I vēstule korintīšim 6

VI.

Nasatīsōt pogōnu prīškā.

1Un kai tad tys nu jums, kam ir kaida syudzeiba pret ūtru, īsadrūšynoj taisneibas meklēt pi nataisneigajim, bet nameklej tōs pi svātajim?#6:1 nataisneigajim — pogōnim.#6:1 svātajim — kristticeigajim. 2Vai tad jyus nazynot, ka svātī tīsōs pasauli? Un jo jyus tīsōsit pasauli, kai tad jyus naasot cīneigi iztīsōt pavysam mozas lītas? 3Vai tad jyus nazynot, ka mes tīsōsim pat engeļus? — Un tū vairōk ikdīniškōs lītas. 4Jo jums ir syudzeiba par ikdīniškōs dzeives lītom, tad nu draudzes īcelit par tīsnešim tūs, kas ir pasmōdejami. 5Šytū es jums soku, lai jyusus aizkaunatu. Vai tad pi jums nava nivīna gudra, kuru varātu īceļt storp brōlim par tīsnesi? 6Nē, brōļs tīsojās ar brōli un klōt pi tō veļ naticeigūs prīškā!

7Vyspōri deļ jums tys ir pazamynōjums, ka vīns ar ūtru streidatēs. Kōpēc jyus nataisneibas napacīšat? 8Jā, jyus poši dorat nataisneibu un pōresteibu cytim, pat brōlim. 9Vai tad jyus nazynot, ka nataisneigī Dīva vaļsteibas naīmontōs? Poši sevis namaldynojit! Ni bezkauneigī, ni elku kolpi, ni lauleibas lauzēji, ni baudkōreigī, ni izvyrtuļi, 10ni zagli, ni montkōreigī, ni dzārōji, ni saimōtōji, ni laupeitōji Dīva vaļsteibas naīmontōs! 11Un taidi beja daži nu jums; tagad tūmār jyus asat nūteireiti, jyus asat svātdareiti, jyus asat attaisnōti caur (myusu) Dīva Goru myusu Kunga Jezus Kristus vōrdā.

Jōizasorgoj nu grākim.

12Man atļauts ir vyss, bet na vyss ir nudereigs. Man atļauts ir vyss, bet es naļaušu, ka mani kas kalpynōtu.#6:12 vyss, kas ar lykumu nav nūlīgts. 13Ēdīņi ir deļ mōgas un mōga deļ ēdīņim, bet Dīvs reizi iznycynōs obejus. Mīsa, turpretim, nav deļ bezkauneibas, bet gon deļ Kunga un Kungs deļ mīsas. 14Dīvs pīcēle nu myrūnim Kungu un caur sovu spāku Jys arī myusus pīceļs. 15Vai tad jyus nazynot, ka jyusu mīsas ir Kristus lūcekļi? Un vai tad es dreikstu jimt Kristus lūcekļus un padareit jūs par palaidneibas lūcekļim? — Nikod nē! 16Vai tad jyus nazynat, ka tys, kas ar palaidni saīt, ar jū ir vīna mīsa? Ir saceits: Jī obi divi byus vīna mīsa. 17Bet tys, kas ir vīnōts ar Kungu (ar Jū) ir vīns gors. 18Sorgojitēs nu bezkauneibas! Ikvins cyts grāks, kū cylvāks padora, palīk ōrpus mīsas, bet kas dora naceisteibu, tys grākoj pret sovu mīsu. 19Vai tad jyus nazynot, ka jyusu mīsa ir jyusūs mytūšō Svātō Gora, kū sajēmet nu Dīva, svētneica un ka jyus poši sev napīdarat? 20Jyus asot atpērkti ar dōrgu moksu. Tai tad, sovā mīsā slavejit (un paturit) Dīvu.#6:20 dōrgu moksu — ar Kunga Jezus Kristus asni.

Currently Selected:

I vēstule korintīšim 6: LGT

Highlight

Copy