kediu Herod kehou nu huomia pechüta. 2Puo zhiecha pie Johan dzürieu Jakob dukhriwa. 3Puo hau chükeshü Judako u neikecü ngulie tse, puo Pitor rei telieketuo la mhachü vota. (Hau Khreiüshükemo Niekhrüdanyi teiki.) 4Puo Pitor telie tse, puo khapie kedieki nu shüwa, sidi chüpahimia, kro dia bu ketherü puo pfhenushüwa, Ciekevonyiu tseiketa sie nu puo ze themiako mhodzünu kevo le ba. 5Siro Pitor kedieki nu keba ki kehouue puo la Ukepenuopfü ki cha u rhiechü ba.

Kedieki nunu Pitor Kelakeshü

6Herod-e puo ze parketuo mhodzü zhü Pitor-e rükhoumia kenie donu thegiro kenie pie puo khepfü di zhü, siro rükhoumiako kikha mhodzünu kedieki pfhe tha. 7Sitse le mo keba nu Niepuu dieliemia puo mhai vor thalieta; mu kezie puo kibouu va ziekruoita. Süki teigeidielieu Pitor tsei kepfhüshü di puo kesoulie di puo ki, “Mhai sielie!” Sishü tse dziekha ronie Pitor geinu rülhouta. 8Süki teigeidielieu sie puo ki, “N chie phalie mu n phikou nyülie,” sita. Süla puo sükemhie chülie. Sitse süu sie puo ki, “N pfhe chü dzielie di a siemedzilie,” sishü. 9Pitor tuo pra di puo siemedzi vota; derei teigeidielieu chükeshüko ketho ücü le tuo mo, ziemho nu mha ngu zo nhiemu iketuo zo. 10Sidi unie keze rükhouko tha kerieu mu kenieu cie vo di chatse ze nadiu kevatsa thegi careu nu vorlie. Ru careu puo thuo puo khrüpie unie tsü di unie bu parta; süki teigeidielieu puo kha mhawata. 11Süzenu Pitor puo sie silie di sie, “Tsie we Niepuu puo thuo Herod dzie nunu mu Judako mharhü pete nunu a kelashütuo üdi puo dieliemia ketseshüketa a si touliete,” sita.

12Puoe hau lekelie sie, Johan, puo za kekreiu Mark-nuo zuopfü Maria kinu vo, sünu mia kekra keze di kecha chü ba. 13Pitor chazou kikhau ketoukeshü ki, Rhoda ükecü mia thekepfü puoe mehotuo üdi par. 14Puoe Pitor pfheü sishü tse puo neithorta mu kikhau khrüshü mo di ta la le di Pitor vor kikha ki thata ücü pushü. 15Sitse uko puo ki, “No nyate nhie ha!” sita. Derei puo süu ketho zo ücü pu beita. Uko sie; “Süu puo khrümvü puo zotuo,” isita. 16Süki Pitor kikhau ketou tha zota; mu uko kikhau khrüshü tse, puo ngulie di u ngota. 17Sitse puo dzieziepie uko bu melie hienu di, Niepuu kimhie di kedieki nunu puo ze parshü shicü dze uko ki pushü, sidi puo sie, “Hau pie Jakob mu kepelemiako#12:17 Gk Siezedzürieko. ki pushücie” ishü di puo tuo mharapuo vota.

18Teiso parta tse, Pitor kedikipuo vote shicü silie mo di chüpahiko donu kebvükebou phi bata. 19Sitse Herod puo pfhü pejüketa ki, puo rükhouko ketsokegashü di uko dukhriwanuta. Sidi puo Judia nunu Kaisaria nu tsu di sünu bata.

Herod Se

20Süki Herod-e Tur mu Sidon themiako gei puo nei mo phi baya. Süla uko keze puo chü di vor; kediu zhübou kezhau Blasta rüchülieketa sie, ukoe kediu kijü nunu kecükekrieko ngulieyakezha la, puo ki vitho chata.

21Siro zha chiekeshü puo nhie Herod puo kedi pfheneiko selie di kedibau gei balie, sidi themiako ki die pushü. 22Sitse themiakoe te mo shiekhoui di “Themia monyü terhuomia pfhete,” isi bata. 23Derei puo Ukepenuopfü tshe mokecü la Niepuu dieliemia puo thuo vapuonu Herod kepfhüshü, sidi zochü bu puo cü khriwa.

24Derei Ukepenuopfü dieu we kezazhü zo mu puo kezemia kra miemielieta. 25Süsie Barnaba mu Saul unie mhatho chü tseiwa di Johan, Mark ükezhau zelie di, Jerusalem nu la vorta.

Currently Selected:

Mhakechüko 12: ANBRBSI

Highlight

Copy