Nugana 27

‘UPWA 27.

1Ta gete ‘i apwesa, ni‘atu Isaako ‘i e tai sinabwa, ta matana ‘i umauma, ta ‘enega nigea ‘i da ‘ita kapekapeana, ga natuna tomatua Esau ‘i bwauiena, ta ‘ena ‘i ona, Natugu: ta ‘i ona ‘enaia, ‘Abo‘agu. 2Ta ‘i gwae, Gete ‘enega u ‘ita, ‘abo‘agu ia e tai sinabwa, ‘igu mwawasa ‘ana ‘asiata nigea ia mwaratoni. 3Gete ‘enega ia sideio, ‘imu ‘ebeunuunu, ‘imu gita ta ‘imu tupu, ‘u da ‘ewa, ta mitawaia ‘u da tauia, ta ‘agu esio ‘u da ‘ewa; 4ta masura maina bobo‘ana ‘eguia ‘u da bubuna, nadigega nuagu i ‘ewena, ta ‘eguia ‘u da me‘ena, be ia da ‘e‘ai; be ‘enega iaruiaruagu ‘i da onaobobomeio nugana ga muriega ia da mwawasa. 5Ta ‘ena Isaako ‘i onaona natuna Esau ‘enaia Rebeka ‘i nonona. Ta Esau ‘i tauia mitawaia sabi ‘ai iobai esio manuna, be ‘i da me‘ena. 6Ta Rebeka natuna Iakobo ‘ena ‘i ona, ‘i gwae, U ‘ita, tamaio ia nonona tasio Esau ‘ena ‘i ona, ‘i gwae, 7Esio ‘eguia ‘u da me‘ei ta masura maina bobo‘ana ‘eguia ‘u da bubuna, be ‘enega ia da ‘ai, ta Ieoba matanaia ia da onaobobomeio ‘igu mwawasa nuganinaia. 8‘Enega gete tuga, natugu, ‘enagu ‘u da nono na‘ieana iage ia eonaio. 9Gete tuga iau ‘ena ‘u da tauia, ta gote ‘enega gota menonoiadi ‘e rua bobo‘adi ‘eguia ‘u da ‘ewedima; ta tamaio manuna masura maina bobo‘ana ‘ediega ia da bubuna, nadigega nuana i ‘ewena: 10ta tamaio ‘ena ‘u da me‘ena, be ‘enega ‘i da ‘e‘ai, be ‘enega ‘ina mwawasa nuganinaia ‘i da onaobobomeio. 11Ta Iakobo sinana Rebeka ‘ena ‘i ona, U ‘ita, Tasigu Esau tai bwarana maunuununa, ta ‘abo‘agu bwaragu ‘i nonokwaikwaina. 12‘Abona nai tamagu ‘i da gitoogu, ta ‘abo‘agu ‘atua to kabo ‘enaia; ta ‘eguia elia ia da me‘ena, ta nigea onaoboboma. 13Ta sinana ‘ena ‘i ona, ‘Amu elia ‘eguia ‘i da mai, natugu: ‘enagu ‘u da ematamatana tuga, ta ‘u da tauia be ‘eguia ‘u da ‘ewedima. 14Ta ‘i tauia, ta i ‘ewedi, ta sinana ‘ena ‘i me‘edi: ta sinana masura maina bobo‘ana ‘i bubuna, nadigega tamana nuana i ‘ewena. 15Ta Rebeka natuna me sinabwana Esau ‘ana ‘oama bobo‘adi i ‘ewedi, taudi ma‘ieana anuaia si miamiana, ta natuna me goamana Iakobo ‘ediega i ‘otena: 16ta gota menonoiadi bwaradi nimanaia, ta ‘otona nonokwaikwaina ‘enaia, ‘i sa‘udi: 17ta masura maina bobo‘ana ta palaua, taudi ‘i bubuna, natuna Iakobo nimanaia i ‘ebwaena. 18Ta tamana ‘ena ‘i mai, ta ‘i ona, Tamagu: ta ‘i gwae, ‘Abo‘agu; iaita ‘oio, natugu? 19Ta Iakobo tamana ‘ena ‘i ona; ‘Abo‘agu Esau ‘imu tomatua; ni‘atu ia guinua nadigega ‘u eonegu: ia sideio, ‘u da tooro, ‘u da miatoa be ‘igu esio ‘u da ‘ani, be ‘enega iaruiaruaio ‘i da onaobobomegu. 20Ta Isaako natuna ‘ena ‘i ona. Natugu, mwa‘adega ‘u loba maninina nadigega? Ta ‘i ona, Ieoba ‘imu Eaubada ‘i leme‘ai‘iligu. 21Ta Isaako Iakobo ‘ena ‘i ona, Ia sideio, ‘U da mai serabeguia, be ia da gitooio, natugu, nai ‘oio natu‘ai‘ailigu Esau nai nigea. 22Ta Iakobo tamana Isaako ‘ena ‘i doro serabenaia; ta ‘i gitoona, ta ‘i ona, ‘Enana Iakobo ‘enana, ta nimana Esau nimana. 23Ta nigea ‘i mwaratonina, nimana maunuununa ta ‘enega, na‘ieana tasina Esau nimana: ta ‘enega ‘i onaobobomena. 24Ta ‘i ona, ‘Oio natu‘ai‘ailigu Esau? Ta ‘i ona, ‘Abo‘agu tauna. 25Ta ‘i ona, Serabeguia ‘u da me‘ena, ta natugu ‘ina esio ‘enega ia da ‘e‘ai, be ‘enega iaruiaruagu ‘i da onaobobomeio. Ta ‘i me‘ena serabenaia ta i ‘e‘ai: ta oine ‘i me‘ena ta ‘i numa. 26Ta tamana Isaako ‘ena ‘i ona, Gete ‘enega ‘u da mai serabeguia, ta ‘u da ‘awamuigu, natugu. 27Ta ‘i mai serabenaia, ta i ‘awamuina: ta ‘ana ‘oama maina ‘i muina, ta ‘i onaobobomena, ta ‘i ona,

Wa ‘ita, natugu maina

‘Atua mitawa Ieoba ‘i onaobobomena maina:

28Ta garewa ‘ina gagunega Eaubada ‘i da ‘ebwaemu,

Ta bare‘u ‘ana iapega,

Ta witi ta oine iauna:

29Tomota emuia si da guinua,

Ta ‘asa ‘emuia si da bwagobwago:

Tasimuao ‘edia ‘u da e ‘inapwana,

Ta sinaio natunao me‘olotodi ‘emuia si da bwagobwago:

Iauiauna ‘i eliemu si da eliena,

Ta iauiauna ‘i onaobobomeio si da onaobobomena.

30Ta gete ‘i apwesa, ni‘atu Isaako Iakobo ‘i onaoboboma saronina, ta Iakobo tamana Isaako matanega ‘i apweapwesa, ga tasina Esau ‘ina ulatupuiega ‘i ruguma. 31Ta tauna wate masura maina bobo‘ana ‘i bubuna, ta tamana ‘ena ‘i me‘ena; ta ‘i ona tamana ‘ena, Tamagu ‘i da tooro, ta natuna, ‘ina esio ‘enega ‘i da ‘e‘ai, be ‘enega iaruiaruaio ‘i da onaobobomegu. 32Ta tamana Isaako ‘i ona ‘enaia, Iaita ‘oio? Ta ‘i ona, Abo‘agu natuio me‘olotona, ‘imu tomatua, Esau. 33Ta Isaako ‘i dededera sinabwana, ta ‘i gwae, Ga iaita tauna esio ni‘atu i ‘ewa, ta ‘eguia ‘i me‘ena, ta iauna ‘enega ia ‘e‘a nugana ta muriega ‘u mai, ta ni‘atu ia onaobobomena? tamo, ta onaoboboma ‘i da loba. 34Ni‘atu Esau tamana ‘ina ona ‘i nonodi, ga dedoi to sinabwa sana ta darerena ‘enega ‘i dedoi, ta tamana ‘ena ‘i ona, Tamagu ie, ‘u da onaobobomegu, ‘abo‘agu wate. 35Ta ‘i ona, Tasio kaboega ‘i mai, ta ‘amu onaoboboma ni‘atu i ‘ewena. 36Ta ‘i ona, nigea nai ‘ana esana ‘ai‘aila Iakobo? tuta ‘e rua getedi i kaboegu: ‘igu tomatua i ‘ewena; ta, wa ‘ita, gete ‘enega ‘agu onaoboboma ni‘atu i ‘ewena. Ta ‘i gwae, Nigea nai ‘e bweu onaoboboma ‘u egagare manugu? 37Ta Isaako ‘i onalimana ta Esau ‘ena ‘i ona, U ‘ita, ni‘atu ia bubuna be ‘i da e ‘imu ‘inapwana, ta tasinao iauiaudi ia ‘ebwaea‘edi ‘ena toguinuao manuna; ta witi ta oine ‘ediega ia lemena: ga to‘ase ia da guinua manuio, natugu? 38Ta Esau tamana ena ‘i ona, Onaoboboma ‘e bweuna tuga ‘emuia, tamagu? Tamagu ie, ‘u da onaobobomegu, ‘Abo‘agu wate. Ta Esau ‘i bwau, ta ‘i dedoi. 39Ta tamana Isaako ‘i onalimana ta ‘ena ‘i gwae,

U ‘ita, bare‘u ‘ina iapa ‘enega ‘imu anua ‘i da miami,

Ta garewa etanega ‘ina gaguna ‘enega;

40Ta ‘imu sisi‐saiega iawasio ‘i da bobo‘ana, ta tasio ‘ena ‘u da guinua;

Ta gete ‘i da apwesa ‘ena ‘u da ‘upwa iaulei,

Ga ‘ina ‘ebe‘a‘ara ‘u da ‘ewaiaulei ‘otomuiega.

41Ta Esau nuana ‘i to‘umalina Iakobo ‘enaia onaoboboma ‘enega tamana ‘i onaonaobobomena manuna: ta Esau ‘atenega ‘i ona, ‘Asiata ‘ewabamu tamagu manuna ‘i abe; ga tasigu Iakobo ia da loemwawasina. 42Ta natuna me sinabwana Esau ‘ina ona Rebeka ‘ena si simanena; ta i ‘etune ta natuna me goamana Iakobo ‘i bwauiena, ta ‘ena ‘i ona, U ‘ita, tasio Esau, manuio, ‘atena ‘i giepa‘arina, ‘aene ‘i da loemwawasio. 43‘Enega gete tuga, natugu, ‘enagu ‘ena ‘u da ematamatana; ta ‘u da tooro, nuugu Labana ‘ena ‘u da dena Arana ‘enaia; 44ta asiata ‘aina ‘ena ‘u da miami, ga tasio ‘ina egamwagamwagu ‘i da ‘ilawa bemi; 45Ga tasio ‘ina gamwasoara ‘emuiega i ‘ilawa, ta iage ‘ena ‘u guinuena ‘i da nuapupure: ga ia da ‘etune, ta gote ‘enega ia da ‘au‘ewemumo: to‘ase manuna ‘asiata ‘e bweunega ia da loseemi ruarua?

46Ta Rebeka ‘i ona Isaako ‘enaia, ‘Abo‘agu Eta natunao me wainedi manudi ia lo‘ame‘ame: ‘abo Iakobo Eta natunao ‘ediega mwanena i ‘ewena, getedi nadigega, ‘asa natunao me wainedi ‘ediega, iawasigu to‘ase ‘ana bobo‘ana ‘eguia?

Currently Selected:

Nugana 27: DOBOT

Highlight

Copy