Eksodo 9

E zatrania ande zivirinie

1Ondaka o Del phenda e Moiseseke:

Lla kai o Faraon, ta phen leke: Gia phenel o Del, o Del katar e ebreura: Muk te llal me foro, te blagosil man.

2Soke te na muklan le, ta te achadan le, 3o va e Devleko ka avel pe che zivirinie kai si ande umal, ka avel iek nasualipe but baro pe lende. Ka meren e gra, e magarchura, e deve, e guruva ta e bakre. 4A e zivirinie katar o Israel ni ka avel lenge niso, goleke e zivirinie katar o Israel ni iek lendar ni ka merel.

5Ta o Del thoda o llive, ta phenda:

Me thiara ka cherav gaia ezgoda.

6Ta thiarinako, o Del cherda gaia ezgoda. Sa e zivirinie katar e ejipsiura mule, a katar e zivirinie katar o Israel ni mula ni iek lendar. 7Ondaka o Faraon bichalda te dikhen e zivirinie katar o Israel, ta dikhle kai lenge zivirinie ni iek lendar ni muli, a o lio e Faraonoko zurailo, ta ni mukla e foro te llaltar.

E zatrania katar e phuña

8Ondaka o Del phenda e Moiseseke ta e Aaronoke:

Len cherricha prajo katar e furnava ta llan kai o Faraon, ta kana ka aven lete, tu Moises ka chude upre o prajo. 9Ta o prajo ka furial pe sa o foro, ta ka cherel te liken phuña pe sa e manusa ta pe sa e zivirinie katar o Ejipto.

10O Moises ta o Aaron lie o prajo katar e furnava ta llele kai o Faraon. Kote o Moises chudia o prajo upre, ta likeste phuña pe manusa ta i pe zivirinie.#Apo 16.2. 11A e chirimatarke nasti achena angla o Moises, soke von sargo sa e ejipsiura sea pherde phuña. 12A o Del zuriarda o lio e Faraonoko, ta ni thoda lenge sama, gia sar o Del phendaia e Moiseseke.

E zatrania katar e krupe

13Ondaka o Del phenda e Moiseseke:

Uste thiarinako rano, ta lla ta phen e Faraonoke: Gia phenda o Del, o Del e katar e ebreura: Muk te llal me foro, te blagosil man. 14Soke akana ka bichalav sa me zatranie pe tute, ta pe llene kai radin chuke ta pe sa cho foro, te sai llane kai inai niko sargo me pe sa e phuv. 15Me te manglema bichaldema iek zatrania pe tute ta pe cho foro te sikavav mi zor, ta tu sumbisailana katar e phuv. 16A me muklen tut te zivi te sai dikhe mi zor ta te sai pinllaren man ande sa e phuv.#Ro 9.17. 17A tu pale vazdiniao pe mo foro, ta ni kame te muke le te llal. 18A thiara isto ande gava saiato ka cherav te peren zurale, bare krupe, sar nikada ni pela ando Ejipto. 19Goleke bichal te guruven che zivirinie ta sa so si tut ande umal, soke e bare krupe kana ka pheren, ka mundaren sa e manusen ta e zivirinien kai ka aven avri ta ni ka aven gurudine.

20Nesave llene kai radina e Faraonoke daraile katar e alava e Devleke, ta gurude pe slugen ta pe zivirinien ta ni mukle len avri. 21A sea aver kai ni pachaie, ta mukle len avri. 22Ondaka o Del phenda e Moiseseke:

Vazde cho va karing o miloso, te sai peren e krupe pe sa o Ejipto, pe manusa, pe zivirinie, ta pe patra katar e umalia katar o Ejipto. 23Ondaka o Moises vazdia pi rovli karing o miloso, ta o Del cherda te girmil o miloso ta te peren esterliche ta te phabol e iag pe phuv ta te peren krupe pe sa o Ejipto. 24Ta pela krupe ta iag amime, gia bare ta gia zurale sar nikada ni avilape pe phuv katar o Ejipto.#Apo 8.7; 16.21. 25Ta e krupe zatrisarde sa so saia ande phuv katar Ejipto, manusen ta zivirinien. Ta e krupe zatrisarde sa e patra kai sea ande umalia, ta phagle sa e kasta katar o Ejipto. 26Samo ande phuv katar o Gosen, kote kai zivina e israelitura, ni diapeke ni iek krupa.

27Ondaka o Faraon bichalda te ikharen e Moisese ta e Aarone, ta phenda lenge:

Llanav kai cherdem o bilachipe. E dos si pe ma ta pe mo foro, a na po Del. 28Molin tumen e Devleke te na girmil ios ta te achavel e krupe, ta me ka mukav tumen te llan, ta ni ka achavav tumen ios.

29A o Moises phenda leke:

Me samo ka likav katar o foro, ka vazdav me va karing o Del, ta ni ka girmil ios ta ni ka peren ios krupe, te sai llane kai e phuv si e Devleki. 30A me llanav kai ni tu ta ni che llene kai radin chuke ni daran katar o Del o Gazda.

31E vostanura kai saia te ikanen lendar o lino ta e sebada achile zatrime, soke pe sebada likistea e kuchurra, a po lino likistea e lulunllorra. 32A o lliu ta o senteno braduisaile, soke von liken mapalal.

33Kana o Moises llelotar katar o Faraon ta likisto katar o foro, vazdia pe va karing o Del ta ni girmisarda ios ta achile e krupe, ta ni pela ios o bursin pe phuv. 34A kana o Faraon dikhla kai o bursin achilo ta kai ni dela peke ios e krupe, ta kai ni girmila ios, pale thodape te cherel o bilachipe ta zuriarde po lio vou ta i e llene kai radina leke. 35Ta o lio e Faraonoko zurailo, ta ni mukla te llan e israelen, gia sar o Del phendaia e Moiseseke te phel le.

Currently Selected:

Eksodo 9: BACHRO

Highlight

Copy