Markos 12

E paramichi katar e llene kai radin e phuv

Mt 21.33-46; Lk 20.9-19

1O Jesus thoda te del lenge orba e paramichenchar. Ta phenda lenge:#Is 5.1-2.

Iek lleno thoda te barion drakha ande iek vostano, ta phangla o vostano truial, ta lacharda iek than te cherel mol ta vazdia iek cher ta mukla gua vostano drakhako kai iek manus te cheren buchi ta llelotar dur. 2Kana avilo o vreme, bichalda iekhe sluga te mangel katar e llene kai radina e phuv o chari kai perela le. 3A von thode o va po sluga, marde le, ta tradie le chuche vastengo. 4Ondaka o gazda bichalda avere sluga, a gole chalade le ando soro ta kusle le. 5Bichalda avere, ta gole mundarde le. Mapalal bichalda bute llenen ios, nesaven marde len a averen mundarde len.

6Ondaka achela samo iek kai saia isto leko chavo, gole kai volila but, ta bichalda le, ta mislilape gia:

Chachimaia ka den liubao me chaurre. 7A e llene kai radina e phuv phenena iek avereke:

Gava si o lleno kai kana ka merel leko dad vou ka cherdol gazda. Aven te mundara le ta goia phuv ka avel amari. 8Istarde le, mundarde le, ta chudie leki esnaga avri katar e phuv kai sea e drakha.

9¿A tumen so mislin kai ka cherel o gazda gole phuviako? Ka llal te mundarel gole llenen kai radina goia phuv, ta ka del e phuv e drakhenchar kai aver llene.

10¿Ni chitisarden so phenel ando Pisipe? phenel gia:

O barr kai mukle le pe iek rig ta ni thode leke sama, e llene kai cheren chera

cherdilo o barr mai glamno e chereko.

11Gaia ezgoda cherdala o Gazda,#Sal 118.22-23.

ta chudiamen katar so dikha.

12Ondaka mangle te phanden e Jesuse, soke llanena kai dela orba lendar ande goia paramichi, a sar darana katar e llene mukle le, ta lleletar.

E love e foroke

Mt 22.15-22; Lk 20.20-26

13Bichalde kai o Jesus nesave llene katar e fariseura ta i nesave llenen kai sea e Erodeseke te sai dosaren le pe fisavi orba. 14Gola llene llele ta phende leke gia:

Kovachi, llana kai san chacho, ta ni dara katar e llene kai asunen tut, soke ni phene lenge alava te perel lenge drago. Tu sikave chachimaia o drom e Devleko. ¿Si orta te pochina e love kai mangel o Sesar o iok? ¿Ka pochina o ni ka pochina? 15A o Jesus, sar pinllerela lengo kojaipe, phenda lenge:

¿Soke zumaven man? Anen mange iek tolari te dikhaule, 16ande o tolari lete, ta o Jesus phenda lenge:

¿Kako mui ta kako anav si pisime po tolari?

Von phende:

E Sesareko.

17Ondaka o Jesus phenda lenge:

Den e Sesare so si e Sesareko, ta den e Devle so si e Devleko.

A von chudisaile letar.

E Saduseura den orba e Jesusea

Mt 22.23-33; Lk 20.27-40

18Nesave Saduseura, kai ni pachan kai e mule ka usten katar o meripe, llele te dikhen e Jesuse, ta phende leke gia:#Ech 23.8. 19Kovachi, o Moises mukla amenge pisime kai kana iek murus zinime merel ta ni avila le porodo pe rromiaia, gole muruseko phlal morabi te lel pala pe gole phivlia, ta te del minonen pe phlale kai mulo.#Dt 25.5. 20Ondaka e saduseura phende gia e Jesuseke:

Sea efta phlal, o purvo lendar zinisailo, ta mulo ta ni mukla porodo. 21O duito zinisailo e phivliaia, ta i vou ni mukla porodo. Ta isto gola ezgode nakhla o trito, 22ta isto gia avilape i ogole phlalenchar, ta ni iek lendar ni avila le porodo. Mapalal muli i e rromi. 23Kana ka usten katar o meripe ta ka zivin pale, ¿save phlaleki rromi ka avel voi, kana e efta sea zinime laia?

24O Jesus phenda lenge:

Tumen sen ando kojaipe, soke ni pinllaren o Pisipe ta ni e Devleki zor. 25Soke kana e mule ka usten katar o meripe, e murusa ta e diskinie ni ka zininpe, soke ka aven sargo e suechura kai si ando miloso. 26A katar e orba kai e mule ka usten, ¿tumen ni chitisarden so pisisarda o Moises katar e karrne kai phabona? O Del phenda e Moiseseke:#Ek 3.6.

Me sem o Del katar o Abraam, katar o Isaak ta i katar o Jakob. 27¡O Del inai Del e mulengo, vou si Del e llundengo! Tumen sen ande iek baro kojaipe.

O zakono mai baro

Mt 22.34-40

28Kana dikhle kai o Jesus dia orba sukar, iek katar e kovacha e zakonoke, kai asundaia kana denape orba, avilo pasa le, ta puchla le:

¿Savo si o purvo alav katar sa e alava?

29O Jesus phenda leke:

O zakono mai baro si gava:

Asun, Israel:

O Gazda amaro Del si o edino Gazda. 30Volisar e Gazda kai si cho Del sa che liea, sa che duoia, sa che misloia ta sa che zoriaia.#Dt 6.4-5. 31A si iek zakono ios:#Lv 19.18.

Volisar avere sar voli tu tut. Nisavo aver zakono inai mai baro neko gala.

32O kovachi e zakonoko phenda leke:#Dt 4.35.

So phene si o chachipe ta si sukar, samo iek Del si ta inai aver. 33Ta te voli e Devle sa che liea, sa che misloia ta sa che zoriaia, ta te voli suakone llene sar voli isto tut, mol le mai but neko sa e kurbanura.#Os 6.6.

34Kana o Jesus dikhla kai o kovachi dia orba bizaimaia, phenda leke:#Lk 10.25-28.

Ni san dur katar e charoina e Devleki.

Ta niko ni tromala te puchel le niso.

¿Katar savi vicha si o Jesus?

Mt 22.41-46; Lk 20.41-44

35O Jesus sikavela ando cher e Devleko, ta puchla:

¿Soke phenen e kovacha e zakonoke kai o Mesias avel katar e vicha e Davideki? 36Soke isto o David ando Santo Duo phenda:#Sal 110.1.

O Gazda phenda me Gazdake:

Bes pe mi rig e chachi,

llik kana me ka thovav che dusmanonen

telal tala che porrne.

37¿A sar sai avel o Mesias katar e vicha e Davideki, kana isto o David ikharel le Gazda?

Kote sea but llene ta asunena e Jesuse dragostimaia.

O Jesus phukavel golen kai sea gazda e zakonoke

38Kana o Jesus sikavela phenela gia:

Arakhen tumen katar e kovacha e zakonoke, soke drago lenge te thoven patave barikane pe pete, ta te den lenchar orba liubaimaia ando foro. 39Ta roden e estoliche mai anglune ande khanlliri e judionengi ta e mai lache thana kana si varesavo jape, 40ta len katar e phivlia lengo lachipe, ta molinpe but te na achardol o bilachipe kai cheren. Von si te len mai bari duk.

E love kai dia e phivli chorri

Lk 21.1-4

41Iek llive o Jesus besela angla e baulia kote kai chidena e love katar o cher e Devleko, ta dikhela sar thovena e love. Ta but barvale thovena but love. 42Ta avili iek phivli chorri, ta thoda dui tolaricha jarkune, kai ni mol len but. 43Ondaka o Jesus ikharda pe disipulonen, ta phenda lenge:

Phenav tumenge kai gaia phivli chorri dia mai but neko sa ogola llene kai thovena e love ande baulia, 44soke sa die katar so ni trubul len, a voi ande po chorripe, dia sa so saia la te pravarelpe.

Currently Selected:

Markos 12: BACHRO

Highlight

Copy