Markos 16

O Jesus ustel katar o meripe

Mt 28.1-10; Lk 24.1-12; Jn 20.1-10

1Kana peli e riat ta nakhlo o sabado, e Maria Magdalena, e Maria e dei e Santiagoki ta e Salome, chinde merisura te thoven pe esnaga e Jesuseki. 2Thiarinako rano kana pharrona e zore katar o purvo llive katar e efta, llele kai o limori. 3Ta phenena iek averiake:

¿Ko ka ikanel o barr katar o udar e limoreko?

4A kana dikhle, thode sama kai gua barr kai saia but baro, ni saia pe po than. 5Ta kana die ando limori dikhle, kai pe rig e chachi besela iek lleno terno kai saia furiado ande patave parrne ta lunge. Ta e diskinie daraile, 6a gua lleno phenda lenge:

Na daran. Tumen roden e Jesuse katar o Nazaret, gole kai krustosarde le. Vou ustilo katar o meripe ta inai talo kate. Dikhen o than kai thode le. 7Llan ta phenen leke disipulonenge ta e Pedroke kai o Jesus llal ande Galilea te chidel tumen pale. Ta kote ka dikhen le, isto gia sar phenda tumenge.#Mt 26.32; Mk 14.28.

8Ondaka e diskinie nasle katar o limori, soke izdrana daratar. Ta ni phende niso nikake, soke darana.

E Maria Magdalena dikhel e Jesuse

Jn 20.11-18

9Kana o Jesus ustilo katar o meripe thiarinako rano ando purvo llive katar e efta, mai anglal sikadilo e Mariake e Magdalena, kai tradiaia latar efta llavolonen. 10Voi avili kai e disipulura ta von rovena soke o Jesus muloa, a voi phenda lenge kai o Jesus saia llundo. 11Kana von asunde kai o Jesus zivila ta kai voi dikhla le, ni pachaie la.

Dui disipulura dikhen e Jesuse

Lk 24.13-35

12Mapalal o Jesus sikadilo duie disipulonenge kai phirena karing e droma. 13Gala dui disipulura llele ta phende ogolenge, a ni len ni pachaie. 14Mapalal, o Jesus sikadilo e desuiekhe disipulonenge, kana von besena pe sinia. Vou dia pe lende soke ni saia len pachape ta ni kandena, soke ni pachaie golen kai dikhlea le kana ustilo katar o meripe. 15Ta phenda lenge:#Ech 1.9-11.

Llan ande sa e phuvia ta phenen saurrenge e lachi viasta. 16Gua kai ka pachal ta ka avel kristime ka avel braduime, a gua kai ni ka pachal, ni ka avel braduime. 17Ta gola llene kai ka pachan ka cheren bare ezgode ande mo anav, ka traden e llavolonen, ka den orba ande neve chibia, 18ka istaren ande pe va e sapen, ta te piena vareso kai sai mundarel len, ni ka cherel lenge niso, ka thoven pe va pe nasuale ta e nasuale ka saston.

O Jesus llaltar ando miloso

Lk 24.50-53

19A kana o Gazda o Jesus dia lenchar orba, avilo vazdino ando miloso ta beslo pe rig e chachi e Devleki.#Ech 1.9-11. 20Von llele te phenen e lachi viasta pe suako rig, ta o Gazda pomozila len e bare ezgodenchar Devlikane kai cherena.

Currently Selected:

Markos 16: BACHRO

Highlight

Copy