Nugana 25

‘UPWA 25.

1Ta Aberaamo wate ‘e bweu waine ‘i aina, ta ‘ana esana Ketura. 2Ta waine nina Simarana ‘ena ‘i enatunena, Iokisana ta, Medana ta, Midiana ta, Isibaka ta, Sua ta. 3Ta Iokisana natunao Seba, ta Dedana. Ta Dedana natunao Asurima ta, Letusima ta, Leumima ta. 4Ta Midiana natunao; Epa ta, Eperi ta, Anoka ta, Abida ta, Elidaa ta. Iauiaudi getedi Ketura natunao. 5Ta Aberaamo ‘ina iage iauiauna Isaako ‘ena i ‘ebwaeaena. 6Ta mwanenao me gidaridi natudiao, taudi Aberaamo i ‘ewedi, Aberaamo ‘ebwaeadaita i ‘ebwa‘ebwaedi; ta natuna Isaako ‘enega i ‘etunediwa, ‘ena ‘i miami, bomatu ‘ena, ‘asa bomatu ‘enaia. 7Ta getedi Aberaamo iawasina ‘ana iakwara ‘adi ‘asiata ‘ediega ‘i miami, iakwara ‘e wan anaredi ta sikisiti ta pipitini. 8Ta Aberaamo iaruiaruana ‘i apwesa, ta iawasina dudurana ‘enega ‘i mwawasa, ‘ina‘inapwanina, ga sawesawenaia; ta ‘ina tomota ‘edia ‘i miaegogona. 9Ta natunao Isaako ta Isimaela gaula Makipela ‘ena si sa‘una, Eperona Soaa goma Eta natuna ‘ina tanoa ‘enaia, tauna Mamire matanaia; 10tauna tanoa nina Aberaamo ‘i lagwena Eta natunao ‘ediega: gote ‘ena Aberaamo si sa‘una, ta mwanena Sara. 11Ta Aberaamo ‘ina mwawasa murinaia, ga Eaubada natuna Isaako ‘i onaobobomena; ta Isaako ‘i miami Beeri‐laai‐roi ‘enaia.

12Ta getedi Isimaela ‘ina ‘ebetubua, Aberaamo natuna, tauna Agari kena Aigupito, Sara ‘ina toguinua me wainena, Aberaamo ‘ena ‘i enatunena: 13ta getedi Isimaela natunao me‘olotodi ‘adi esana, ‘adi esanega, ‘idi ‘ebetubua ‘atua: Isimaela ‘ina tomatua, Nebaiota; Kedara ta, Adibeela ta, Mibisama ta. 14Misima ta, Duma ta, Masa ta; 15Adada ta, Tema ta, Ietura ta, Napisi ta, Kedema ta: 16getedi Isimaela natunao, ta getedi ‘adi esana, ‘idi ‘asa ‘ediega, ta ‘idi ‘ebemia ‘ediega; ‘inapwanao ‘e twelu ‘idi ‘asa nadigega. 17Ta getedi Isimaela iawasina ‘ana iakwarao, iakwara ‘e wan anaredi ta tati ta sebeni: ta iaruiaruana ‘i apwesa ta ‘i mwawasa; ta ‘ina tomota ‘edia ‘i miaegogona. 18Ta Abilaega si miami ga Sura ‘enaia tauna Aigupito matanaia, na‘ieana ‘u tautauia ga Asiria ‘enaia: tasinao iauiaudi matadia ‘i miami.

19Ta getedi Isaako, Aberaamo natuna, ‘ina ‘ebetubua: Aberaamo natuna Isaako: 20ta Isaako ‘ana iakwara ‘e poti ga Rebeka ‘i aina, tauna Betuela goma Siria me Padanarama natuna, Labana goma Siria nuuna. 21Ta Isaako Ieoba ‘ena i ‘awanoi mwanena manuna, megagarina ta ‘enega: ta Ieoba ‘ina ‘awanoi ‘i nonona, ta mwanena Rebeka i ‘euwana. 22Ta gogama si e‘upwa gamwanaia; ta ‘i gwae, ‘Abo bubuna nina, to‘ase manuna ‘abo‘agu nadigega? Ta ‘i tauia sabi eona Ieoba ‘enaia. 23Ta Ieoba ‘ena ‘i ona,

Gamwamuia ‘asa ‘e rua ‘ena si miami,

Ta diamuiega susu‐tomotai e rua si da weara tuga:

Ta susu‐tomota ‘e bweuna si da ewaiwai susu ‘e ruena ‘enaia;

Ta tomatua ‘i da guinua me goamana ‘ena.

24Ta ni‘atu ‘ina tuta be i ‘edadama saba, ga wa ‘ita, didiruarua gamwana ‘enaia. 25Ta ‘e bweu ‘i gimi apwesama bweabwearina, maibo‘ana ‘atua ‘oama manuaunuununa; ta si eesena Esau. 26Ta murinega tasina ‘i apwesama, ta nimanega Esau ‘ae‘edu‘edunaia i ‘abi; ta si eesena Iakobo: ta Isaako ‘ana iakwarao ‘e tomo toi ‘ena mwanena ‘i enatunedi. 27Ta gogama me‘olotodi nidi si sinabwa: ta Esau to tore ‘ai‘aila, tai goma mitawina; ta Iakobo tai manuaena, anua ‘edia ‘i miami. 28Ta Isaako Esau ‘i obobomena, ‘ina ‘e‘ai toreiega ‘enega i ‘e‘ai manuna: ta Rebeka Iakobo ‘i obobomena. 29Ta Iakobo lenitile i ‘eureni: ta Esau ‘i ruguma mitawega, ta ‘i emwaro‐mwarowa: 30Ta Esau Iakobo ‘ena ‘i ona, Ia sideio, ‘u da ‘e‘enigu lenitile bweabwearina tauna gote ‘enega; ia mwawamwawasa ta ‘enega: ta ‘enega si eesena Edoma. 31Ta Iakobo ‘i gwae, ‘Imu tomatua batua ‘eguia ‘u da gimwaneie. 32Ta Esau ‘i gwae, U ‘ita, ‘i abe ia mwamwawasa: ta tomatua nina to‘ase ‘ana bobo‘ana ‘eguia? 33Ta Iakobo ‘i gwae, Batua ‘eguia ‘u da ona‘upa‘upa; ta ‘i ona‘upa‘upa ‘enaia: ta ‘ina tomatua ‘i gimwaneiena Iakobo ‘enaia. 34Ta Iakobo palaua ta lenitile ‘eureni Esau ‘ena i ‘ebwaena; ta i ‘e‘ai ta ‘i numa, ta ‘i tooro, ta ‘i tauia: nadigega Esau ‘ina tomatua ‘i sinarina.

Currently Selected:

Nugana 25: DOBOT

Highlight

Copy