Aposel 22

1“Ngau saiver e silivou umo-klingen lou pelengon ane. Ngawaiki ngapalongo lumu ke lou elio ma umeile omur elio soulu dong ke ngong kovok.” 2Osep tiklingen Pol wai ke isak ke pelengon Hibru deka urok pelengon mete e Pol wai ke isak blang langane. 3“Ngong tona gute Yuda ina gesa e nina divir ngong ke Tarsus ka dong ke omur Silisia. Oglou alo ka ngong dau agau ngame ngadong ke armok ane. E alo ari gute Gamaliel parere ngong itau ke udo seia urok pelengon dagar. Iye due langane la lama aitno lungong polou dagar lokono ke Ida Tapolngon eriar langka eknikane umu blang aitno lumu dagar ke iye. 4Mase ngadue agegeng ke osep ka tididi elio oku ina e osep leklou timete ine. Ngakis osep arang e apmang dagar e ngapaur isak tisep ke kalabus. 5Alo ari gute loulou ina ka mgo e osep kaunsil ina tile omur ke lou elio langare. E tisogo pas gesa e tikare ke ngong ma ngakalke la ke sudo ka tidong ke Damaskus. Ari ngakalke pas ka tisogoe e ngala ke Damaskus kesua ngawaiki ngakis osep ka tididi elio oku ina dagar ma time ke Jerusalem e osep tiules isak.”

Pol palongo osep ke elio ka aitno la dagar ke Yesus

(Aposel 9.3-19 e Aposel 26.12-18)

6“Alo ari dau ngadidi ekreng ka la ke Damaskus. Ngapolou olwo boto ke Damaskus langka oklou airavu e lokono bublongon ka mana ke sirva bublo omba e duru lelei ngong. 7E ngagene ke taklak e ngaklingen gute gesa wai langane. ‘Sol Sol ina lange omdue agegeng ke ngong?’ 8Deka nga-koli ngawai langane. ‘Ngau Puda wom sei?’ E gute tonari wai langane. ‘Ngong Yesus ka Nasaret ina ka omdue agegeng ke ngong.’ 9Alo ari osep ka isak kla kap ngong tivati bublongon vala e tiklingen gute ka wai ke ngong ila pelengon kovok. 10Deka ngawai langane. ‘Ngau Puda amwaiki ngadue sua?’ E iye wai langane. ‘Emtito emsep ke Damaskus deka ma gute silang palongo lem ke bokongon ka ngarere ke wom ma omdue.’ 11Ngaklingen pelengon yagos deka lou lesir tipanene ngong e imala ke Damaskus. Tipanene ngong kesua bublongon tonari bublo omba e due omtongu evin.”

12“Ngadong ke Damaskus deka gute Ananaias me polou ke ngong. Iye gute gesa ka didi Moses ila sogongon keniye e osep Yuda ina pula ka tidong ke armok tonari aitno lisak itau ke iye. 13Iye polou ke ngong e vri ke galna lungong e wai langane. ‘Lou aten Sol emtem polou itau.’ Deka lokono omtongu itau e ngavati iye. 14Deka iye palongo lou langane. ‘Ida Tapolngon ka udo seia Inarak Tapolngon rere wom ma emile aitno. Iye rere wom ma amvati gute ka ila elio itau lokono ka ila gute bokongon ina e iye rere wom ma emklingen ila pelengon. 15Ma omdong ila gute meriang ina e ampalongo osep ka pula keniye ke elio ka amvati e pelengon ka emklingen ine. 16E omdong ane batne lange? Emtito itala e omdue elio paunimngen ina. Emsir Yesus angaine ma iye tona lua wom ke lem elio epmes ina e ma iye due noklok la.’”

17“Mase alo ka ngabauluk ke Jerusalem ngala ke Ida Tapolngon ila ninu e ngawai itau ke iye deka ari ngavati ano gesa. 18Ngavati ano e ngavati Ida Puda wai ke ngong langane. ‘Emklingen. Paide omsuong omsongon Jerusalem kesua langka amnapapra ngau basikngen ke osep matamur ane ma tiklingen ine kovok.’ 19Deka ngakoli ngawai langane. ‘Ngau Puda osep matamur tile omur ke elio ka oglou ngadue. Kesua oglou ngala ngasep ke limem duningen ina ninu pula e ngamluk osep pula ka aitno lisak dagar ke wom. E silang ngadue isak kla tisep ke kalabus. 20Oglou alo ka osep tidue burwa ke Stiven ka palongo osep ke wom ngavri olwo boto e ngavati elio are. E ari aitno lungong kene ke ina metengen deka ngaplau osep ka tidue burwa ine urok molo.’ 21Ngakoli Ida Puda ila pelengon langane deka iye wai ke ngong blang langane. ‘Aurou. Amla. Ngapagei wom amla ke osep ka isak osep Yuda ina kovok ka tidong ke omur ka mawa.’”

22Osep Yuda ina tiklingen Pol ila pelengon la lama iye wai langare deka lokono aitno lisak nevlik amnga lokono e tiwai omba langane. “Umemke gute are ma iye mete. Gute langare iye karanga dong kap itosep kovok e ma iye mete vala.” 23Alo ka tidaiku langane osep tonari titrum urok molo e limsak due taklak ina group e urie la egim. 24Deka osep ola ina inarak plaungan ka mgo wai dagar ke osep ola ina leklou langane. “Umodue gute ane sep ke udo ninu deka umoules iye pula e umepmi iye ke ila pelengon. Iye wai lange deka osep aitno lisak nevlik amnga e tidaiku omba ke iye? Ngawaiki ngaile omur ine.” 25E osep ola ina tipou Pol kesua tiwaiki tiules iye. E Pol wai ke gute ka plau osep ola ina buno kene ka vri olwo boto ke iye langane. “Langka umoules gute Rom ina e umoklingen ila pelengon mgo kovok are lumu elio itau koke aurou?”

26Gute tonari klingen Pol ila pelengon deka iye la wai ke osep ola ina inarak plaungan ka mgo langane. “Gute. Amwaiki omdue sua? Kesua gute ari iye gute Rom ina gesa.” 27Deka osep ola ina inarak plaungan ka mgo la polou ke Pol e pmi iye langane. “Oka. Wom gute Rom ina gesa koke aurou?” E Pol koli wai langane. “Ee. Ngong gute Rom ina gesa.” 28Deka gute plaungan ina ka mgo wai langane. “Oka. Oglou ngauri mani pula ke osep gavman ina ka isak osep Rom ina ma ngapolou gute Rom ina.” E Pol koli wai langane. “Ngong langane kovok kesua oglou nina divir ngong ke omur Rom e lokono ngong gute Rom ina.” 29Pol wai langane deka lokono osep ari ka tiwaiki tipmi iye ke ila pelengon batne tinekrik tipolou. E osep ola ina inarak plaungan ka mgo ano nesik kesua osep ola ina tipou Pol ka iye gute Rom ina gesa ke sen.

Pol polou ke osep kaunsil ina amtarsak

30Oklou silang osep ola ina inarak plaungan ka mgo waiki ile omur batne lange osep Yuda ina aitno lisak engil ke Pol. Deka iye wai ke osep ola ina langane. “Umosongon Pol.” E gute tonari vai omon ke osep loulou ina ka omba ma tigosok osep kaunsil ina time tiduni pulu. Osep tiklingen ila pelengon deka tiduni pulu e osep ola ina inarak plaungan ka mgo paur Pol me vri ke osep tonari amtarsak.

Currently Selected:

Aposel 22: ANT

Highlight

Copy