YouVersion Logo
Search Icon

Marko 13

13
1Mtano ekifuma ghati ya hekalu, amburra mwe wa waanalosha wakwe, Mlosha, yoa mabwe ani na majengo ani! 2Ekitalua Yesu akamburra, Wawona ama majengo mabaha? telineshighwa ibwe wanga ya ibwe, lisighushwa. 3Mtano ekiikaa si ghati ya nduwi ya zeituni ekikulotija hekalu, wakambujanya hena mbiso, Petro na Yakobo na Yohana na Andrea, 4Utuwurre, ama meneoka rini? na nikini luwano ama mose meneikamafike? 5Ekiwatalua, akawoka kuteta, Yoeni mundu asimukenge; 6amu weingi weneza hena izina langu, wekiteta, Nimi, na wenekenga weingi. 7Muneikamusikie ngondo na mburi ja ngondo, musirighiwe, amu tovina huwo vioke, nde kuidiwika tokumefika. 8Mbare inewuka wanga ya mbare, na ufumwa wanga ya ufumwa; meneoka madedemo handu handu, jineoka nzaa na kilinganya. Ama kuwoka kwa mawiwi.
9Yoeni unywi wenye; amu wenemung’ola hena malumungu, na ghati ya masunagogi munebighwa, na muneetwe musongorana wa manjama na wafumwa hena lwangu, hena uwonjo hawo. 10Na ghati ya mbare jose iwe kuwoka Anjili itindwe. 11Weneikawamuete weking’ola, musirighiwe kuwoka muneteta kini, nete musikusare, kake kila munekiingwa unywi magheri mala, kila mukitete, amu si unywi muteta, nde Ngoma Mshenete. 12Mundwawo eneng’ola mundwawo hena kufwa, na wawee mwana, na waana weneimuka wanga ya wawona wawo, nawo wenewafwija. 13Muneoka mukishishirwa ni wose hena lwa izina langu, naye eneghumiria mtano kuidiwa, uu enekia.
14Muneikamuuwone ushishirwo wa utwekwa, utetiwe na Danieli mroti, uimuke handu hesiwe, (esomaye atwarije), niho wala weoho ghati ya Uyahudi wamatuke nduwini; 15naye eoho wanga ya ghu asisee ghati ya nyumba, nete asiingie atike kindu ghati ya nyumba yakwe; 16naye eoho ghati ya miteme asigharuke nyuma auhe suke yakwe. 17Wukiwa wawo wemee, nawo weamusha misi ila. 18Ombeni musiwone kumatuka magheri ma kiho. 19Amu misi ila uneoka wukiwa sa isihuwo too kuwoka kwa kulunga ekinalunge Izuwa mtano ingeriaha, nete teuneoka. 20Nete Mzuri esiduhushe misi ila, toukikia muri, kake hena lwawo wasawurwa, ewasawure, aiduhusha misi. 21Magheri mala mundu ekimburra, Yoa aha Masihi, kana, Yoa uko, musimwitikije. 22Amu wenewukika masihi wa maongo na waroti wa maongo, weneng’ola maluwano na vindu vya kuing’asija, mtano kukenga, idje kuidima kuketika, nawo wasawurwa. 23Yoeni unywi, namburra unywi kuwoka kwa vyose.
24Kake misi ila, kutera kwa wukiwa ula, izuwa linegherwa kija, na mweji touneketa changaji chakwe, 25na ndondo ja wanga jineoka jikigwa, na zinya ja wanga jinededema. 26Niho weneikambone Mwana wa Adamu ekiza ghati ya majumbi na zinya nyingi na ubaha. 27Niho eneikaetuma malaika wakwe, nawo wenewunganya wasawurwa wakwe ghati ya ngungu nne, ghati ya kuiting’o kwa masanga mtano kuiting’o kwa wanga. 28Hena mtini mukuloshe fwanano: mbande yakwe ikioka ingeriaha irarike, na kusheusha mani, mutisiwe ti magheri ma irukiruki ni afuhi. 29Huwo na unywi mkiwona ama maoka, tisiweni ti afuhi ingeriaha mbengeni. 30Amin namburra, ti irika ili telinevetia mtano ama mose meoka. 31Wanga na si jinevetia, viteto vyangu tevivetia vyo.
32Vindu vya misi ila na magheri tehena etisiwe, nete malaika weoho wanga, nete Mwana, esiokie Wawee. 33Yoeni, cheweni na ombeni, amu tomutisiwe rini ni magheri. 34Sa mundu ezoka ekishigha nyumba yakwe, ekiwainga wazoro wakwe luidimo, na mundu ose ndima yakwe, na mwinda mbenge amwaghanya achewe. 35Amu ii cheweni, tomutisiwe magheri mbaha wa nyumba eza, chamagheri, kana kio ghati, kana marekero, kana heyawo: 36asize turu na turu kumbona unywi mushinjie. 37Kila namburra unywi nawawurra wose, Cheweni.

Currently Selected:

Marko 13: TAVETA

Highlight

Share

Copy

None

Want to have your highlights saved across all your devices? Sign up or sign in