YouVersion Logo
Search Icon

Aposel 12

12
Gute Herot due burwa ke Jems e due Pita dong ke kalabus
1Alo ari gute Herot ka vri mgo ke osep Yuda ina due agegeng polou ke Ida Tapolngon ila osep leklou. 2Deka iye wai ke osep ola ina langane. “Umodue elil omba e umoblou Jon ina tovro Jems agune kopuk la ma iye mete.” 3Jems mete deka osep Yuda ina aitno lisak itau ine. Herot vati aitno lisak itau ine deka iye wai ke osep ola ina e tikis Pita dagar e tipaur iye la sep ke kalabus. Elio ane polou alo ka osep Yuda ina tidue inarak apu ka tingen bret ka yis dong ine kovok. 4Osep ola ina tonari tidue Pita la ke kalabus kodong deka osep ola ina leklou blang tiplau iye. Osep ka tiplau Pita inarak sasa songotno lumakene. Osep apanal apanal tiplau iye aling kene e tilua pulu ke ina plaungan. Tiplau iye itau kesua Herot waiki alo ka osep Yuda ina inarak apu tonari yagos ma Pita polou ke osep pula amtarsak e ma osep ola ina timke iye ma iye mete. 5Pita dau dong ke kalabus aitno e osep ola ina tiplau iye itau. Alo ari oklou aling aling Ida Tapolngon ila sios tipmi Ida Tapolngon pula ma iye lua Pita.
Ensel gesa lua Pita e iye songon kalabus
6Pita dau dong ke kalabus aitno deka ke oklou ka me Herot waiki Pita polou ke osep pula amtarsak. Epmes polou deka Pita munu kudung airavu ke osep ola ina orwo. Ari tipou sen orwo ke Pita limla orwo e tipou limsak ine blang. Osep ka tiplau kalabus tonari ina ekreng bitna tivri ine e tiplaue itau. 7Deka lokono Ida Puda ila ensel gesa polou ke kalabus aitno e bublongon bublo sepe. Deka ensel tonari mluk Pita galna deka pane iye e wai langane. “Pita omsuong emtito.” Deka lokono sen orwo ka tipou limla ine tinosluk tiduru. 8Deka ensel wai langane. “Emtnei lem molo e ompou lem su.” Pita klingen ensel ila pelengon e didie. Deka ensel wai blang langane. “Emtnei lem kolsinglis emdidi ngong ma itala.” 9Deka Pita didi ensel e isak kla. E Pita ile omur ke elio ka iye due kovok. Aurou. Aitno mter iye vati ano vala. 10Isak orwo time deka tisala gute ola ina ka dong mgongon ina deka tisala gute ola ina ka dong batne ina. Deka tipolou ke kalabus ina ekreng bitna ka ain ina ma isak kla ke dogur. Deka ekreng bitna tonari kene noklok e tisongon kalabus e isak kla ke dogur. Isak kla ke dogur e tididi ekreng isuk boto deka lokono ensel tonari songon Pita deka la.
11Pita dau vri deka iye ile omur ine e wai langane. “Ngaile lokono Ngau Puda pagei ila ensel gesa me e lua ngong. Iye lua ngong kesua oklou ka me Herot gosok osep Yuda ina tiwaiki ngapolou ke amtarsak ma tidue elio soulu ke ngong.” 12Ari Pita ile omur elio ka polou ine kodong deka iye la polou ke Jon tna Maria ila ninu. Jon tonari angaine silang Mak. Alo ari osep pula ka aitno lisak dagar ke Yesus tiduni pulu ke ninu tonari e tiwai itau ke Ida Tapolngon. 13Pita polou ke ninu e limla nopolpol ke ekreng bitna deka apmang bokongon ina ka angaine Roda me waiki klok ninu ina ekreng bitna. 14Roda klingen Pita kreine deka ile omur ine e aitno neser e dau iye klok ninu ina ekreng bitna kovok e suong bauluk ke osep deka wai ke isak langane. “Osep umoklingen. Pita vri ke ninu ane ina ekreng bitna kodong.” 15Osep tonari tikoli tiwai ke iye langane. “Ai wom kaka lokono.” Deka Roda dau dagar iye ke ila pelengon deka osep tikoli tiwai ke iye langane. “Aurou. Wan ka amvati iye Pita ila ensel vala.”
16Pita dau vri ke ninu ina ekreng bitna e limla nopolpol ine. Deka osep tiklok ninu ina ekreng bitna e tivati Pita vri ine deka tidigrik pula ine. 17Pita kamudu isak ma tiwai kovok deka palongo urok ke elio ka Ida Puda lua iye ma iye songon kalabus. Deka Pita wai langane. “Umapalongo Jems gosok sudo ke elio ane blang.” Iye wai yagos deka songon ninu e la dong ke omur silang.
18Kotkotu lokono polou e osep ola ina ka tiplau Pita tivati Pita kovok deka ansak nesik ine e tipmi pulu langane. “Pita dong ge?” 19Herot waiki Pita polou ke bitna deka pagei osep ola ina leklou ma tipado Pita. Deka isak kla e tikrim ke iye e tipado iye kovok. Deka Herot pmi osep ola ina ka tiplau Pita langane. “Ina lange Pita dong ke kalabus kovok?” Osep ola ina tonari tikaranga tikoli ila pelengon kovok. Deka Herot wai ke osep ola ina leklou blang langane. “Umomluk osep ola ina ane ka tiplau Pita ma timete.” E Herot songon omur Judia deka la duru ke Sisaria e dong are.
Herot mete
20Ari Herot aitno engil lokono ke osep Tair ina e osep Saidon ina. Deka tiduni pulu e tipolou ke Herot bitna e tipmi iye ma aitno epen ke isak. Mgongon tiwai ke gute Blastus ka plau Herot ila ninu ma iye wai dikngen ke Herot. Tiwaiki Herot aitno epen ke isak kesua ke tobor aling aling tikli inarak ngangon ke omur ka Herot vri mgo ine. 21Herot klingen osep tonari urok pelengon deka iye rere oklou gesa ma tipolou ke iye blang ma iye wai ke isak. Alo ari oklou ka Herot rere polou kodong deka iye tnei ila klos ka itau lokono ka iye kene vala karanga tnei. Deka iye dong ke ila kova e kar ila pelengon ke isak. 22Osep pula tiklingen ila pelengon deka tiwai dagar lokono langane. “Gute ane ila pelengon langka itosep udo pelengon kovok. Aurou. Ila pelengon eriar langka tapolngon gesa ila pelengon.” 23Tiwai langane deka lokono Ida Puda ila ensel mke Herot deka mimei tinapak ke aitno e tingen iye deka iye mete. Ensel tonari mke Herot kesua aitno kene ke osep pula ka tikakai iye eriar langka iye Ida Tapolngon e iye kakai Ida Tapolngon angaine kovok.
24Alo ari Ida Puda ila pelengon pakes lila deka osep pula tiklingen ine e aitno lisak la dagar ine. 25Ari Barnabas e Sol tidue urok bokongon ke Jerusalem yagos deka tidue Jon ka angaine silang Mak e tibauluk ke Antiok blang.

Currently Selected:

Aposel 12: ANT

Highlight

Share

Copy

None

Want to have your highlights saved across all your devices? Sign up or sign in