Markos 11
11
O Jesus del ando Jerusalem
Mt 21.1-11; Lk 19.28-40; Jn 12.12-19
1Kana avile pasa o Jerusalem, pasa e forura katar o Betfage ta e Betania, po burdo e Maslinkengo, o Jesus bichalda duien katar pe disipulura, 2ta phenda lenge:
Llan ando forichi kai si anglal, ta kana ka aven ka malaven iek magarcho phanglo, kai niko ni likisto pe lete. Putaren le ta anen le. 3A te puchla tumen vareko soke cheren gua, phenen leke kai trubul e Gazda, ta kai ka iril le oma.
4Von llele, ta malade e magarcho phanglo avri po drom pasa iek udar, ta purtarde le.
5Nesave llene kai sea kote phende lenge:
¿So cheren? ¿Soke putaren e magarcho?
6Ondaka von phende isto gia sar phendaia lenge o Jesus. Ta mukle len te llantar. 7Von inllarde e magarcho kai o Jesus, ta thode pe gertacha upral po magarcho ta o Jesus likisto upral. 8Ta but llene inzarde pe gertacha po drom, a aver llene chinde krangura katar e kasta ta thode len po drom.
9E llene kai llana anglal ta i e llene kai llana palal, thode te urkin:#Sal 118.25-26.
¡Blagosime gua kai avel ando anav e Devleko! 10¡Blagosime e charoina kai avel, e charoina katar amaro dad o David! ¡Blagosime te avel o Del!
11O Jesus dia ando Jerusalem, ta i ando cher e Devleko dikhla pe suako rig ta mapalal llelotar e desuduie disipulonenchar ande Betania, soke lela te perel e riat.
O Jesus del armaia iekhe kaste simochinengo
Mt 21.18-19
12Thiarinako, kana likena katar e Betania, o Jesus bokhailo. 13Dikhla duratar iek kas simochinengo kai saia le patra, ta avilo pase te dikhel dal saia le simochine, a malada samo e patra, soke ni saia o vreme e simochinengo. 14Ondaka o Jesus phenda e kasteke:
¡Daboida te na jal niko nikada che simochine!
Leke disipulura asunde so phenda.
O Jesus chistol o cher e Devleko
Mt 21.12-17; Lk 19.45-48; Jn 2.13-22
15Kana avile ando Jerusalem, o Jesus dia ando cher e Devleko ta thoda te tradel sa e llenen kai chinena ta bichinena ta dia tele moia e stalia golenge kai pharruvena e love e suetoke, ta i e thana golenge kai bichinena e gulubura, 16ta ni mukela nika te nakhel katar o cher e Devleko ezgodenchar, 17Ta thodape te sikavel, ta phenela:#Is 56.7; Jer 7.11.
Ando Pisipe phenel gia:
Mo cher ka ikhardol cher e molimako sa e phuvienge a tumen cherden letar iek than kai gurudon e chorane.
18A e gazda e poponenge ta e kovacha e zakonoke asunde e Jesuse ta thode te roden sar te mundaren le, pala e dar kai saia lenge letar, soke sa e llene chudisailea katar leko sikadipe. 19Kana peli e riat o Jesus ta leke disipulura lleletar katar o foro.
O kas e simochinengo sukol
Mt 21.20-22
20Thiarinako rano, nakhle pasa o kas e simochinengo ta dikhle kai sukiloia sa llik leke zile. 21Ondaka o Pedro diape golli, ta phenda e Jesuseke:
Kovachi, dik, o kas kai dian le armaia, sukilo.
22O Jesus phenda lenge:
Pachan ando Del. 23Soke chachimaia phenav tumenge, kai varesavo lleno te phenela gale burdoke:#Mt 17.20; 1 Kor 13.2.
Le tut kotar, ta chude tut ande mora, ta te pachala ande po lio kai gua sai avelpe, ta pachala kai so phenda ka cherdol, ondaka gia ka avelpe. 24Goleke phenav tumenge kai sogo tumen mangena ando molipe, pachan kai ia si tumenge dino, ta gia ka avelpe. 25Ta kana ka molintumen, ta te si tumen varesavi joli pe vareka, prostisaren le, te prostil i tumaro bilachipe tumaro Dad kai si ando miloso.#Mt 6.14-15. 26Soke tumen te na prostisaren, ni tumaro Dad kai si ando miloso ni ka prostil tumenge tumaro bilachipe.
O gazdaripe e Jesuseko
Mt 21.23-27; Lk 20.1-8
27Mapalal katar gala ezgode irisaile ando Jerusalem. Ta kana o Jesus phirela ando cher e Devleko, avile lete e gazda e poponenge, e kovacha e zakonoke ta e phure, 28ta puchle le:
¿Save gazdarimaia chere gala ezgode? ¿Ta ko dia tut o gazdaripe te cherele?
29O Jesus phenda lenge:
I me ka puchau tumen iek ezgoda:
Ta te phenden mange, i me ka phenav tumenge save gazdarimaia cherav gala ezgode. 30¿Ko bichalda e Juane te kristil, o Del, o e manusa? phenen mange.
31Von thode te den orba iek averea ta phenena:
Te phendam kai bichalda le o Del, vou ka phenel:
¿A soke ni pachaien le? 32¿A sar ka phena kai bichalde le e manusa? Von phenena gua soke darana katar o foro, soke sa pachana kai o Juan saia iek profeta. 33Goleke von phende e Jesuseke:
Ni llana.
Ondaka o Jesus phenda lenge:
Ni me ni ka phenav tumenge save gazdarimaia cherav gala ezgode.
Currently Selected:
Markos 11: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
