Eksodo 8

1Ondaka o Del phenda e Moiseseke:

Lla kai o Faraon ta phen leke: Gia phenel o Del: Muk te llal me foro, te blagosil man.

2Soke te na muklan le te llal, me ka cherav te pherdol zambuke sa chi phuv.#Apo 16.13. 3O pai ka chirol e zambukendar, ta von ka liken ta ka den andre ande cho cher, ka den kote kai sove upral pe cho kerveto, ande chera katar e llene kai radin chuke, ande sa cho foro, ande che furnave ta i kote kai cheren o marrno. 4Ta e zambuke ka liken pe tute, pe cho foro ta pe sa che llene kai radin chuke.

5Ta o Del phenda e Moiseseke:

Phen e Aaronoke te inzarel pi rovli pe paia, pe paiorra, ta pe paia achadine, te sai liken kotar zambuke te pheren sa o Ejipto.

6Ondaka o Aaron inzarda po va pe paia, ta sa e phuv pherdili zambuke. 7Ta i e chirimatarke cherde isto gua pe chirimataia, ta i von ande zambuke pe sa o Ejipto. 8Ondaka o Faraon bichalda te ikharen e Moisese ta e Aarone, ta phenda lenge:

Mangen e Devletar te ikanel e zambuke mandar ta me forotar, ta me ka mukav che foro te llal te del kurbanura e Devle.

9Ondaka o Moises phenda e Faraonoke:

Phen mange kana mange te molivman pala tu, ta pala e llene kai radin chuke ta pala cho foro, te sai llantar e zambuke tumendar ta katar cho cher, ta te achen samo ando pai.

10Ta o Faraon phenda:

Isto thiara. A o Moises phenda:

Gia ka cherdol, te sai llane kai inai niko sargo o Del amaro Gazda.

11E zambuke ka llantar katar cho cher ta ka achen samo ando pai, ta ni ka aven ios pe tute ni pe llene kai radin chuke, ni pe cho foro.

12Ondaka o Moises ta o Aaron lleletar katar o cher e Faraonoko. Mapalal o Moises mangla katar o Del te duriavel e zambuke kai bichaldaia po Faraon. 13Ta o Del cherda so o Moises mangla letar, ta mule e zambuke kai sea ande chera, ande baria ta ande umalia. 14A e llene chidena e zambuke mule ta thovena len pe umpe, ta pe suako rig khandena. 15A kana o Faraon kurtulisailo katar e zambuke, pale zuriarda po lio ta ni thoda sama e Moiseseke ta e Aaronoke, isto gia sar o Del phendaia.

E zatrania katar e lluva

16Ondaka o Del phenda e Moiseseke:

Phen e Aaronoke te inzarel pi rovli ta pe rovliaia te chalavel o prajo e phuviako, te sai cherdol lluva ande sa e phuv katar o Ejipto.

17Ta von gia cherde le. O Aaron inzarda pi rovli ta chalada po prajo e phuviako, ta sa o prajo katar o Ejipto cherdilo lluva, pe manusa ta pe zivirinie. 18A e chirimatarke i von cherde chirimata te cheren lluva, ta nasti cherde le. Ta sea lluva pe manusa ta i pe zivirinie. 19Ondaka e chirimatarke phende e Faraonoke:

¡E Devleko va si kate! A o lio e Faraonoko zurailo ta ni thoda lenge sama, gia sar o Del phendaia.

E zatrania katar e makha

20O Del phenda e Moiseseke:

O Faraon ka llal thiarinako rano po pai, goleke uste rano ta lla lete ta phen leke: Gia phenda o Del: Muk te llal me foro, te blagosil man. 21Soke tu te na muklan me foro, me ka bichalav pe tute, pe llene kai radin chuke, pe cho foro, ta pe chera, katar suako makha, ta e chera katar e ejipsiura ka pherdon katar suako makha, ta i pe phuv kai von avena. 22Ta ande gua llive me ka thovav pe iek rig e phuv katar o Gosen, kote kai zivil mo foro, te na avel ande late katar nisave makha. Gia ka llane kai me, o Del, sem ande gaia phuv. 23A pe mo foro ni ka aven makha, e makha ka aven samo pe chiro foro. Gala ezgode ka nakhen thiara.

24Ta gia o Del cherda le, ta avile katar suako makha kai diliarena ando cher e Faraonoko, ta i avile ande chera katar e llene kai radina leke, ta ando foro katar o Ejipto. Ta e phuv murisaili cheres e makha.

25Ondaka o Faraon ikharda e Moisese ta e Aarone, ta phenda lenge:

Llan te den kurbanura tumare Devle, a na liken katar e phuv.

26A o Moises phenda leke:

Inai sukar te cherale gia, soke e zivirinie kai amen da kurbano e Devle kai si amaro Gazda, e ejipsiura blagosin len. A amen te daia kurbano angla lende e zivirinien kai von blagosin, von ka mundaren amen e barrenchar. 27Goleke ka lla trin llive phirindo po pusto, ta kote kai resaia ande trin llive, ka da kurbanura amare Devle kai si amaro Gazda gia sar ka phenel amenge vou.

28Ondaka o Faraon phenda:

Me ka mukav len te llan po pusto te den kurbanura pe Devle kai si lengo Gazda, samo te na llantar but dur. Ta molin tumen pala ma.

29A o Moises phenda:

Samo ka likav katar ka molivman e Devleke te llantar thiara sa e makha tutar Faraon, ta i katar e llene kai radin chuke ta i katar cho foro, samo te mukea amen ta te na dea tut palpale katar cho alav, ta te na achave e Israele te llal te del kurbanura e Devle.

30Ondaka o Moises llelotar katar o Faraon, ta molisailo e Devleke. 31Ta o Del cherda so o Moises mangla letar, ta ikanda sa gole makhen katar o Faraon, ta i katar e llene kai radina leke ta i katar o foro, ta ni achili ni iek mak. 32A o Faraon pale zuriarda po lio, ta ni mukla te llantar e israelen.

Currently Selected:

Eksodo 8: BACHRO

Highlight

Copy