Aposel 23

1Deka Pol bitna nekek ke osep kaunsil ina e wai ke isak langane. “Sipmi umoklingen. Ke oglou me iding ke eknikane ke Ida Tapolngon bitna ngadidi ila pelengon e aitno lungong kro ke lou elio gesa kovok.” 2Pol wai langane deka gute Ananaias ka gute loulou ina ka mgo wai ke osep ka tivri olwo boto ke Pol langane. “Osep. Umomluk Pol ene.” 3E Pol wai ke iye langane. “Ma Ida Tapolngon mluk wom kesua wom langka ninu ka ina akai sasi ka osep tisak pen ine ma bitna langka itau. Omdong are langka emdidi Moses ila sogongon ma amwade ngong ine e wom tona amwai ke osep ma timluk ngong e ke elio ane amdar sogongon tonari.” 4Pol wai langane deka osep ka tivri olwo boto ke iye tiwai ke iye langane. “Ai lange? Amwaiki amwai soulu ke Ida Tapolngon ila gute loulou ina ka mgo?” 5E Pol koli wai langane. “Sipmi. Ngaile omur ke gute are kovok. Langka ngaile omur gute are iye gute loulou ina ka mgo ngawai langane kovok. Kesua Ida Tapolngon ila pelengon wai ke ite langane. ‘Osep umawai soulu ke osep ka tiplau umu sakam.’”

6Ari Pol ile osep leklou isak osep Farisi ina e osep leklou isak osep Sadyusi ina deka iye wai omba langane. “Sipmi umoklingen. Livou iye gute Farisi ina e ngong blang gute Farisi ina. Eriar langka osep Farisi ina aitno lisak dagar langka gute ka mete ano la e mase ma iye poga tito ke ina denga aitno lungong dagar langane blang. Eknikane umesin elio vri ke ngong batne aitno lungong dagar e ngapara ke elio langane.” 7Pol wai langane deka lokono osep Farisi ina e osep Sadyusi ina tipara pulu pelengon e osep ka tiduni pulu ari tidardar ine. 8Alo ari osep Sadyusi ina tiwai gute ka mete e ano la iye poga tito ke ina denga kovok. Tiwai ensel tidong kovok e osep ansak tidong kovok. E osep Farisi ina tiwai langka osep timete mase ma tipoga titito ke inarak denga. Silang tiwai ensel tidong e osep ansak tidong. 9Osep tonari tidaiku e tiwai pula ine. Deka osep leklou ka isak osep Farisi ina ka tile itau ke Moses ila sogongon tivri e tiwai dagar langane. “Imavati gute ane e aitno limi mter iye dar pelengon dagar gesa kovok. Langka ensel gesa koke gute gesa ano wai ke iye ma itousine?” 10Ari osep tikot pulu omba deka osep ola ina inarak plaungan ka mgo vati elio ane e iye lim ine. Kesua iye ulou tarna langka osep tipi pulu Pol ma Pol pampamu ine notrum e ma iye mete. Deka iye wai ke osep ola ina langane. “Umala umoduru umepi Pol ke isak deka umapaur iye ke limem ninu.” Deka osep ola ina tididi ila pelengon.

11Pol dong ke ninu tonari la lama epmes deka Ida Puda vri ke galna e wai ke iye langane. “Wom arit wom vala e emlim kovok. Eriar langka ampalongo osep ke ngong ke Jerusalem ane ma amla ampalongo langane ke Rom blang.”

12Oklou silang osep Yuda ina leklou tilalo pelengon pulu e tiwai promis dagar pulu langane. “Itepli ida ngangon e ida aki la lama itodue burwa ke Pol.” 13Osep tonari ka tiwai dagar pulu inarak sasa mole isapanal. 14Deka isak kla tipolou ke osep loulou ina ka omba e osep namormor e tiwai langane. “Imi ane imawai dagar lokono ma imepli ipem ngangon la lama imodue burwa ke Pol. 15Deka umogosok osep kaunsil ina umavai omon ke osep ola ina inarak plaungan ka mgo e umayak iye langane. ‘Oka. Imawaiki ampagei Pol duru ke imi ma imeklingen ila pelengon blang ma imeile omur ine.’ Umodue langane kesua imi ane ma imodong imapara ke iye ke ekreng. Alo ka iye polou ke imi ma imodue burwa ke iye.”

16E Pol ila agau klingen osep tonari urok pelengon e iye la polou ke osep ola ina urok ninu e sepe deka palongo Pol ine. 17Pol klingen ila agau ila pelengon yagos deka iye gi gute ka plau osep ola ina buno kene me polou ke iye e wai langane. “Ampaur gute auram ane ma iye la polou ke lumu gute plaungan ka mgo. Kesua iye waiki palongo gute tonari ila.” 18Deka gute tonari paur gute auram ma iye la polou ke inarak plaungan ka mgo bitna deka iye wai langane. “Gute Pol ka dong ke kalabus ane wai ke ngong ma ngapaur gute auram ane uti ke wom. Kesua gute auram ane waiki palongo lem ke wan gesa.” 19Deka osep ola ina inarak plaungan ka mgo kis gute auram limla e panene iye e isak orwo kla ma isak tona vala tivri deka gute pmi iye langane. “Amwaiki ampalongo lou ke pelengon lange?”

20Deka gute auram wai ke iye langane. “Osep Yuda ina tilalo pelengon ma tiyak wom ke gute Pol. Tiwaiki oklou silang ma ampaur Pol ke osep kaunsil ina amtarsak. Tiwaiki tiyak wom langka tiwaiki tiklingen Pol ila pelengon blang ma tile omur ine. 21E emklingen urok pelengon kovok. Osep leklou ka inarak sasa mole isapanal tiwai promis dagar ma tipli inarak ngangon e inarak aki la lama tidue burwa ke Pol. Osep tonari tikere isak e tipara ke wom ma emdidi urok pelengon.” 22Osep ola ina inarak plaungan ka mgo klingen gute auram ila pelengon yagos deka wai langane. “Amla e amwai ke osep ke pelengon ka ampalongo lou ine sakam.”

Osep ola ina tipaur Pol la ke Sisaria

23Deka gute plaungan ina ka mgo gi osep orwo ka isak kensak tiplau osep ola ina buno kene e palongo urok langane. “Umodue osep ola ina buno orwo e osep iselme isorwo ka titito kla kap hos e osep buno orwo blang ka tikalke ola. E umekere lumu wan deka ke epmes langka 9 kilok ma umala umoduru ke Sisaria. 24Umodue hos gesa e umekere ma Pol tito dong ine e umolua iye itau ma iye polou ke gute Feliks ka plau omur ari bitna.”

25Deka gute plaungan ina ka mgo sogo pas gesa la ke gute Feliks ka wai langane. 26Ngong Klodius Lisias ngasogo pas ane uti ke wom gute namor Feliks ka omur ane ina plaungan. 27Osep Yuda ina tikis gute ane dagar e tiwaiki tidue burwa ke iye e ngaklingen iye gute Rom ina. E ngagosok osep ola ina imopolou ke isak e imepi iye ke isak. 28E ngawaiki ngaile omur tisin elio vri ke iye batne lange deka ngapaur iye polou ke osep kaunsil ina amtarsak. 29E ngapmi isak ke urok sinngen elio ma ngaile omur ine. E tikoli tiwai iye dar urok pelengon dagar. E ngaile omur iye dar pelengon dagar gesa ka vri ke iye langka itodue la dong ke kalabus koke itomluk iye ma iye mete ine kovok. 30Mase gute gesa me palongo lou langane. “Osep Yuda ina tilalo pelengon ma tidue burwa ine.” Ngaklingen ine deka lokono ngapagei iye polou ke wom. Silang blang ngakar osep ka tisin elio vri ke iye pelengon ma tipolou ke emtem ma emklingen urok pelengon.

31Gute tonari sogo ila pas yagos e kare ke osep ka tipaur Pol. Deka osep ola ina tididi pelengon ka inarak plaungan kare ke isak. Tikere urok wan yagos deka tidue Pol e tisongon armok ke epmes e isak kla tididi ekreng la lama tipolou ke armok Antipatris. 32E oklou silang osep ola ina tibauluk ke urok ninu ka dong ke Jerusalem e osep ka tidong ke hos e kla ine tisongon Antipatris ma tipaur Pol ke armok Sisaria. 33Osep ka tidong ke hos kla la lama tipolou ke Sisaria. E tipaur Pol polou ke gute Feliks e tikar pas ka tikalke ke iye. 34Deka gute ka plau omur tonari ritim pas e pmi Pol langane. “Lem omur batne dong ge?” E Pol koli wai langane. “Lou omur batne omur Silisia.” 35Deka gute tonari wai ke iye langane. “Alo ka osep ka tisin elio vri ke wom tipolou ma ngaklingen lumu pelengon.” Deka iye wai ke osep ola ina langane. “Umapaur gute ane la dong ke Herot ila ninu e umaplau iye itau.”

Currently Selected:

Aposel 23: ANT

Highlight

Copy