Nugana 26

‘UPWA 26.

1Ta ‘asa nina botana ‘i apwesa, lowa wate ‘e bweu gimi botana Aberaamo ‘ina tuta. Ta Isaako Abimeleka me Pilisitia ‘idi king ‘ena ‘i tauia Gerara ‘enaia. 2Ta Ieoba ‘i apwesa ‘enaia, ta ‘i gwae, Gea‘abo ‘u da mwa‘umwa‘uta Aigupito ‘enaia; ‘asa nina manuna ia da simana ‘emuia ‘ena ‘u da miami: 3‘asa gete ‘ena ‘u da mia, ta abo‘agu ma‘ieaio, ta ia da onaobobomeio; ‘emuia ta ‘enega, ta tubumuao ‘edia, ‘asa iauiauna getedi ia da ‘ebwaea‘edi, ta ‘ona‘upa‘upa tauna tamaio Aberaamo ‘ena ia ona‘upa‘upa ia da giepa‘ari; 4ta tubumuao ia da gieiau ‘atua garewa ‘ina kwadimao, ta ‘asa iauiauna getedi tubumuao ‘edia ia da ‘ebwaeaedi; ta tubuio ‘enega bare‘u ‘ina ‘asa iauiauna si da bobo‘ana; 5Aberaamo ‘enagu ‘ena ‘i ematamatana ta ‘enega, ta ‘igu ematarua be, ‘igu ona be, ‘igu aseiana be, ‘igu loina be, i ‘ita‘i‘isidi. 6Ta Isaako Gerara ‘ena ‘i miami: 7ta tai toni ‘asa mwanena manuna si eonena; ta ‘i gwae, Tauna nuugu: ‘i matauta be ‘i da gwae, Mwanegu, ta ‘enega; nai, ‘i ona, tai toni ‘asa si da unugu Rebeka manuna: sinesinebwainina ta ‘enega. 8Ta gete ‘i apwesa, ni‘atu tuta dudurana ‘ena ‘i miami, ga Abimeleka me Pilisitia ‘idi king ‘awega i ‘ita apwesa, ta i ‘itena, ta, wa ‘ita, Isaako i ‘eeguausoara mwanena Rebeka ma‘ieana. 9Ta Abimeleka Isaako ‘i bwauiena, ta ‘i gwae, U ‘ita, mwane‘ai‘ailio tauna: ta mwa‘adega ‘u ona, Tauna nuugu? Ta Isaako ‘i ona ‘enaia, Ia ona ta ‘enega, Nai manuna ia da mwawasa. 10Ta Abimeleka ‘i gwae, To‘ase gete ‘u guinua ni‘atu ‘emaia? tomota ‘ediega ‘e bweu nai ‘i da ‘eno mwaneio ma‘ieana, ta to‘umalina arena ‘u da me‘ena ‘emaia. 11Ta Abimeleka tomota iauiauna ‘i emataruedi, ‘i ona, Tauna tai gete nai mwanena ‘i gitoona ‘i da mwawasa ‘ai‘aila. 12Ta Isaako ‘asa gote ‘ena ‘i lelewana, ta iakwara gote ‘ana sinabwa iau e anaredi ‘i lobena: ta Ieoba ‘i onaobobomena. 13Ta tai nina ‘i sinabwa, ta ‘i sinabwawate‐wawasae ga ‘i tosinabwasana: 14ta ma‘ina sipi iau, ta ma‘ina bulomakau iau, ta tomia anua iauiaudi: ta me Pilisitia si e‘ipi‘ipi manuna. 15Ta wewerupwa iauiauna tamana ‘ina to‐guinuao si saledi tamana Aberaamo ‘ina tutega, me Pilisitia si ‘aubodedi, ta bare‘uiega si siudi. 16Ta Abimeleka Isaako ‘ena ‘i ona, ‘Emega ‘u da tauia; ‘oio toewaiwai sana ‘emaia ta ‘enega. 17Ta gote ‘enega Isaako ‘i tauia, ta abatau Gerara ‘ena i ‘abi anua, ta ‘ena ‘i miami. 18Ta Isaako boasi wewerupwa i ‘esala limedi, taudi si salena tamana Aberaamo ‘ina tutega; Aberaamo ‘ina mwawasa murinaia me Pilisitia si e ‘aubodedi ta ‘enega: ta ‘i eesedi ‘atua ‘adi esana ‘ediega tamana ‘i eesedi. 19Ta Isaako ‘ina to‐guinuao abatau ‘ena si sala, ta wewerupwa boasi ‘i ‘apwa‘apwaiama si lobena. 20Ta me Gerara to ‘ita‘i‘isi‐bulomakau ma‘ediao si losaia, si gwae, Boasi nina ‘ima boasi: ta wewerupwa nina ‘i eesena Eseka; ma‘enao si ‘eupwa ta ‘enega. 21Ta wate ‘e bweu wewerupwa si salena, ta gote wate manuna si losaia: ta ‘i eesena Sitenaa. 22Ta gote ‘enega ‘i logara, ta wate ‘e bweu wewerupwa ‘i salena; ta gote manuna nigea si e‘upwa: ta si eesena Reobota; ta ‘i gwae, Gete tuga Ieoba ‘ida ‘ebemia ‘i bubuna, be ta da losiwa ‘asa ‘enaia. 23Ta gote ‘enega ‘i tu‘e Beeri‐seba ‘enaia. 24Ta boiboi nina Ieoba ‘i apwesa ‘enaia, ta ‘i gwae, ‘Abo‘agu tamaio Aberaamo ‘ina Eaubada: gea‘abo ‘u matauta, ‘abo‘agu ma‘ieaio ta ‘enega, ta ia da onaobobomeio, ta tubumuao ia da gieiau ‘igu to‐guinua Aberaamo manuna. 25Ta ‘ebetaria i ‘abina ‘enaia, ta Ieoba ‘ana esana i ‘inanena, ta ‘ina anua i ‘abina ‘enaia: ta Isaako ‘ina toguinuao wewerupwa ‘ena si salena. 26Ga Abimeleka Gerarega ‘ena ‘i tauia, gosiana Ausata ta, Pikola ‘ina boda ‘idi tonugana ta. 27Ta Isaako ‘i eonedi, To‘ase manuna wa mai ‘eguia, nuami ‘i to‘umalina ‘eguia ta ‘enega, ta ‘emiega wa ‘etunegu? 28Ta si ona, A ‘ita ‘ai‘aila Ieoba ma‘ieaio: ta ‘a ona, Gete tuga ona‘upa‘upa ‘edaia ‘i da miami, ‘abo‘ama ta ‘oio gamwagamwanidaia, ta ona‘upa‘upa ‘a da bubuna ma‘ieaio; 29‘Aene gea‘abo to‘umalina ‘e bweu ‘u da guinua ‘emaia, na‘ieana nigea ‘e bweu to‘umalina ‘emuia ‘a guiguinue, ta na‘ieana bubuna bobo‘ananamo ‘emuia ‘a guinuena, ta a ‘etunemu guguiega: ‘oio gete tuga Ieoba oboobobomina. 30Ta sagari ‘i sa‘u ‘edia, ta si ‘e‘ai ta si numa. 31Ta gonagonaia si tooro, ta ‘e bweuna ‘ebweuna ‘ena si ona‘upa‘upa: ta Isaako i ‘etunedi, ta guguiega si pilisinena. 32Ta tauna ‘asiata nina gete ‘i apwesa, Isaako ‘ina toguinuao si mai, ta wewerupwa ni‘atu si salena manuna ‘ena si simana, ta si eonena, Ni‘atu boasi ‘a lobena. 33Ta ‘i eesena Siba: ‘enega ‘asa nina ‘ana esana Beeri‐seba ga batua.

34Ta Esau ‘ena ‘ana iakwara ‘e poti ga Iudita Beeri goma Eta natuna, ta Basemata Elona goma Eta natuna ‘i aidi: 35ta siterua ‘ebenuadarere Isaako ‘ena ta Rebeka ‘ena.

Currently Selected:

Nugana 26: DOBOT

Highlight

Copy