Markos 15

O Jesus angla o Pilato

Mt 27.1-2,11-14; Lk 23.1-5; Jn 18.28-38

1Thiarinako rano chidinaili e mai bari kris kai sea e gazda e poponenge, e phure, ta e kovacha e zakonoke, ta inllarde e Jesuse phanglo ta die le kai o Pilato. 2O Pilato puchla le:

¿San tu o Charo e judionengo?

O Jesus phenda leke:

Tu phendanle.

3A e gazda e zakonoke dosarena le katar but ezgode, 4O Pilato pale puchla le:

¿Ni phene niso? Dik pe gachin orbe ikanen pe tute.

5A sar o Jesus ni phenda leke niso, o Pilato chudisailo.

Chinade e Jesuseke o meripe

Mt 27.15-31; Lk 23.13-25; Jn 18.38—19.16

6Pe suako Paskua, o Pilato mukliarela iekhe phangle, gole kai o foro mangela. 7Ondaka saia phanglo iek lleno kai ikhardola Barrabas, vou saia phanglo ande rubie avere llenenchar soke mundardea iekhe llene kana mardepe cheres e murzania kai saia len pe sudura rromanura. 8Avile e llene kai o Pilato ta thode te mangen letar te cherel isto gia sar cherela suako burs. 9A o Pilato phenda lenge:

¿Mangen te mukliarav e Charo e judionengo?

10Soke vou acharela kai cheres e murzania kai saia len po Jesus dieale lete. 11A e gazda e zakonoke divosarde e llenen te sai mangen te mukliaren e Barrabase. 12O Pilato pucha len:

¿A so mangen te cherav gale llenea kai tumen phenen leke o Charo e judionengo?

13Von phende leke urkindo:

¡Krustosaren le!

14O Pilato phenda lenge:

¿Savo bilachipe cherda?

A von pale urkisarde:

¡Krustosaren le!

15Ondaka o Pilato, sar mangela te achel lacho e llenenchar, mukliarda e Barrabase ta bichalda te maren e Jesuse e bichoia, ta mapalal diale te krustosaren le.

16Ondaka e boñikura inllarde e Jesuse ande chereki bar kai ikhardol pretorio, ta chidie sa e boñikonen. 17Ta thode pe lete iek chiti lolo, khuvde iek korona e karrnenchar ta thodela pe leko soro. 18Mapalal thode te urkin:

¡Te avel bajtalo o Charo e judionengo!

19Chalavena le ando soro iekhe kastea, chungardena le, dena changa angla le, ta i dena tenemava. 20Ta kana marde letar espurnia ikande letar o chiti lolo, ta thode pe lete isto leke patave ta inllarde le avri te krustosaren le.

Krustosaren e Jesuse

Mt 27.32-44; Lk 23.26-43; Jn 19.17-27

21Iek lleno katar o Sirene, kai ikhardola Simono, o dad e Alejandroko ta e Rufoko, kai avela katar e droma. Kana nakhela kotar, thode le pe zor te inllarel o krusto e Jesuseko.#Ro 16.13.

22Inllarde e Jesuse pe iek than kai ikhardol Golgota kai gua si:

O than e kokalengo. 23Ta dena le te piel mol ta e mirra amime, a o Jesus ni pila 24Ondaka krustosarde le. Ta e boñikura fulade maskar pete leke patave, ta chelenape te dikhen ko ka achel leke patavenchar.#Sal 22.18.

25Saia ande inia e thiarinake kana krustosarde le. 26Ta thode po krusto pisime O Charo e judionengo. Soke von phenena kai goia saia leki dos. 27Ta krustosarde pasa le duie llenen kai sea kochkaria, iek pe leki chachi, ta o gua pe leko estingo.#Is 53.12. 28Ta gia cherdilo so phenel ando Pisipe kote kai phenel gia:

Ta saia llindo e bilachenchar.

29 # Mk 14.58; Jn 2.19. E llene kai nakhena kusena le, miskona po soro ta phenena:#Sal 22.7; 109.25.

¡Bre, tu kai perave o cher e Devleko ta ande trin llive vazdele pale, 30braduisar isto tu tut, ta fulie katar o krusto! 31Ta isto gia marena letar espurnia i e gazda e poponenge ta e kovacha e zakonoke. Ta phenena:

¡Braduisarda averen, a vou pe nasti braduil! 32¡Te fuliel katar o krusto gua Mesias Charo katar o Israel, te dikha ta te pacha!

Ta i gola kai sea krustome pasa le kusena le.

O meripe e Jesuseko

Mt 27.45-56; Lk 23.44-49; Jn 19.28-30

33Kana saia ande desudui e lliveseke, sa e phuv achili ando truniariko trin saiata. 34Isto ande gua saiato o Jesus urkisarda zurale, ta phenda:#Sal 22.1.

Eloi, Eloi, ¿lama sabaktani? gua si:

Devla, Devla, ¿soke muklan man?

35A Nesave llene kai sea kote, asunde le, ta phende:

Asunen, ikharel e profeta e Eliase.

36Ondaka iek lendar prastio, chingarda iek pamuko ande mol cherki, phanglala pe iek kas ta resadale kai o Jesus te piel, ta phenda:#Sal 69.21.

Muken le te dikha dal o Elias ka fuliarel le katar o krusto.

37A o Jesus urkisarda ando baro avazi, ta mulo. 38Ta o chiti kai si andre ando cher e Devleko chindilo po dopas, upral tele.#Ek 26.31-33; 2 Kr 3.14. 39Ta kana o sudo rromano kai saia angla o Jesus dikhla kai mulo, phenda:

Gava manus chachimaia saia e Devleko Chavo.

40Ta i kote sea nesave diskinie kai dikhena duratar, maskar lende saia e Maria Magdalena, e Maria e dei e Santiagoki o mai terno ta i e Joseeki, ta e Salome. 41Gala diskinie llelea pala o Jesus ta pomozisardea le kana vou saia ande Galilea. Ta i sea kote but aver diskinie kai llelea lea ando Jerusalem.#Lk 8.2-3.

Thoven e Jesuse ando limori

Mt 27.57-61; Lk 23.50-56; Jn 19.38-42

42Gua llive saia iek llive palal katar o sabado pasa e riat ta lacharena sa e ezgode soke saia pase o sabado. 43O Jose katar e Arimatea kai vou saia but glamno ande lengi kris, ta i vou adurichare la e charoina e Devleki, llelo tromanimaia kai o Pilato ta mangla e esnaga e Jesuseki. 44O Pilato, chudisailo kai gia oma muloa o Jesus, ta ikharda e sudo te puchel le gachin cherela kai muloa. 45Ta kana o sudo phenda leke, o Pilato dia e esnaga e Jesuseki kai o Jose. 46Ondaka o Jose chinda iek chiti parno, fuliarda e Jesuse katar o krusto, ta ulisarda le ando chiti. Mapalal thoda le ande iek limori kai saia anado ande iek pechina, mapalal phangla o limori iekhe barrea. 47E Maria Magdalena ta e Maria e dei e Joseeki, dikhena kai thovena le.

Currently Selected:

Markos 15: BACHRO

Highlight

Copy