Markos 14
14
Phanden e Jesuse
Mt 26.1-5; Lk 22.1-2; Jn 11.45-53
1Achena dui llive te avel e Paskua, kana jalpe o marrno kai inai le levadura. Ta e gazda e poponenge ta e kovacha e zakonoke rodena sar te phanden e Jesuse kojaimaia, ta te mundaren le.#Ek 12.1-27; Dt 16.1-8. 2Soke nesave llene phenena:
Cherale kana ka nakhel e Paskua, te na avelpe burkania maskar e llene.
Iek diskinia thovel meriso po Jesus
Mt 26.6-13; Jn 12.1-8
3O Jesus lleloia ande Betania, kai o cher e Simonoko, gua kai phenena leke o leproso. Kana beslo pe sinia, avili iek diskinia kai inllarela iek taso alabastroko pherdo meriso kai molale but, phagla o taso ta mukla te perel o meriso pe Jesuseko soro.#Lk 7.37-38. 4Nesave llene kai sea kote jolaile, ta phenena iek avereke:
¿Soke chudiniaol gava meriso? 5Sai bichindiloia pe so mol o rado iekhe burseko ta te pomozilpe gole lovenchar e llenen kai si chorre.
A von jolaile laia ta dena laki orba.
6A o Jesus phenda lenge:
Muken la. ¿Soke den la joli? Voi cherda manchar iek lachi ezgoda. 7Soke e chorre ka aven tumenchar suako llive ta sai ka pomozin len kana tumen mangena, a me ni ka avav tumenchar sa o vreme.#Dt 15.11. 8Gaia diskinia cherda sa so sai cherel, soke sigarda te thovel pe ma o meriso me limoreke. 9Chachimaia phenav tumenge kai ande varesavi phuv kana ka phenen e lachi viasta, ka den orba i katar so cherda gaia diskinia, ta gia ka denpe golli latar.
O Judas phukavel e Jesuse
Mt 26.14-16; Lk 22.3-6
10O Judas Iskariote, iek katar e desudui disipulura, llelo kai e gazda e zakonoke te phukavel e Jesuse 11Kana asunde le, veselisaile ta diele po alav kai ka den le love e Judase, ta o Judas kotar angle rodela te sai phandel e Jesuse.
E sinia e Gazdaki
Mt 26.17-29; Lk 22.7-23; Jn 13.21-30; 1 Kor 11.23-26
12O purvo llive katar e Paskua kana jalpe o marrno kai inai le levadura, ta kana mundardol o bakro katar e Paskua, e disipulura puchle e Jesuse:
¿Kai mange te chera o jape katar e Paskua?
13Ondaka bichalda duien katar pe disipulura, ta phenda lenge:
Llan ando foro. Kote ka malaven iekhe llene kai inllarel iek bure paieko. Llan pala le, 14ta kote kai ka del, phenen e lleneke kai si gazda katar gua cher, kai o Kovachi phenel gia:
¿Savi si e soba kai ka jau me disipulonenchar o jape katar e Paskua? 15Vou ka sikavel tumenge iek soba bari kai si upre ando cher, kai si lachardi. Kote cheren o jape.
16E disipulura llele ando foro. Ta malade sa sar phendaia lenge o Jesus, ta cherde o jape katar e Paskua.
17Kana peli e riat o Jesus avilo pe disipulonenchar. 18Ta kana besle pe sinia ta jana, o Jesus phenda lenge:#Sal 41.9.
Chachimaia phenav tumenge kai iek lleno tumendar, kai jal manchar, ka phukavel man.
19Von tristosaile, ta thode te puchen le iek po iek:
¿Sem me gua lleno?
20O Jesus phenda lenge:
Si iek katar e desudui kai chingarel o marrno isto ande gua charo kai me chingarav. 21O Chavo e Manuseko morabi te llal po drom kai phenel o Pisipe. A tesko goleke kai bichinel le. Mai sukar avilaia leke te na biandiloia.
22Kana jana, o Jesus lia o marrno ande pe va ta dia fala e Devle, phaglale ta diale kai pe disipulura ta phenda:
Len, gaia si mi esnaga.
23Mapalal lia iek taso, dia fala e Devle, diale lende, ta saurre pile. 24O Jesus phenda lenge:#Jer 31.31-34; Ek 24.8; Zak 9.11.
Gava si mo rat katar o nevo alav, kai chordol pala but llene te sai aven braduime. 25Chachimaia phenav tumenge kai ni ka piau ios katar so del e drak lligo ni ka avel o llive kai ka piau e nevi mol ande charoina e Devleki.
O Jesus phenel kai o Pedro ka phenel kai ni pinllarel le
Mt 26.30-35; Lk 22.31-34; Jn 13.36-38
26Kana von llilabie e salmura, lleletar kai o burdo e Maslinkengo. 27Ondaka o Jesus phenda lenge:#Zak 13.7.
Sa tumen ka jasaren tumaro pachape ande mande. Gia phenen o Pisipe:
Ka mundarav e chobano, ta e bakre ka rispinpe. 28A kana me ka ustav katar o meripe, ka chidau tumen pale ande Galilea.#Mt 28.16.
29O Pedro phenda leke:
I te jasarena sa po pachape, me ni ka jasarav le.
30O Jesus phenda leke:
Chachimaia phenav chuke kai mai anglal te basel o basno pale o duito, tu ka phene kai ni pinllare man trin droma.
31A vou pale phenela leke:
I te trubula te merav tuia, ni ka phenav kai ni pinllarav tut.
Ta saurre phenena leke isto gola alava.
O Jesus molilpe ando Getsemani
Mt 26.36-46; Lk 22.39-46
32Mapalal llele pe iek than kai ikhardol Jetsemani, ta o Jesus phenda pe disipulonenge:
Besen kate, so me llau te moliv man.
33Ta inllarda e Pedro, e Santiago ta e Juane, ta avila leke but bari zalba. 34Ondaka o Jesus phenda lenge:
Si ande mo zivoto iek zalba merimaki. Achen tumen kate, ta achen llungade.
35Ondaka o Jesus llelo mai angle, bangilo llik te thovel po chikat pe phuv, ta mangla e Devletar te na nakhel goia patnia. 36Ta kana molilape phenela:
Abba, Dade, tu sa sai chere. Le mandar gaia buka cherki, a te na cherdol so me mangav, te cherdol so tu mange.
37Mapalal irisailo lende, ta malada len kai sovena, ondaka phenda e Pedroke:
Simono, ¿sove? ¿nasti achilan llungado ni iek saiato? 38Achen llungade ta molintumen, te na peren ando zumadipe. Tumen mangen, a e esnaga inai la zor. 39Ondaka o Jesus pale llelo, ta molisailo isto gole alavenchar. 40Kana irisailo, malada pale kai e disipulura sovena, soke lenge akha phangliona lindratar. Ta ni llanena so ka phenen leke. 41Kana avilo pale o trito drom, phenda lenge:
¿Pale inzon ta soven? Dosta, avilo o vreme kai o Chavo e Manuseko ka avel dino ande va e bilachenge. 42Usten, aven, soke avel gua kai ka phukavel man.
Phanden e Jesuse
Mt 26.47-56; Lk 22.47-53; Jn 18.2-11
43O Jesus dela orba kana o Judas, iek katar e desudui disipulura, avilo bute llenenchar kai avena jarnienchar ta kastenchar. Von sea bichalde katar e mai preche popura, e gazda katar e kovacha e zakonoke, ta e phure. 44O Judas, gua kai phukavela le, phendaia lenge gia:
Gole kai ka chumidau, gua si. Phanden le ta arakhen le te na nasel.
45Kana avilo o Judas llelo pasa o Jesus ta phenda leke:
¡Kovachi!
Ta chumidia le. 46Ondaka istarde e Jesuse, ta inllarde le phanglo.
47A iek katar e llene kai sea kote, ikanda po jarni ta chinda o kan katar o sluga e mai bare popoko. 48Ondaka o Jesus puchla e llenen:
¿Soke avilen jarnienchar ta kastenchar te phanden man, sargo kana me sema iek kochkari? 49Suako llive sema maskar tumende ta sikavava ando cher e Devleko, ta nikada ni inllarden man phanglo. A sa gala ezgode nakhen te sai cherdol so si pisime ando Pisipe.#Lk 19.47; 21.37.
50Sa e disipulura mukle e Jesuse korkorre, ta nasle. 51A iek lleno terno llala pala lende uchardo samo iekhe chitea. Gole llene istarde le, 52a vou mukla o chiti ta naslo nango.
Chinen kris e Jesuseke
Mt 26.57-68; Lk 22.54-55,63-71; Jn 18.12-14,19-24
53Ondaka inllarde e Jesuse kai o mai baro popo, ta chidinaile sa e gazda e poponenge, ta e phure ta i e kovacha e zakonoke. 54O Pedro llelo pala le duratar llik andre ande bar katar o cher e mai bare popoko, ta achilo besindo e llenenchar kai arakhena o cher e Devleko, ta thodepe pasa e iag te lelpe lendar o sil.
55E gazda e poponenge ta sa e mai bari kris rodela varesavi dos ando Jesus te sai mundaren le, a ni malavena niso. 56Soke but llene ikanena bune pe lete, ta isto von kojadona ande pe orbe kai dena iek averea. 57Ondaka nesave llene ustile pe porrne ta dosarena le kojaimaia, ta phenena:
58Amen asundam le kai phenela:#Jn 2.19.
Me ka peravav gava cher e Devleko kai cherde e manusa, ta ande trin llive ka vazdau aver kai inai cherdo e manusendar.
59A gola kai dosarena e Jesuse nasti lacharena pe orbe maskar pete pe so phenena.
60Ondaka o mai baro popo ustilo po maskaral katar sa e llene, ta puchla e Jesuse:
¿Ni phene niso? ¿So si gava kai phenen tutar? 61A o Jesus ni phenda niso. O mai baro popo puchla le pale ta phenda:
¿San tu o Mesias, o Chavo katar o Del o blagosime?
62O Jesus phenda leke:#Dn 7.13.
Ea, me sem. Ta tumen ka dikhen sar o Chavo e Manuseko besel pe rig e chachi katar o Del kai si le sa e zor, ta ka dikhen le sar ka avel pe oblakura e milosoke.
63Ondaka o mai baro popo pharrada pe patave te sai llanen kai saia joliariko, ta phenda:
Ni trubul amen ios te asuna avere llenen. 64Tumen asunden sar kusla e Devle gole alavenchar. ¿So phenen tumen?#Lv 24.16.
Sa phende kai saia dosalo ta kai saia te merel.
65Nesave llene thode te chungarden le, ta phandena leke akha ta chalavena le dumukhenchar ta phenena leke:
¡Apogodisar ko chalada tut!
Ta gola kai arakhen o cher e Devleko chalade le pe leko mui.
O Pedro phenel kai ni pinllarel e Jesuse
Mt 26.69-75; Lk 22.56-62; Jn 18.15-18,25-29
66O Pedro saia tele ande bar, ta avili iek katar e sluge e mai bare popoke, 67ta kana dikhla e Pedro kai tatola pe iag, dikhla pe lete ta phenda leke:
I tu llaia e Jesusea, gua lleno katar o Nazaret.
68O Pedro phenda:
Iok, ta phenda:
Ni pinllarav le, ta ni llanav savi orba de.
Ta likisto avri po udar. Ondaka baslo iek basno 69E sluga pale dikhla e Pedro ta thoda te phenel e llenenge kai sea kote:
Gava si iek lendar. 70A o Pedro pale phenda kai ni pinllarel e Jesuse. Mapalal, e llene kai sea kote pale phende e Pedroke:
Chachimaia tu san iek lendar, soke i tu san katar e Galilea.
71Ondaka o Pedro thoda te jal sovel ta phenela:
¡Me ni pinllarav gole llene kai tumen den leki orba!
72Ondaka isto kote baslo pale o duito o basno, ta o Pedro diape golli kana o Jesus phendaia leke:
Trin droma ka phene kai ni pinllare man, ta mapalal ka basel o basno pale o duito. Ta vou thoda te rovel.
Currently Selected:
Markos 14: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
