Rom 1

Pol ila bokongon

1Ngong Pol ka Yesus Krais ila gute bokongon ina gesa ngasogo pas ane. Oglou Ida Tapolngon rere ngong ila aposel gesa. Iye rere ngong ma ngapaur ila omon itau ke osep pula.

2Oglou kodong Ida Tapolngon wai promis ma ila omon tonari polou lokono. Oglou iye due osep napaprangan ina aitno lisak deka tisogo ine ke buk gesa ke Ida Tapolngon ila pelengon ka itau lokono. 3Omon tonari lana ine la ke Ida Tapolngon Otno Arang Yesus. Iye tona gute Devit ka oglou vri mgo ke osep Israel ina ila napakngan. 4Mase iye me dong kap itosep. Alo ka iye dong kap ite Ano Itau dong ke aitno. Iye dong la lama iye mete deka osep tiyas iye ke ina denga e iye munu ine. Mase Ida Tapolngon didi ila arit e due poga tito e dong blang. Ila baulukngon nis itosep Ida Puda Yesus Krais iye tona Ida Tapolngon Otno Arang lokono. 5E silang blang langane. Ida Tapolngon makai imi e rere imi ma imi ila aposel leklou batne Yesus dong. Iye rere imi ma imapaur ila omon itau la ke osep ka pula keniye ka tidong ke omur pula. Iye rere imi kesua iye waiki ma osep ka pula keniye aitno lisak la dagar ke ila pelengon e ma tididie. 6E umu blang Ida Tapolngon rere umu Yesus Krais ila osep kodong.

7Eknikane ngasogo pas ane uti la ke umu osep Rom ina ka Ida Tapolngon rere umu ila osep. Ngawaiki Ida Tapolngon ka Pmada e Ida Puda Yesus Krais urok makaingan dong kap umu e tidue aitno lumu epen.

Pol waiki la polou ke armok Rom

8Lou pelengon mgongon lang-ane. Eknikane elio ka aitno lumu dagar ke Yesus kodong ina omon pakes lila ke omur ka pula keniye. E ngawai itau ke Ida Tapolngon ke Yesus Krais angaine kesua omon tonari itau. Ngawai ke Ngau Tapolngon langane. Aitno lungong itau ke wom kesua osep Rom ina leklou aitno lisak la dagar ke Yesus kodong. 9-10Eknikane aitno lu-ngong la dagar ke Ida Tapolngon lokono deka ngaboko dagar lokono ma ngapaur ila omon itau ka la ke Otno Arang Yesus la ke osep pula. Ida Tapolngon ile omur oklou aling aling ngawai itau ke iye e ngapmi iye ma iye lua umu. E ngapmi iye ma iye didi aitno e lua ngong blang ma mase ngapolou ke umu. 11Ngawaiki ngapolou ke umu ma Ano Itau lua ngong ma ngalua umu ke luangan gesa. Ngawaiki ma luangan tonari lua umu e due aitno lumu dagar lokono ke Ida Tapolngon. 12E lumu elio ka aitno lumu la dagar ke Ida Tapolngon e lou elio ka aitno lungong la dagar ke Ida Tapolngon ma lua ite pulu ma due aitno lite dagar lokono.

13Sipmi. Ngawaiki umo-klingen lou pelengon ma umeile omur ine. Oglou ngawai ke lou langan aling pula kesua ngawaiki ngapolou ke umu. E ngakaranga ngapolou ke umu kovok kesua parangan gesa dangdang ngong ke lou langan tonari. Alo ari ngawaiki ngapolou ke umu ma ngaboko ke umu. Ngawaiki ngaboko ke umu kesua oglou lou bokongon lua osep pula ka isak osep Yuda ina kovok. Deka osep tonari tipolou Ida Tapolngon ila osep. E ngawaiki ngaboko ke umu eriar langka oglou ngaboko ke isak e dau parangan gesa dangdang ngong ine. 14Eknikane lou bokongon ka nganapapra Yesus ina basikngen ke osep epmes ina ka pula keniye dau dong e aitno lungong kro ine. Aitno lungong kro ke osep ka tidong ke armok armok e urok brokngon pula dong e osep ka isak omong aitno ina. Aitno lungong kro ke osep ka tile omur ke sogongon kodong e osep ka tile omur ke sogongon kovok. 15Aitno lungong kro ke lou bokongon e ngapara ke alo ka nganapapra Ida Tapolngon ila pelengon itau lokono ke umu osep Rom ina.

16Eknikane ngong mnak ngong ke Ida Tapolngon ila omon itau kovok. Aurou. Aitno lungong dagar lokono ine vala. Ida Tapol-ngon ila omon itau ila arit karanga lua osep keniye ka aitno lisak dagar ine. Ida Tapolngon ila omon itau me ke itosep Yuda ina mgo. Mase omon tonari la polou ke osep ka isak osep Yuda ina kovok. 17Ida Tapolngon ila omon itau nis ite ke elio ka Ida Tapolngon due ite itopolou itau e osuk ke bitna. Eriar langka aitno lite dagar ine ma Ida Tapolngon sir ite ila osep itau lokono. Deka udo mosongon ka itau lokono dong vala dong. Oglou osep napaprangan ina tisogo Ida Tapolngon ila pelengon langane. “Osep seisei ka aitno lisak dagar ke Ida Tapolngon ma iye lua isak ma tipolou itau e osuk ke bitna.”#1.17 — Emritim pelengon langane ke Testamen Oglou Ina ke Habakuk 2.4.

Osep pula tipul dogur ke Ida Tapolngon

18Ida Tapolngon nis itosep kodong ma iye pagei aitno ila engil duru ke osep epmes ina. Kesua tipli ila elio itau e urok elio bitna bitna keniye tipes ila pelengon lokono. 19Ida Tapolngon ila kotngon due osep epmes ina kesua oglou kodong iye nis osep keniye ke ila elio itau. Iye nis osep keniye ine e osep tile omur ine e dau tididie kovok. 20Oglou Ida Tapolngon tapol wan bitna bitna keniye ka itavati e iteile omur ine. Ila duengen keniye nis itosep ke ila elio itau lokono lama oglou itavati iye kovok. Ila duengen nis itosep ke ila arit e ke ila elio itau blang e osep ka pula keniye tivati. E osep epmes ina ka tiwai tidue elio epmes ina batne tivati Ida Tapolngon kovok ma urok pelengon batne dong kovok. Aurou. Urok pelengon bure vala.

21Urok pelengon bure kesua oglou alo ka tile omur ke Ida Tapolngon ila elio itau ari isak tikakai angaine tito ine kovok. E silang blang langane. Lama tile omur ine isak dau tiwai itau la ine kovok kesua aitno lisak mter langka iye Inarak Tapolngon lokono kovok. Deka tipli iye vala. Deka osep tonari aitno lisak mter elio bitna bitna ka ulik ulik e tipolou manga manga isak vala. E aitno lisak mter elio soulu vala. 22Tiwai langane. “Imi osep ka imeile omur ina.” E aitno lisak kaka lokono. 23Deka osep tonari tipul dogur ke Ida Tapolngon ka dong vala dong e iye karanga mete kovok. E aitno lisak la dagar ke wan bitna bitna ina sapingen langka osep e ongwa bitna bitna e monuk bitna bitna e wan bitna bitna ka tirarai ke taklak ka tikaranga timete.

24Osep tonari aitno lisak soulu lokono vala e Ida Tapolngon pul dogur ke isak ma tididi aitno lisak vala. Deka tidue elio ka soulu lokono pulu langka itosep udo elio lokono kovok. Tidue elio soulu pulu ke pampamu lisak vala. 25Tipli Ida Tapolngon ila pelengon ka lokono e tipalele ila pelengon ke pelengon yakngan vala. Deka tilotuim wan bitna bitna ka Ida Tapolngon due e tiwaiki wan bitna bitna tonari inarak puda. Aitno lisak langane e Ida Tapolngon waiki aitno lisak langane kovok. Iye waiki osep ka pula keniye tikakai angaine vala. E aitno itau itau dong vala dong. Lokono.

26Osep tonari tipul dogur ke Ida Tapolngon e tidue elio soulu vala. Deka iye pul dogur ke isak ma tidue elio ka soulu lokono langka ite mnak ite ine. Ari apmang tipli osep arang e tidue elio kap isak kovok. E aitno lisak la ke apmang leklou blang e tidue elio kap isak. 27E osep arang langane blang. Tipli osep arang urok elio ka tiwaiki tidue. Tipli sasarak e isak lana isak ke osep arang e tikepis ke osep arang vala. E ari osep arang tidue elio pulu. Deka Ida Tapolngon kar isak agegeng ma tinamani ine.

28E silang blang langane. Aitno lisak mter langka amtarsak uli Ida Tapolngon ma tidong itau lokono. Deka Ida Tapolngon pul dogur ke isak ma aitno lisak tipolou soulu lokono ma tidue elio bitna bitna ka Ida Tapolngon waiki osep tidue kovok. 29Osep ari tidue elio bitna bitna ka itau kovok. Aurou. Tidue elio bitna bitna ka elio epmes ina vala. Tingale osep urok wan e tidue elio soulu bitna bitna pulu. Aitno lisak rim ke osep urok wan e tidue burwa ke osep. Isak amnga isak pulu e tiyak osep ma tipi urok wan. E tipaiavu osep e tidue adis. 30Tiblou osep leklou dogur lisak e tipalongo osep malak ine. Aitno lisak engil ke Ida Tapolngon. Tiwai pelengon soulu pulu. Aitno lisak vri ke isak e tikakai angainsak tito. Aitno lisak mter ke elio soulu oku ina ka tiwaiki tidue. E tipli sipmarak e titnarak urok pelengon. 31Aitno lisak manga manga ke elio itau. Tiwai dagar e tididi urok pelengon tonari kovok. Isak lana isak ke osep kovok e aitno lisak due gute silang kovok. 32Lama tile omur Ida Tapolngon wai osep ka tidue elio soulu tonari ma timete ine dau tidue. E silang blang langane. Aitno lisak neser ke osep ka tidue elio bitna bitna ka soulu eriar langka tidue.

Currently Selected:

Rom 1: ANT

Highlight

Copy