Aposel 24

Osep Yuda ina tisin elio vri ke Pol

1Osep tiplau Pol ke Herot ila ninu la lama oklou elme mela yagos deka ari gute Ananaias ka gute loulou ina ka mgo gosok osep Yuda ina urok osep namormor leklou tisongon Jerusalem e tiduru tipolou ke Sisaria. Alo ari gute Tertulus ka ile omur ke osep Rom ina urok pelengon dagar me kap isak ma iye gosok osep tonari tisin elio vri ke Pol ke Feliks bitna. 2Feliks gi ke Pol ma iye me polou ke osep amtarsak deka gute Tertulus waiki Feliks klingen ila pelengon e wai ke iye langane. “Gute Feliks imi osep Yuda ina limem mosongon dong itau batne omlua imi itau. Amvati elio leklou ka opru imi deka omsogo pelengon dagar ka lua imi ka imodong ke omur ane. 3Imavati elio langane e imi keniye aitno limi itau lokono ke wom batne lem pelengon dagar tonari lua imi osep Yuda ina pula. 4Eknikane ma ngadong ngawai alang ke lou pelengon kovok. Aurou. Ngawaiki omdue elio itau e emklingen limem pelengon ka isuk boto vala. 5Imi ane imavati gute ane due elio soulu lokono polou. Iye lila kap imi osep Yuda ina e sruk osep pula aitno lisak. Iye due elio langane ke omur ka pula keniye. Silang iye mgo ke osep ka tisir isak osep ka gute Nasaret ina. 6-7Silang blang iye waiki due Ida Tapolngon ila ninu polou soulu deka imekis iye dagar. 8E eknikane langka emklingen Pol ila pelengon ma emile omur limem sinngen elio pelengon lokono.”#24.8 — Osep leklou ka tile pelengon Grik itau aitno lisak mter langka pelengon leklou dong ke ves ane. Pelengon tonari langane. “E imawaiki imawade ila elio ine kap limem pelengon dagar. Alo ari gute Lisias ka osep ola ina inarak plaungan ka mgo polou ke imi e iye arit iye e kis Pol dagar e pi iye ke imi. 8 E iye pagei imi ka imawaiki imesin elio vri ke Pol ke wom ma emklingen limem pelengon.” 9Tertulus wai langane e osep Yuda ina tinobru tiwai langane. “Pelengon ane lokono lokono.”

Pol wai ke Feliks

10Osep tiwai langane deka Feliks otuk ine nemit la ke Pol ma iye wai. Deka Pol tito wai langane. “Gute namor. Ngaile oglou me iding ke eknikane amwade osep urok elio kodong. E eknikane aitno lungong itau ke elio ka ngapolou ke emtem ma emklingen lou pelengon. 11Amkaranga emile langane. Oglou isuk boto langka oklou songotno orwo ngala ngapolou ke Jerusalem ma ngalotuim Ida Tapolngon e ngadong dau tauni ine kovok. Empmi osep ka tidong ane e ma tiwai langane blang kesua tile omur ine. 12Osep ane ka tisin elio vri ke ngong tile omur ngapara pulu pelengon kap osep kovok. Tile omur ngasruk osep ka tidong ke Ida Tapolngon ila ninu koke ke osep Yuda ina urok duningen ina ninu aitno lisak kovok. Tile omur ngasruk osep ka tidong ke armok aitno lisak kovok. 13Elio ka tisine vri ke ngong batne dong ge? Aurou. Sinngen elio ka tisine vri ke ngong batne dong kovok. 14Lou elio langane. Eknikane ngadidi elio oku ina batne ke Yesus. E osep ane tiwai elio oku ina iye elio yakngan vala. Eknikane aitno lungong la ke Ida Tapolngon e ngalotuim iye. Eknikane aitno lungong dagar ke Moses ila sogongon keniye e ke osep napaprangan ina urok sogongon keniye. 15Eknikane aitno lungong dagar e ngapara ma mase Ida Tapolngon due osep keniye ka timete kodong tipoga titito ke inarak denga. Ma iye due elio langane ke osep ka itau e ke osep ka soulu. Osep ka tisin elio vri ke ngong aitno lisak dagar langane blang. 16Eknikane ngong arit ngong ma ngadong itau lama ngadue elio soulu ke Ida Tapolngon bitna e ke osep amtarsak blang.”

17“Oglou ngadong ke omur silang tobor pula deka mase ngabauluk ngame ke omur ane blang. Kesua ngawaiki ma nga-kalke mani gesa ma ngakare ke osep Yuda ina ka urok wan isuk boto vala. Silang blang ngawaiki ma ngadue elio opmu ina ke Ida Tapolngon. 18Deka alo ka ngadue langane osep Yuda ina tipolou ke ngong. E ngadong itau e eip ke Ida Tapolngon bitna kodong kesua ngadidi parangan ka limem apu yagos kodong. Ari alo ka ngadue langane osep pula tidong kap ngong kovok. Silang blang gute gesa vri kap ngong ka due ngus omba kovok. 19Ari osep Yuda ina leklou ka time ke omur Esia tipolou ke ngong e tikis ngong dagar. Langka osep tonari tiwaiki tisin elio vri ke ngong ma time tipolou ke emtem e eknikane emklingen urok pelengon. Are elio itau. E tidong ge? 20Oglou ngavri ke osep kaunsil ina amtarsak e tiklingen elio gesa ka vri ke ngong kovok. E langka osep ka tidong ane tiwaiki tipalongo lem ke elio gesa ka vri ke ngong ma tiwai lange? 21Oglou alo ka ngavri ke osep tonari amtarsak ngawai langane. ‘Eknikane umawaiki umawade ngong batne aitno lungong dagar ma Ida Tapolngon due osep ka oglou timete tipoga titito ke inarak denga.’ Ngawai langane e tisin elio vri ke ngong batne ke lou pelengon ane.”

22Feliks ka ile omur ke elio oku ina klingen Pol ila pelengon yagos deka wai langane. “Itomtong ke elio ane la lama gute Lisias ka osep ola ina inarak plaungan ka mgo me polou ke ite deka ma ngaklingen lumu pelengon blang e ngawade ine.” 23Deka Feliks wai ke gute ka plau osep ola ina buno kene langane. “Amplau gute ane itau e omsongon iye lila sasi boto. E langka sisrok tiwaiki time ma tikere iye deka amdangdang isak ine kovok.”

24Oklou leklou mela yagos deka Feliks gosok esna Drusila ka iye apmang Yuda ina gesa time e Feliks wai ke osep langane. “Umapaur Pol me ane.” Deka osep tidue Pol e tipaur iye la polou ke Feliks bitna. Pol polou ke Feliks bitna e palongo ila ke elio ka osep aitno lisak la dagar ke Krais Yesus. 25Pol wai pula ke elio ka itau e osuk e ke elio ka osep tiplau isak itau. Silang iye palongo Feliks ila ke elio ka mase Ida Tapolngon ma wade osep ka pula keniye urok elio. Feliks klingen ila pelengon deka ulou tarna ine e wai langane. “Yagos. Ngaklingen lem pelengon iding ke ane deka yagos. Amla omdong la lama aling gesa alo ka ngawaiki ngaklingen lem pelengon blang deka ma ngapalongo lem ine.” 26Alo ari Feliks waiki ma Pol kar mani ke iye ka mter aitno ma iye songon Pol la. E aling pula iye palongo osep ma tipaur Pol me polou ke bitna ma tiwai pulu. 27E alo ka tobor orwo mela yagos gute Porsius Festus kasip Feliks amune e due ila bokongon. E Feliks waiki osep Yuda ina aitno lisak itau ke iye deka iye due Pol dau dong ke kalabus.

Currently Selected:

Aposel 24: ANT

Highlight

Copy