Rom 2

Ida Tapolngon wade osep ka pula keniye urok elio

1Umoklingen. Umu osep Israel ina umesin elio vri ke osep pula. Umawai tidar pelengon dagar pula ka vri ke isak. Umawai tidar Moses ila sogongon e umu tona umadar sogongon tonari eriar langka umawai tidare. Alo ka umawai sinngen elio vri ke osep tonari lumu sinngen elio bauluk ke umu vala e munu pes umu. Deka lumu pelengon yagos. 2Iteile omur ma Ida Tapolngon ila wadengen due osep ka tidue elio soulu bitna bitna langka ngasogo ine kodong. Ma iye didi ila elio itau lokono e wade osep urok elio ine. 3Umesin elio vri ke osep pula e umawaiki ma Ida Tapolngon ila wadengen due isak. E umu tona umodue elio soulu lokono blang eriar langka tidue. Aitno lumu lange? Umawaiki ma Ida Tapolngon ila wadengen due umu ine kovok? 4Ida Tapolngon dong para ke umu e iye waiki due mada ke umu. Dau tauni kodong iye dong e makai umu e lokono koli lumu elio soulu kovok. Aurou. Iye dong para ke umu vala. Kesua iye waiki aitno lumu mter ila makaingan ma umabauluk aitno lumu ke lumu elio epmes ina. Lama dau tauni iye makai umu kodong aitno lumu mter ila makaingan langka wan adai vala e umodue elio soulu vala. 5E umabauluk aitno lumu ke lumu elio epmes ina bitna bitna kovok. Aurou. Aitno lumu dagar ine vala. Deka Ida Tapolngon aitno ila engil ma due umu batne lumu elio epmes ina polou pula. E mase oklou kene ma Ida Tapolngon wade osep ka pula keniye urok elio kap ila elio itau. Deka ari ma lumu elio epmes ina bitna bitna tingen umu e ma osep tivati. 6Alo ari ma Ida Tapolngon koli batne ke osep ka pula keniye urok elio ka oglou tidue. Langka oglou tidue elio itau ma iye kar isak elio itau. E langka oglou tidue elio soulu ma iye kar isak elio soulu.

7E osep ka tidong dagar ke elio itau tiwaiki ma Ida Tapolngon kar isak urok mosongon ka itau lokono ka dong vala dong. Tiwaiki ma tidong kap iye e ma iye kakai angainsak. E ma Ida Tapolngon due osep urok mosongon itau lokono dong vala dong. 8E osep ka aitno lisak vri ke isak e tipul dogur ke elio itau e tidue elio soulu vala ma Ida Tapolngon aitno engil ke isak. Ma aitno engil lokono ke isak e ila wadengen ma due isak. 9Ma elio soulu e agegeng ka soulu due osep ka pula keniye ka tidue elio soulu vala. Ma due osep Israel ina mgo mase ma due osep ka isak osep Yuda ina kovok. 10E silang blang langane. Ma Ida Tapolngon koli elio ka itau ke osep keniye ka oglou tidue elio itau. Ma iye due elio itau ke osep Israel ina mgo. Deka ma iye due elio itau ke osep ka isak osep Yuda ina kovok blang. Ma aitno epen ke osep keniye ka tidue elio itau. E ma iye kakai angainsak e ma tidong itau kap iye. 11Kesua ma Ida Tapolngon wade osep ka pula keniye eriar vala. Ma iye due elio silang ine kovok.

12Osep ka tile Moses ila sogongon kovok tidue elio soulu pula e timete ke elio epmes ina. E osep Israel ina tile Moses ila sogongon. Lama tile ine isak dau tidue elio soulu vala. Deka Ida Tapolngon ma wade urok elio keniye kap Moses ila sogongon. 13Ida Tapolngon vati osep ka tididi Moses ila sogongon keniye tipolou itau e osuk ke bitna. E osep ka tiklingen ila pelengon e tididie kovok tipolou soulu. 14Osep ka isak osep Yuda ina kovok tile Moses ila sogongon kovok. Lama tile Moses ila sogongon kovok aitno lisak mter urok elio leklou eriar langka Moses ila sogongon. E tididi isak. Deka osep tonari urok elio isuk isuk nis isak ke urok elio leklou ka itau e urok elio leklou ka soulu. Deka tididi elio ka itau lama tile Moses ila sogongon kovok. 15Osep tonari urok elio isuk isuk nis itosep Moses ila sogongon dong ke osep aitno lisak kodong. Kesua aitno lisak mter urok elio isuk isuk ka itau isak elio itau. E silang blang langane. Aling leklou aitno lisak wai lisak kensak kensak langane. “Osep umodue elio soulu.” E aling leklou aitno lisak wai ke isak kensak kensak langane. “Osep umodue elio itau.” 16Ma aitno lisak langane ke oklou ka Ida Tapolngon klingen osep ka pula keniye urok pelengon. Iye rere oklou kene ma iye klingen osep ka pula keniye urok pelengon ine. Deka ke oklou tonari ma Yesus Krais wade osep ka pula keniye aitno lisak lama oglou tibisi ine. Mase ma elio ane polou eriar langka Ida Tapolngon ila omon itau ka nganapapra ine wai ine.

Osep Israel ina aitno lisak dagar ke Moses ila sogongon

17E umu osep Israel ina aitno lumu dagar ke Moses ila sogongon. Aitno lumu mter sogongon tonari karanga lua umu. Umawai umeile omur ke Ida Tapolngon e aitno lumu vri ke umu e umakakai angainmu ine. 18E umeile elio ka Ida Tapolngon waiki umodue. Kesua oglou osep tiparere umu ine kodong. E eknikane umeile elio ka itau e elio ka soulu ma umakaranga umawade isak orwo. 19Aitno lumu mter umu osep ka tilua osep ka amtarsak evin ma tididi ekreng itau. Aitno lumu mter umu langka bublongon gesa ka lua osep ka tidong ke aivoro. 20Aitno lumu mter umu langka osep parerengen ina ke osep ka isak manga manga. Aitno lumu mter langka umu osep parerengen ina ke osep ka isak dau tile omur kovok. Aitno lumu mter umeile omur ke Moses ila sogongon lana ine itau lokono. Deka aitno lumu mter umu osep ka umeile omur ina. E aitno lumu mter lumu pelengon keniye pelengon lokono. 21Umoklingen. Umaparere osep pula e ina lange umaparere umu tona kovok? Umanapapra ke osep e umawai langane. “Osep umapanako wan sakam.” E ina lange umu tona umapanako wan? 22E silang umawai ke osep langane. “Osep umodue okwa sakam.” E umu tona umodue okwa. E silang blang langane. Umawai ke osep ka aitno lisak dagar ke sapingen bitna bitna isak tidue elio soulu lokono. E umu tona umapanako wan bitna bitna ke sapingen urok ninu. 23Umakakai angainmu e umawai langane. “Imeile omur ke Moses ila sogongon.” Umawai langane e umu tona umadar Moses ila sogongon deka lumu elio ka soulu pes Ida Tapolngon angaine. 24Oglou osep ka tisogo Ida Tapolngon ila pelengon tisogo langane.

“Osep ka isak osep Yuda ina kovok tiwai soulu lokono ke Ida Tapolngon. Tiwai soulu ine e tipes angaine kesua batne tivati umu osep Israel ina lumu elio soulu.”#2.24 — Emritim pelengon langane ke Testamen Oglou Ina ke Aisaia 52.5.

Elio ulangngan ina

25Oglou Ida Tapolngon kar umu nisngen ka elio ulangngan ina. Langka umedidi Moses ila sogo-ngon itau ma lumu elio ulangngan ina nis osep umu Ida Tapolngon ila osep. E langka umadar Moses ila sogongon vala ma lumu elio ka ulangngan ina lua umu kovok. E ma umodong langka osep ka tididi elio ulangngan ina kovok. 26Si-lang blang langane. Langka osep ka isak osep Yuda ina kovok tididi elio ulangngan ina kovok e dau tididi Moses ila sogongon itau ma Ida Tapolngon aitno itau ke isak koke aurou? Ma aitno itau ke isak langka oglou tididi elio ulangngan ina lokono. 27Silang blang lang-ane. Osep ka isak osep Yuda ina kovok urok elio leklou mole umu osep Israel ina lumu elio leklou. Kesua lama isak tididi elio ulangngan ina kovok isak dau tididi Moses ila sogongon itau. E umeile Moses ila sogongon e umedidi elio ulangngan ina. Lama umedidi elio ulangngan ina umu dau umadar Moses ila sogongon pula. E osep ka isak osep Yuda ina kovok tiwai langane. “Osep Yuda ina tidar Moses ila sogongon vala.” 28-29Umoklingen. Gute ka didi elio ulangngan ina vala iye gute Yuda ina lokono kovok. Aurou. Gute ka iye gute Yuda ina lokono iye tona aitno dagar ke Ida Tapolngon. Iye tona gute ka Ida Tapolngon ile aitno kodong. E elio ka Ida Tapolngon rere osep ila osep didi Moses ila sogongon kovok. Aurou. Elio ka Ida Tapolngon rere osep didi Ano Itau ila elio vala. Osep ka Ida Tapolngon rere isak tikakai angainsak pulu ine kovok. Aurou. Ma Ida Tapolngon kakai osep tonari angainsak ine vala.

Currently Selected:

Rom 2: ANT

Highlight

Copy