Aposel 11

Pita palongo osep ke elio ka polou ke Kornilius

1Osep aposel e osep ka aitno lisak dagar ke Yesus ka tidong ke omur Judia tiklingen omon osep ka isak osep Yuda ina kovok aitno lisak la dagar ke Ida Tapolngon ila pelengon. 2Ari Pita tito la ke Jerusalem deka osep leklou ka tididi inarak apu ka ulangngan ina tiluk iye langane. 3“Ina lange amla omdong kap osep ka tididi udo apu ka ulangngan ina kovok? Ina lange omdong kap isak e umogosok umangen ngangon?”

4Pita klingen urok pelengon deka iye palongo urok ke elio ka polou ke Kornilius gosok sisrok batne la gurno. Iye wai langane. 5“Alo ka ngadong ke Jopa oklou gesa ngadong e ngawai itau ke Ida Tapolngon deka ngavati ano gesa. Ngavati wan langka molo ombatno duru ke omur ka egim. Molo tonari duru e galou apanal tipou topurne leklou leklou e molo duru ke taklak e polou olwo boto ke ngong. 6Omtongu nekek dagar ke molo deka ngavati ongwa bitna bitna ka tidong ine. Ngavati ongwa kevena e wan bitna bitna ka tirarai e monuk bitna bitna tidong ine. 7Ngavatie deka ngaklingen Ida Tapolngon wai langane. ‘Pita emtito ommluk ongwa gesa deka emngene.’ 8Deka ngakoli ngawai langane. ‘Ngau Puda aurou va. Oglou ngangen wan ka amdangdang imi osep Yuda ina ine aling kene kovok.’ 9Ngawai langane deka ngaklingen Ida Tapolngon wai ke ngong ke omur ka egim aling orwo ina langane. ‘Eriar langka Ngap Tapolngon wai wan ka amvati ane ngangon itau deka emsire ngangon soulu kovok.’ 10Elio ane polou aling eklu ina deka lokono wan keniye tito la ke omur heven blang. 11Deka lokono osep arang eklu tipolou ke ninu ka imodong ine. Gute gesa ka dong ke armok Sisaria pagei isak time ke ngong. 12Deka Ano Itau wai ke ngong langane. ‘Wom amla kap isak e aitno lugom orwo ine sakam.’ Alo ari sipmi lumakene ane tigosok ngong deka imala imopolou ke Kornilius deka imesep ke ila ninu. 13E Kornilius palongo limem langane. ‘Ngadong ke lou ninu aitno deka ngavati ensel gesa vri ine deka iye palongo lou langane. “Ampagei osep leklou tiduru ke Jopa ma tipolou ke gute Saimon ka angaine silang Pita ma tipaur iye tibauluk blang. 14Ma iye kar pelengon ke wom ka lua wom ke lem elio epmes ina e lua osep keniye ka tidong ke lem ninu blang.”’ 15Ari Kornilius wai langane yagos deka ngawai ke Kornilius gosok sisrok. Alo ka ngawai ke isak deka lokono Ano Itau duru sep ke aitno lisak eriar langka mgongon iye sep ke aitno lite. 16Elio ane polou deka omtongu sisir Ida Puda ila pelengon ka oglou iye wai langane. ‘Eknikane Jon paunim umu ke aki. Mase ma Ida Tapolngon due Ano Itau dong ke aitno lumu.’ 17Deka ngavati Ida Tapolngon kar Ano Itau ke osep tonari eriar langka oglou iye kar iye ke ite ka aitno lite la dagar ke Ida Puda Yesus Krais. Ari aitno lungong langka ngong sei ma ngadangdang Ida Tapolngon ine?”

18Osep ka tiluk Pita tiklingen ila pelengon deka tikoli ila pele-ngon kovok. Aurou. Tikakai Ida Tapolngon angaine tito ine e tiwai langane. “Eknikane Ida Tapolngon due elio itau ke osep ka isak osep Yuda ina kovok e lua isak ma tikaranga tibauluk aitno lisak ke urok elio epmes ina e kar isak mosongon oku ina.”

Osep ka aitno lisak dagar ke Yesus ka tidong ke Antiok

19Alo ari osep tidue burwa ke Stiven kodong e tidue agegeng pula ke osep ka aitno lisak dagar ke Yesus blang. Deka ke batne langane osep ka aitno lisak dagar ke Yesus tidardar kla ke omur Fonisia e aidunu Saiprus e armok Antiok. Alo ari tinapapra Yesus ila omon itau ke osep Yuda ina vala. E tinapapra kovok ke osep ka isak osep Yuda ina kovok. 20E osep leklou ka osep Saiprus ina e osep Sairini ina isak kla ke Antiok deka ari tinapapra Yesus ila omon itau ke osep Grik ina. 21Ari Ida Tapolngon ila arit lua osep ka tinapapra Yesus ila omon itau deka osep pula tiklingen ine e aitno lisak la dagar ke Ida Puda.

22Ida Tapolngon ila osep ka tidong ke Jerusalem tiklingen omon ke elio ane deka tipagei Barnabas ma iye la ke Antiok. 23Barnabas la polou ke Antiok deka iye vati elio itau ka Ida Tapolngon due ke osep tonari e aitno neser ine. Deka iye wai dagar ke isak langane. “Oklou aling aling aitno lumu dagar lokono ke Ida Puda e aitno lumu kene ke iye e aitno lumu orwo ke iye sakam.” 24Barnabas wai langane kesua ila elio isuk isuk itau. Aitno dagar lokono ke Yesus e Ano Itau plau iye itau. Alo ari osep pula leklou aitno lisak la dagar ke Ida Puda blang.

25Deka Barnabas songon An-tiok e la ke armok Tarsus kesua iye waiki pado Sol. 26Iye polou ke Tarsus e pado Sol kodong deka isak orwo tibauluk ke Antiok deka tidong ine tobor kene. Ari tiduni pulu kap Ida Tapolngon ila osep e tiparere osep pula ke Ida Tapolngon ila pelengon. E ari ke Antiok elio polou mgo ka osep tisir osep ka aitno lisak dagar ke Yesus isak osep Kristen.

27Alo ari osep napaprangan ina leklou tisongon Jerusalem e tiduru ke Antiok. 28Gute napapra-ngan ina kene angaine Agabus. Ano Itau due aitno deka iye vri e wai sapanga ombatno ma polou ke omur ka pula keniye. Mase sapanga ombatno ka iye wai ine polou alo ka gute Klodius vri mgo ke omur ari. 29Deka ari Yesus ila disaipel timter pelengon pulu ma tilua sisrok ka tidong ke omur Judia. Deka isak kensak kensak tilua osep tonari eriar langka tikaranga ine. 30Deka tipaur urok mani ke Barnabas orwo Sol. Deka isak orwo tipaure la ke osep plaungan ina ka aitno lisak dagar ke Yesus ka tidong ke omur Judia.

Currently Selected:

Aposel 11: ANT

Highlight

Copy