Markos 13
13
O Jesus phenel kai o cher e Devleko ka avel zatrime
Mt 24.1-2; Lk 21.5-6
1Kana o Jesus likisto katar o cher e Devleko, iek katar leke disipulura phenda leke:
¡Kovachi, dik save barra ta save chera!
2O Jesus phenda leke:
¿Dikhe gala bare chera? Ni ka achel lendar ni iek barr upral pe aver. Sa ka avel zatrime.
So si te avelpe mai anglal katar o son
3Mapalal lleletar po burdo e Maslinkengo, kai si angla o cher e Devleko. O Jesus beslo, ta o Pedro, o Santiago, o Juan ta o Andres puchle le po chorial: 4Phen amenge, ¿kana ka aven gala ezgode, ta pe save ezgode ka llangliolpe kai gola ezgode si te cherdon?
5A o Jesus phenda lenge:
Arakhen tumen te na kojavel tumen niko. 6Soke ka aven but llene kai ka phenen kai sem me. Ta ka phenen:
Me sem, ta ka kojaven bute llenen.
7A kana tumen ka asunen kai marenpe e phuvia pe suako rig, na daran. Gia trubul te nakhen sa gala ezgode, a ni ios inai o son 8Soke iek charoina ka marelpe averiaia ta iek phuv ka marelpe avere phuviaia, ta e phuv ka dermolpe pe but thana, ta ka avel bok. Ta gua si samo e purve dukha e suetoke.
9Arakhen tumen soke ka den tumen kai e sudura ta ka maren tumen ande khanllira e judionenge. Ta ka thoven tumen angla e sudura ta angla e kraliura te sai phenen e orba e chachi mandar te sai asunen von. 10A mai anglal te avel o son e suetoko, morabi te phendol e lachi viasta ande sa e phuvia. 11A tumen na brigin tumen katar so si te phenen kana ka den tumen ande va e sudonenge, soke ande gua vreme o Del ka phenel tumenge so si te phenen ta tumen ni ka den orba, ko ka thovel alava ande tumaro mui si o Santo Duo.#Mt 10.17-20; Lk 12.11-12. 12E phlal ka den ando meripe isto pe phlalen, ta e dada pe chaven, ta e chave ka murzin pe pe dada ta ka mundaren len. 13Sa o sueto ka murzil pe tumende pala mo anav, a ko llala llik kai o son ta ni achela, ka avel braduime.#Mt 10.22. 14Kana ka dikhen kai cherdol o baro bilachipe po than kai ni trubulpe te cherdol gua kai chitil, te acharel, ondaka gola kai si ande Judea, morabi te nasen pe burdura,#Dn 9.27; 11.31; 12.11. 15ta o lleno kai si upral pe po cher, te na ni fuliel te ikanel niso andral. 16Ta o lleno kai si ande umalia, te na irilpe ni te lel pe patave.#Lk 17.31. 17¡Tesko gole diskinienge kai ande gola llivesa ka aven khamne, o avela len minone kai pien kolin! 18Mangen e Devletar te na aven gala ezgode ando viend, 19soke ande gola llivesa ka avel iek patnia sar kai ni avila nikada sar kana o Del cherda e sueto llik akana, ta sar ni ka avel nikada.#Dn 12.1; Apo 7.14. 20A o Gazda te na chikniavela gua vreme, niko ni avela braduime, a gua vreme chikniardale pala o volipe kai si le e llenendar kai vou esvirisarda. 21Ta ondaka, vareko te phenela tumenge:
Dikhen, etalo kate o Mesias, o Dikhen etalo incha, te na pachan. 22Soke ka aven kojamne mesias ta kojamne poraukura, ta ka cheren bare ezgode, te sai kojaven te avelape llik e llenen kai isto o Del esvirisarda. 23¡Arakhen tumen! Soke sa gaia orba phendemla tumenge mai anglal te nakhel.
O Chavo e Manuseko irilpe
Mt 24.29-35,42,44; Lk 21.25-36
24 #
Is 13.10; Ez 32.7; Jl 2.10; 3.15. A ande gola llivesa, kana ka nakhel o vreme katar e patnia, o kham ka cherdol truniariko, ta o chon ni ka klichil,#Is 13.10; Jl 2.10,31; 3.15; Apo 6.12. 25e cheraia ka peren katar o miloso ta e zor e milosoki ka izdral.#Is 34.14; Jl 2.10; Apo 6.13. 26Ondaka ka dikhol o Chavo e Manuseko kai avel pe oblakura, bare zoriaia ta barimaia.#Dn 7.13; Apo 1.7. 27Vou ka bichalel e suechonen, ta ka chidel e llenen kai esvirisarda katar e star riga e phuviake katar suako than e phuviako ta e milosoko.
28Sikon katar o kas e simochinengo:
Kana leke krangura si kovle, ta zelenil ta liken e patra, tumen llanen kai o milai si pase. 29Isto gia, kana tumen ka dikhen sa gala ezgode, ka llanen kai o Chavo e Devleko si po udar. 30Chachimaia phenav tumenge kai sa gala ezgode ka avenpe bi te nakhel gaia vicha. 31O miloso ta e phuv ni ka aven ios, a me alava si te cherdon.
32A cheres o llive ta o saiato, niko ni llanel le, ni e suechura e milosoke, ni o Chavo. Samo mo Dad llanel le.#Mt 24.36.
33Goleke tumen morabi te aven llungade ta te prezon, soke ni llanen kana ka avel gua vreme. 34Tumen morabi te cheren sargo iek lleno kai mai anglal te llaltar ande aver foro, phenda pe slugenge te arakhen leko cher. Suakone diale iek rado, ta phenda te prezol goleke kai arakhela o udar.#Lk 12.36-38. 35Achen llungade, soke ni llanen kana ka avel o gazda e chereko, sai avel kana perel e riat, o po dopas katar e riat, o thiarinako rano. 36Ta gia kana ka avel, te na malavel tumen sovindo. 37So phenav tumenge, phenaule saurrenge:
¡Achen llungade!
Currently Selected:
Markos 13: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
