Aposel 10
10
Gute Kornilius waiki Pita polou ke iye
1Ari gute gesa dong ke armok Sisaria ka angaine Kornilius. Iye plau osep ola ina buno kene ka tisir isak osep ola ina ka omur Itali ina. 2Gute Kornilius ila elio langane. Iye gosok osep ka tidong ke ila ninu aitno lisak la ke Ida Tapolngon e tidue anit ke iye. Silang iye tuk ila mani leklou e kare ke osep ka urok wan isuk boto vala e tidue batne kovok. E silang blang oklou aling aling iye wai itau ke Ida Tapolngon. 3Oklou kene langka 3 kilok ke kirui iye vati ano. Iye vati ano malak deka Ida Tapolngon ila ensel gesa me ke iye e wai ke iye langane. “Kornilius.” 4Kornilius klingen ensel tonari wai ke iye deka bitna nekek ke iye e ano nesik. Deka iye wai langane. “Ngau Puda omo ane batne lange?” Deka ensel koli wai langane. “Ngap Tapolngon bitna sisir lem elio ka oklou aling aling amwai itau ke iye e ke lem elio ka omtuk lem mani leklou e omlua osep ka urok wan isuk boto vala ine. 5Eknikane ma ampagei osep arang leklou ke Jopa ma tikrim ke gute Saimon ka angaine silang Pita. Ma isak kla e tipado iye deka tipaur iye me ane. 6Iye dong kap gute silang ka angaine Saimon blang ka boko e due wan ke bulmakau tarna lisak ka tisisie ke bulmakau ka timke isak timete kodong. Ila ninu dong olwo boto ke misuon.” 7Ensel wai ke Kornilius yagos deka iye songon iye la. Deka Kornilius gi osep arang orwo ka ila osep bokongon ina e gute ola ina kene ka aitno la ke Ida Tapolngon ke osep ola ina ka aling aling tididi iye deka time ke iye. 8Deka iye palongo urok ke elio keniye ka tipolou deka pagei isak kla ke Jopa.
Pita vati ano gesa
9Oklou silang osep ka Kor-nilius pagei isak ke Jopa dau tididi ekreng e tipolou olwo boto ke Jopa. Alo ka tipolou olwo boto ke Jopa ari oklou airavu. E Pita dong ke ninu gesa deka tito la ke ninu tona ka lava. Iye tito ine kesua iye waiki wai itau ke Ida Tapolngon. 10Alo ari sapanga due Pita deka iye waiki ngen ina ngangon. Alo ka osep tikamlu ina ngangon Pita dau dong ke ninu tona deka iye vati ano gesa. 11Iye vati ano e vati omur ka egim noklok deka vati wan langka molo ombatno duru ke omur ka egim. Molo tonari duru e galou apanal tipou topurne leklou leklou deka molo duru ke taklak. 12Pita vati ongwa bitna bitna e wan bitna bitna ka tirarai ke taklak e monuk bitna bitna. Wan bitna bitna keniye ka iye vati tidong ke molo tonari. 13Deka iye klingen Ida Tapolngon wai langane. “Pita emtito ommluk ongwa gesa ma emngene.” 14Deka Pita koli wai langane. “Ngau Puda aurou va. Oglou ngangen wan gesa ka amdangdang imi osep Yuda ina ine kovok. Deka eknikane langane blang.” 15Deka Ida Tapolngon wai ke iye aling orwo ina langane. “Eriar langka Ngap Tapolngon wai wan ka amvati ane ngangon itau wom emsire ngangon soulu kovok.” 16Elio ane polou aling eklu ina deka molo tonari tito la ke omur heven blang.
17Pita aitno mter pula ke ano lana ine. Iye dau dong langane deka osep ka Kornilius pagei isak tipolou ke Jopa. Tipolou ine deka tikrim ninu ka Saimon dong ine e tipadoe deka tivri ke ninu ina ekreng bitna. 18Tivri ine deka tigi langane. “Gute Saimon ka angaine silang Pita dong ke ninu ane koke aurou?” 19Alo ka tipmi ke iye Pita dau dong ke ninu tona e aitno mter pula ke ano lana ine. Deka Ano Itau wai ke iye langane. “Pita emklingen. Osep eklu time tikrim wom. 20Emtito omduru amla ke osep eklu tonari amtarsak. Deka amla kap isak kesua ngapagei isak ke wom. Lokono emdidi lou pelengon e aitno lugom orwo ine sakam.” 21Pita klingen Ano Itau ila pelengon yagos deka tito e duru la polou ke isak eklu amtarsak deka wai langane. “Osep. Ngong gute ka umekrim ke iye. Umomo ane batne lange?” 22Deka tipalongo Pita ila langane. “Gute Kornilius pagei imi ke wom. Iye gute ka plau osep ola ina buno kene. Ila elio isuk isuk itau e iye due anit ke Ida Tapolngon. Osep Yuda ina ka pula keniye tidue anit ke iye. Ida Tapolngon ila ensel ka itau lokono polou ke Kornilius deka iye wai langane. ‘Ampagei osep leklou ma isak kla tipolou ke gute Pita e tiwai ke Pita ma iye gosok isak tibauluk ke lem ninu ane. Deka emklingen pelengon ka Pita ma kare ke wom.’”
Pita la polou ke Kornilius
23Pita klingen urok pelengon deka wai langane. “Umesep ke ninu ane e ma ngakere umu kesua kirui kodong.” Deka tisep ke ninu e tidong ine la lama kotkotu lokono deka isak keniye tinogrum Jopa e isak kla. Pita gosok osep leklou ka iye sipmi ka osep Jopa ina tigosok kla. 24Osep keniye kla e tididi ekreng la lama epmes deka timunu kudung ke ekreng. Timunu kudung ke ekreng la lama kotkotu lokono deka tinogrum kla deka tipolou ke Sisaria e tisepe. Ari Kornilius gi sisrok ma tigosok ila osua time tiduni pulu ke ila ninu kodong. Tidong ine kesua tipara ke Pita gosok sisrok. 25Pita polou ke Kornilius ila ninu e sepe deka Kornilius grum kamla manik ke iye e waiki lotuim iye. 26Pita vati deka kis limla e lua iye tito e wai ke iye langane. “Aurou. Emtito emvri ane kesua ngong gute blang.” 27Pita dau wai ke iye deka tisep ke ninu e iye vati osep pula ka tiduni pulu tidong ine. 28Pita vati isak yagos deka wai langane. “Osep umeile omur langka imi osep Yuda ina imeneklep ke osep ka isak osep Yuda ina kovok imadar limem pelengon dagar. E eknikane Ida Tapolngon due aitno lungong deka ngaile omur langane. Eknikane Ida Tapolngon waiki ngasir umu ka osep Yuda ina kovok osep soulu kovok. 29Deka eknikane ma ngapul dogur ke umu kovok. Ngaklingen lumu pelengon deka ngame ke omtomu vala. Deka ngapmi umu langane. Ina lange umegi ngong e umawaiki ngame ke umu?”
30Deka Kornilius wai langane. “Oglou oklou apanal la yagos ari ngadong ke lou ninu. Ari 3 kilok ke kirui e ngawai itau ke Ida Tapolngon. Deka gute gesa polou ke omtongu ka ila klos bublo omba. 31Iye polou ke omtongu deka iye wai ke ngong langane. ‘Kornilius oglou amwai itau ke Ngap Tapolngon. Iye klingen lem pele-ngon kodong e bitna sisir ke lem elio itau ka oglou omlua osep ka urok wan isuk boto vala. 32Ampagei osep leklou tiduru ke Jopa ma tipolou ke gute Saimon ka tisir iye Pita. Iye dong kap gute silang ka angaine Saimon blang ka boko e due wan ke bulmakau tarna lisak ka tisisie ke bulmakau ka timke isak timete kodong. Ila ninu dong olwo boto ke misuon.’ 33Ngaklingen pelengon ka nga-palongo lem ine yagos deka lokono ngapagei osep tiuti ke wom ma tipaur wom omo ane ma omlua imi. Deka omdue elio itau ke imi e omo ane. E imodong ane ke Ida Tapolngon bitna kesua imawaiki imeklingen pelengon keniye ka Ida Puda palongo lem ine.”
34Pita klingen Kornilius ila pelengon deka wai langane. “Eknik-ane ngaile omur Ida Tapolngon aitno la ke osep ka pula keniye. Iye pul dogur ke osep leklou kovok. 35Eknikane Ida Tapolngon aitno itau ke osep ka pula keniye ka tidong ke omur ka pula keniye ka tidue anit ke iye e tidue elio itau. 36Umeile omon itau ka oglou iye pagei ke imi osep Israel ina. Pelengon tonari la ke Yesus Krais. Deka eknikane imi e Ida Tapolngon aitno limi epen pulu batne ke iye. Iye osep keniye Inarak Puda. 37Mgo Jon nogrum napapra ke elio paunimngen ina ke omur Galili. Deka mase ila pelengon la ke omur Judia keniye e umeile ine. 38Alo ari Ida Tapolngon due Ano Itau sep ke Yesus ka Nasaret ina aitno e kar iye ila arit. Deka iye lila due elio itau e lua osep ka angelo soulu due isak manga manga. Iye due elio langane kesua Ida Tapolngon dong kap iye. 39Imavati ila elio keniye ka iye due ke osep Yuda ina urok omur e ke Jerusalem. Tidue burwa ke iye deka iye mana ke ina akai deka mete. 40Iye mete e oklou eklu mela yagos deka Ida Tapolngon due poga tito ke ina denga. Deka iye due polou ke emtemi e imeile itau ine. 41Iye polou ke osep ka pula keniye amtarsak kovok. Aurou. Iye polou ke imi ka Ida Tapolngon rere imi kodong emtemi ma imavati. Iye dong kap imi deka imangen ngangon e imeinim aki kap iye. 42Deka iye kar pelengon ke imi ka iye waiki imanapapra ina basikngen ke osep ka pula keniye. Iye waiki imanapapra ke osep iye tona gute ka Ida Tapolngon rere ma iye wade osep ka tidong e osep ka timete kodong urok elio. 43Oglou osep napaprangan ina keniye tiwai ine langane. ‘Osep ka pula keniye ka aitno lisak dagar ke iye ma iye due urok elio epmes ina noklok la batne ke iye tona.’”
44Alo ka Pita dau wai ke isak Ano Itau duru sep ke osep keniye ka tiklingen ila pelengon aitno lisak. 45Osep Yuda ina ka aitno lisak dagar ke Yesus ka time kap Pita tivati Ano Itau sep ke osep tonari aitno lisak deka tidigrik ine e tiwai langane. “Ida Tapolngon kar Ano Itau ke osep ane ka isak osep Yuda ina kovok blang.” 46Tidigrik ine kesua tiklingen isak tiwai pelengon bitna bitna e tikakai Ida Tapolngon angaine tito la egim lokono. Deka Pita napapra ke isak langane. 47“Eknikane Ida Tapolngon Ano Itau dong ke osep ane aitno lisak eriar langka iye dong ke aitno lite. Aitno lumu lange? Ma tididi elio paunimngen ina koke aurou? Ma tididie kesua itakaranga itadangdang isak ine kovok.” 48Deka Pita palongo urok langane. “Osep umodue elio paunimngen ina ke Yesus Krais angaine.” Iye palongo urok langane yagos deka tiwai ke iye langane. “Omdong kap imi oklou leklou deka ma omsongon armok amla.”
Currently Selected:
Aposel 10: ANT
Highlight
Share
Copy

Want to have your highlights saved across all your devices? Sign up or sign in
copyright 2003 New Tribes Mission, Sanford, FL 32771