Aposel 13

Osep tivai Barnabas e Sol isak kla ke omur omur

1Alo ari Ida Tapolngon ila osep leklou tidong ke Antiok. Ke armok ari osep leklou isak osep napaprangan ina e osep leklou blang isak osep parerengen ina. Angainsak Barnabas e Simeon ka osep tisir iye Niger e Lusius ka omur Sairini ina e Manain ka dong kap Herot ka vri mgo ke omur ari alo ka iye dau dauding e Sol. 2Alo ka tiduni pulu tiwai itau ke Ida Puda e tikakai angaine tito la egim. E silang tipli inarak ngangon kesua tiwaiki aitno lisak la ke Ida Tapolngon vala. Deka ari Ano Itau wai ke isak langane. “Umerere Barnabas e Sol ma tiboko ke bokongon ka ngarere ke isak.” 3Deka osep tonari tipli inarak ngangon e tidong vala e tiwai itau ke Ida Tapolngon ine. Tidue langane yagos deka tidue limsak tiduru tikai isak orwo deka tivai isak kla.

Barnabas orwo Sol tinapapra Yesus ila omon itau

4Ida Tapolngon Ano Itau pagei isak deka tiduru kla e tipolou ke armok Selusia. Deka tidue sip gesa e tisongon Selusia e isak kla ke aidunu Saiprus. 5Tipolou ine deka tilila la lama tipolou ke armok Salamis. Ari tisep ke osep Yuda ina urok duningen ina ninu deka tinapapra Ida Tapolngon ila pelengon. E Jon blang lua isak ke urok bokongon.

6Tilila ke aidunu Saiprus la lama tipolou ke armok Pafos. Deka ari tisoson gute Yuda ina ka gute borou timla. Gute tonari angaine Barjisas e iye gute napaprangan yakngan ina. 7Iye gute Sergius Paulus ka vri mgo ke omur are ila aten gesa. Sergius Paulus iye gute ka ila ilengen omba e iye gi Barnabas e Sol ma time ke iye kesua iye waiki klingen Ida Tapolngon ila pelengon. 8E gute borou timla tonari waiki dangdang urok pelengon lama Sergius Paulus aitno la dagar ine. Ke pelengon Grik gute borou timla angaine Elimas. 9Deka Ano Itau due Sol ka angaine silang Pol aitno deka bitna nekek dagar ke gute borou timla e wai ke iye langane. 10“Wom Satan otno arang wom. Elio itau ina oul wom. Lem elio keniye yakngan. Eknikane oklou aling aling amwaiki Ida Puda ila elio osuk polou kolok. 11Emklingen. Eknikane Ida Puda ila arit due wom deka emtem evin. Deka ma amvati oklou ila bublongon kovok. Ma emtem evin la iding ke alo ka Ida Tapolngon lua wom ine blang.” Pol wai langane deka lokono wan langka gaup kading bitna deka iye vati omur kovok. Deka iye lila krim osep leklou ma tipanene iye kesua bitna evin. 12Alo ka Sergius Paulus ka vri mgo ke omur are vati elio ane aitno la dagar ke Ida Puda. Deka aitno mter pula ke ila pelengon.

Pol orwo Barnabas tiboko ke Antiok ka dong ke omur Pisidia

13Mase Pol kap osep ka tigosok iye tikli sip e tisongon Pafos e isak kla ke armok Perga ka dong ke omur Pamfilia. E ari Jon songon isak deka iye bauluk la ke Jerusalem. 14Tisongon Perga e isak kla tipolou ke armok Antiok ka dong ke omur Pisidia. Tipolou ke armok tonari kodong deka oklou sabat polou e isak kla ke osep Yuda ina urok duningen ina ninu gesa e tisepe e tidong ine. 15Tidong ine deka gute ka plau osep Yuda ina urok duningen ina ninu tonari ritim Moses ila sogongon e osep napaprangan ina urok sogongon e osep keniye tiklingen ine. Gute tonari due langane yagos deka wai ke Pol gosok sisrok langane. “Langka umawaiki umakar pelengon gesa ke imi ka lua imi deka umawai ine.”

16Deka Pol tito vri e kamudu isak deka wai langane. “Umu ka osep Israel ina e umu ka osep Israel ina kovok ka aitno lumu la ke Ida Tapolngon umoklingen lou pelengon. 17Oglou Ida Tapolngon rere itosep Israel ina udo seia ma isak ila osep. Mase alo ka udo seia tidong ke omur Isip ka inarak omur kovok iye due isak tires tipolou pula. Mase iye didi ila arit e mgo ke isak deka tisongon omur Isip. 18Tisongon omur Isip deka tipolou tidong ke omur ka dong adai vala la lama tobor isapanal mela yagos. Lama ari Ida Tapolngon kere isak itau aitno lisak la lokono ke iye kovok. 19Mase tisongon omur tonari e tisep ke omur Kenan. Deka ari Ida Tapolngon mgo ke isak e ila arit mole osep Kenan ina ka tidong ke omur lumorwo. Deka iye kar omur tonari ke osep Israel ina e omur tonari polou urok omur. Deka tidong ine ke tobor 450.

20“Deka Ida Tapolngon lua isak e rere osep leklou tidong inarak plaungan. Osep plaungan ina tiplau osep Israel ina la lama iding ke alo ka gute napaprangan ina Samuel polou. 21Alo ka Samuel dong tipmi Ida Tapolngon ma gute kene vri mgo ke isak. Deka Ida Tapolngon rere Kis otno arang Sol ka ila osua osep Benjamin ina ma iye vri mgo ke isak. Deka iye vri mgo ke isak tobor isapanal. 22Sol vri mgo ke isak tobor isapanal deka Ida Tapolngon pli iye e rere Devit ma iye kasip Sol amune. Ida Tapolngon wai ke Devit ila elio isuk isuk langane. ‘Devit ka Jesi otno arang iye lana iye omba lokono ke ngong e didi aitno kovok. E iye didi aitno lungong vala.’ 23Ari Ida Tapolngon wai dagar ke Devit langane. ‘Mase ma lem napakngan kene ka me batne ma iye polou osep Israel ina Inarak Luangan.’ Mase dau tauni Ida Tapolngon didi ila promis deka pagei Yesus ke itosep Israel ina.”

24“Alo ka Yesus dau polou kovok Jon napapra ke osep Israel ina langane. ‘Umabauluk aitno lumu ke lumu elio epmes ina deka umodue elio paunimngen ina.’ 25Jon napapra ke isak alo ka isuk boto iye due ila bokongon yagos e wai ke isak langane. ‘Aitno lumu lange ke ngong? Umoklingen. Ngong gute ka umapara ke iye kovok. Iye gute gesa ka me batne ke ngong. Ma iye me deka ngakaranga ngakles ila su kovok kesua ngong gute itau lokono kovok.’”

26E Pol dau wai ke isak langane. “Sipmi. Umu ka Abraham ila osua e umu leklou ka aitno lumu dagar ke Ida Tapolngon umoklingen lou pelengon ane. Ida Tapolngon pagei ila pelengon me ke ite kodong ka parere ite ke elio ka lua ite ke udo elio epmes ina. 27Oglou osep ka tidong ke Jerusalem tigosok osep ngongle tile omur ke osep napaprangan ina urok sogongon lana ine kovok. Sabat aling aling tiritim sogongon tonari e tile lana ine kovok. Lama tile ine kovok urok elio ka tisin elio vri ke Yesus didi osep napaprangan ina urok sogongon. Deka sogongon tonari polou lokono. 28Osep tisin elio vri ke iye e sinngen elio kene gesa vri ke iye kovok. Lama ila elio vri ke iye kovok isak dau tipmi Pailat ma iye palongo osep leklou ma tidue burwa ke iye. 29Osep ari tidue burwa ke iye eriar langka oglou osep napaprangan ina tisogo ine deka urok sogongon polou lokono. Deka osep leklou tipi nil ke kamla e limla e tidue duru ke ina akai deka tipaur pampamu ine la munu ke ina denga. 30Iye munu ke ina denga kodong deka mase Ida Tapolngon due poga tito ke ina denga. 31Iye poga tito deka ke oklou pula iye polou ke osep leklou ka oglou isak tigosok Yesus tisongon omur Galili deka isak kla ke Jerusalem. E oku ane itapalongo osep Israel ina ine.”

32-33“Eknikane imawai ke umu ke omon itau ka la ke Ida Tapolngon ila promis ke oglou iye wai ke udo seia. Deka ke ite ka urok napakngan eknikane ila promis tonari polou lokono. Iye due Yesus poga tito ke ina denga eriar langka oglou ila pelengon ka dong ke Buk Song sapta orwo wai ine. Pelengon tonari wai langane.

‘Eknikane wom tona erigu wom e abo ngong.’”

34“Ari Ida Tapolngon due poga tito kodong deka eknikane iye dong blang. Deka ma iye bauluk ke ina denga blang ma pampamu ine polou okus kovok. Kesua oglou Ida Tapolngon wai langane.

‘Ma ngakar umu ke elio itau e kerengen itau langka oglou ngawai ke Devit ine.’

35-36Ida Tapolngon ila pele-ngon leklou ka dong ke Buk Song palma silang wai langane.

‘Ma omsongon gute itau kovok e pampamu ine ma polou okus kovok.’”

“Pelengon ane la ke Devit kovok. Kesua oglou alo ka gute Devit dong ke taklak iye didi Ida Tapolngon aitno la lama iding ke alo ka iye mete. Iye mete deka osep tiyas iye olwo boto ke ila seia inarak denga deka pampamu ine polou okus. 37Devit pampamu ine polou okus e gute ka Ida Tapolngon due poga tito pampamu ine polou okus kovok. 38Sipmi. Umoklingen lou pelengon. Gute Yesus karanga lua umu ke lumu elio epmes ina batne ke iye. 39Iye lua osep ka pula keniye ka aitno lisak dagar ke iye ke urok elio epmes ina e due noklok la. E pelengon dagar ka Moses kare ke osep karanga due elio epmes ina noklok la kovok. 40Osep umeile umu itau lama elio polou ke umu langka oglou osep napaprangan ina tisogo ine. 41Oglou ari tisogo langane.

‘Alo ka umu dau umodong ma ngadue elio gesa ka umedigrik ine. Lama osep tipalongo lumu ine aitno lumu dagar ine kovok. Umu ka umodue apok ma umavati elio gesa ka ngadue. Deka ma umedigrik ine e umemete ine.’”

42Pol orwo Barnabas tiwai yagos deka tisongon osep Yuda ina urok duningen ina ninu tonari. Deka osep ka tidong ine tiwai dagar ke isak langane. “Sabat ka amtada ari ma umaparere imi ke pelengon ane blang.” 43Deka osep tisongon duningen ina ninu e tidardar kla. E osep Yuda ina pula tigosok osep ka tididi osep Yuda ina inarak apu tididi Pol orwo Barnabas. E tikar pelengon dagar ke osep tonari ma aitno lisak dong dagar ke Ida Tapolngon ila makaingan.

44Sabat silang polou deka isuk boto osep ka pula keniye ka tidong ke armok ari time tiduni pulu ma tiklingen Ida Tapolngon ila pelengon blang. 45Deka osep Yuda ina tivati osep pula pula tiduni pulu e aitno lisak rim ine. E tipara pulu Pol ila pelengon e tiwai soulu ke iye. 46Deka Pol orwo Barnabas tilim ke isak kovok e tiwai dagar ke isak langane. “Mgongon imawai Ida Tapolngon ila pelengon ke umu ka osep Yuda ina. E umoklingen ine deka umopul dogur ine e umeplie. Deka eknikane imala ke osep ka isak osep Yuda ina kovok. Imodue langane kesua umepli Ida Tapolngon ila pelengon. Umawaiki Ida Tapolngon lua umu kovok e kar umu lumu mosongon ka dong vala dong kovok. 47Ipem Puda kar imi pelengon langane.

‘Ngarere umu ma umodong langka bublongon ke osep ka isak osep Yuda ina kovok. Deka ma umolua osep ka tidong ke omur omur ma Ida Tapolngon lua isak ke urok elio epmes ina.’”

48Osep ka isak osep Yuda ina kovok tiklingen Pol orwo Barnabas urok pelengon deka aitno lisak neser ine. Deka tiwai langane. “Ida Puda ila pelengon itau lokono.” Deka osep keniye ka Ida Tapolngon rere isak ila osep aitno lisak la dagar ine. 49Deka Ida Puda ila pelengon pakes lila ke omur ari keniye. 50Ari osep Yuda ina tisruk apmang ngongle ka tidue elio itau e tidue anit ke Ida Tapolngon aitno lisak e osep ngongle aitno lisak deka osep tonari tidue agegeng ke Pol orwo Barnabas. Deka tisik isak e tisongon omur tonari kla. 51Deka Pol orwo Barnabas tisak taklak ina group ka dong ke kamsak ke isak. Are nisngen gesa ke osep tonari ma tile omur urok elio soulu. Deka isak kla ke armok Aikoniam. 52Ari Yesus ila disaipel ka tidong ke Antiok aitno lisak itau lokono e Ano Itau plau isak itau.

Currently Selected:

Aposel 13: ANT

Highlight

Copy