Eksodo 24

Achen pe orba o Del ta e israelitura

1O Del phenda e Moiseseke:

Like angla o Del, tu, o Aaron, o Nadab, o Abiu, ta eftavardes phure katar o Israel, ta ka den changa duratar. 2Samo tu sai ka ave pasa ma, ogola llene nasti ka aven, ta o foro te na avel tumenchar.

3O Moises llelo ta phenda e israelenge sa so o Del phendaia leke te cherel, ta saurre ande iek avazi phende:

¡Ka chera sa so o Del phenda!#Ek 19.8; Dt 5.27.

4Ondaka o Moises pisisarda sa so o Del phendaia, ta thiarinako rano, ustilo ta cherda iek altar pasa o burdo, ta thoda desudui barra prema e desudui viche katar o Israel. 5Mapalal bichalda nesave ternen katar e israelitura te den guruven kurbano pala e pas. 6O Moises lia dopas katar o rat ta thoda le ende iek tasura bare, ta o gua dopas rispisarda le upral po altar. 7Mapalal lia o lil katar e orba kai achilaia lenchar, ta chitisarda le e israelenge. Ondaka von phende:

Ka thova sama te chera sa so o Del phenda amenge te chera.

8Ondaka o Moises lia o rat ta rispisarda le po foro, ta phenda:

Gava si o rat kai chacharel e orba kai o Del achila tumenchar, e orba katar sa gala alava.

9O Moises o Aaron, o Nadad ta o Abiu, ta e eftavardes phure katar o Israel likiste po burdo. 10Ta kote dikhle e Devle katar o Israel: Ta telal tala leke porrne saia vareso kai klichila sargo o safiro, sargo o miloso bristo. 11Ta o Del ni dukhada gale llenen glamne katar o Israel kai dikhle e Devle, ta jale ta pile.

O Moises likel po burdo katar o Sinai

12Ondaka o Del phenda e Moiseseke:

Like po burdo kai sem me, ta adurichar man kote, soke ka dav tut dui barra chinde kai pe lende pisisardem o zakono ta e alava, te sai sikon e israelitura.

13O Moises ustilo ta likisto po burdo e Devleko, ta llelo e Josueea kai pomozila le. 14Ta phenda e phurenge:

Tumen aduricharen amen kate lligo ni ka iri amen. Kate ka achel o Aaron ta o Jur tumenchar, ta vareko te mangela vareso te del orba lenchar.

15Ondaka o Moises likisto po burdo, ta iek oblako ucharda o burdo. 16Ta kote sikadili e zor e Devleki po burdo Sinai, ta o oblako ucharda le sov llive, ta o eftato llive o Del ikharda e Moisese maskar o oblako. 17Ta e zor e Devleki sikadili angla e akha e israelenge sargo iek iag divi pe rig mai vazdini katar o burdo. 18O Moises dia ando oblako ta likisto po burdo, ta kote achilo saranda llive ta saranda racha.#Dt 9.9.

Currently Selected:

Eksodo 24: BACHRO

Highlight

Copy