Evangelijs pēc Jōņa 13

XIII.

K. Jezus mōceklim mozgoj kōjas.

1Pyrms Leldines svātkim Jezus, radzādams, ka tyvojās Jō stuņde nu pasauļa aizīt uz Tāvu, nūmīļōjis sovejūs, kas uz pasauļa beja, nūmīļōja jūs leidz golam.

2Vakareņu laikā, kad valns Judasa, Seimaņa Iskariotas dāla, sirdī beja īmetis nūdūmu Jū nūdūt, 3Jezus, zynōdams, ka Tāvs vysu ir atdevis Jō rūkōs, un ka nu Dīva izgōja un otkon īt uz Dīvu atpakaļ, 4pīsacēlis nu vakareņu, nūvylka vērsdrēbes, un, pajēmis dvīli, apsajūze. 5Tad, pīlējis bļūdā yudiņa, sōce mōceklim mozgōt kōjas un ar dvīli, ar kuru beja apsajūzis, slauceit.

6Tai Jys pīgōja pi Seimaņa Pītera. Bet tys Jam saceja: Kungs, Tu gribi maņ kōjas mozgōt? 7Jezus atsasauce un saceja: Tō, kū Es tagad doru, tu vēļ nazini, bet vēļōk saprassi. 8Pīters Jam saceja: Nā, Tu maņ kōju nikod namozgōsi! Jezus jam atbiļdēja: Jo Es tevis namozgōšu, tad tev nabyus ar Mani daļas. 9Tad Seimaņs Pīters Jam saceja: Kungs, na tikai munas kōjas, bet ari rūkas un golvu. 10Jezus tam atbiļdēja: Kas ir izamozgōjis, tam vajag tikai kōjas nūmozgōt, tad jys ir vysā teirs. Ari jyus asat teiri, tikai na visi.#13:10 Apostoli, izjamūt Judasu, beja teīri, jī beja svātdorūšōs žēlesteibas stōvūklī. Judass, sovā sirdī ļūļojūt ļaunū nūdumu — nūdūt K. Jezus, svātdorūšū žēlesteibu pazaudēja. 11Jys sovu nūdevēju zynōja un tōpēc saceja: Jyus visi teiri naasat.

12Nūmozgōjis jim kōjas un apviļcis sovas vērsdrēbes, Jys atsasāda pi golda un saceja: Vai jyus saprūtat, kū Es jums padareju? 13Jyus Mani saucat par Mōceitoju un Kungu un labi sokot, Es tadei asmu. 14Tai tad, jo Es, Kungs un Mōceitōjs, nūmozgōju jums kōjas, tad ari jums ir pīnōkums cyts cytam kōjas mozgōt.#13:14 Kōju mozgōšonā K. Jezus apostolim īteic pazemeibu. 15Es jums devu pīmāru, ka ari jyus tai dareitu, kai Es jums padareju. 16Patīši, patīši, Es jums soku: Ni kolps ir lelōks par kungu, ni syutnis par tū, kas jū syuteja. 17Jo jyus šytū saprūtat un saskaņā ar šytū dareisit, tad jyus asat svēteigi.

18Na par jums visim Es runoju. Es zynu, kū Es izlaseju; tūmār Rokstim ir jōizapylda.

Tys, kas ar Mani maizi ād,

pret Mani paceļs sovu papīdi.

K. Jezus pasoka sovu nūdevēju.

19Es jums jau tagad stōstu, koleidz tys vēļ navā nūticis, lai jyus, kad tys nūtiks, tycātu, ka Es asmu. 20Patīši, patīši, Es jums soku: Kas Munu syutni pījims, tys pījims Mani; kas Mani pījims, tys pījims Tū, kas Mani syuteja.#13:20 Judasa nūzygums ir atteicynojams tikai uz pošu Judasu, uz citim apostolim tys nav atteicynojams. Nasaskotūt uz Judasa nūdeveibu, citi apostoli ir un palīk K. Jezus syutni.

21Pēc šytūs vōrdu Jezus tyka sakustynōts gorā un aplīcynōdams saceja: Patīši, patīši, Es jums soku: Vīns nu jyusim Mani nūdūs. 22Tad mōcekli cyts uz cyta skatejōs un nazynōja, par kuru Jys dūmoj. 23Vīns nu Jō mōceklim, tys, kuru Jezus mīļōja, pīsaglaude pi Jezus kryutim. 24Seimaņs Pīters pamōve uz jū un jam saceja: Pavaicoj, kurs ir tys, par kuru Jys runoj. 25Jys nūsalīce pi Jezus kryutim un saceja: Kungs, kurs tys ir? 26Jezus atbiļdēja: Tys ir tys, kam Es īdūšu apmārcātu maizes gabaleņu. Un Jys, apmērcējis maizes gabaleņu, īdeve Judasam, Iskariotas Seimaņa dālam.#13:26 Apmārcātōs maizes gabaleņa pasnēgšona beja uzskateita kai zeime, ka tō pasnēdzējs sajēmējam atļaun nu golda ceļtīs. 27Un pēc maizes gabaleņa jamā īgōja ļaunais gors. Jezus jam saceja: Kū gribi dareit, tū dori ōtrōk.#13:27 Īgōja ļaunais gors — šōs pat nūdaļas 2. pantā ir teikts, ka ļaunais gors īmete Judasa sirdī K. Jezus nūdūšonas nūdūmu. Pēc maizes gabaleņa sajimšonas, Judass ļaunō gora kārdynōjumam pīkreit un pasadūd jō varai. 28Tūmār nivīns nu klōtasūšim nasaprota, kōpēc jam tū saceja. 29Tai kai Judass beja montzinis, tad daži dūmōja, ka Jezus grib saceit: Nūpērc, kas mums dēļ svātkim ir vajadzeigs, vai ari, ka nabogim kaut kū izdaleitu. 30Jys, tū gabaleņu apēdis, tyuleņ izgōja ōrā. Beja nakts.

K. Jezus dūd jaunu bausleibu.

31Kad jys jau beja izgōjis, Jezus saceja: Tagad Cylvāka Dāls ir uzslaveits. 32Jo Dīvs Jamā ir uzslaveits, tad ari Dīvs uzslaveis Jū Sevī, un uzslaveis Jū tyuleņ.

33Bērneni, vairs tikai mozu breidi Es pi jums asmu. Jyus Manis meklēsit, bet kū Es agrōk jūdim saceju, tū tagad soku ari jums: Kur Es eju, tur jyus aizīt navarit.#13:33 K. Jezus caur cīsšonom un krysta nōvi aizgōja uz sovu dabasu Tāvu. Apostoli reizē ar Jū īt navarēja, bet gon vēļōk aizgōja.

34Es jums dūdu jaunu bausleibu: Mīļojit vīns ūtru. Jums vīnam ūtru jōmīļoj tai, kai Es jyusus nūmīļōju. 35Jo jyus vīns ūtru mīļōsit, tad caur tū visi pazeis, ka Jyus asat Muni mōcekli.

K. Jezus īprīkš pasludynoj Pītera aizalīgšonu.

36Tad Seimaņs Pīters nu Jō vaicōja: Kungs, kur Tu īsi? Jezus atbiļdēja: Kur Es eju, tur tu pēc Manis pakaļ aizīt navari, bet vēļōk gon tu īsi pakaļ. 37Pīters Jam saceja: Kungs, kōpēc tagad pat es navaru Tev pakaļ īt? Es Tevis dēļ atdūšu sovu dzeiveibu.

38Jezus jam atbiļdēja: Par Mani tu gribi atdūt sovu dzeiveibu? Patīši, patīši, Es tev soku: Pyrms na kai gaiļs aizdzīdōs, tu Manis trejskōrteigi aizalīgsi.

Currently Selected:

Evangelijs pēc Jōņa 13: LGT

Highlight

Copy