Marko 12

1Akawoka kuwawurra hena fwanano. Mundu edongie mizabibu, akajungulusha kirigha, akafurira iwongo, akajenga mnara, akawizija hena waimi, akazoka. 2Akatuma mzoro ha waimi magheri makwe auhie hena waimi magherwa ma mizabibu. 3Awa wekimwuha wakambigha wakamkinya esina kindu. 4Akatumawa hawo mzoro ungi. Uu wakambiritia mabwe, wakamghera arata mtwi, wakamkinya ekihalelwa. 5Akaingijawa ungi, wakamkoma. Na wengi weingi; wengi wakabighwa, wengi wakakomwa. 6Mtano ekioka na mwana mwe mkundwa wakwe, akamtuma uu hawo kuidiwika, ekiteta, Wenemyoa mwana wangu. 7Wala waimi wakateta wonawo, ti, Uu ni mhoja, haya, tumkome, na uhoja uneoka wetu. 8Wakamwuha, wakamkoma, wakamtagha some ya mizabibu. 9Haya, eneketaze mwenye mizabibu? Eneza awateshe waimi, eneng’olia wengi mizabibu. 10Tomusomie itamo ili, Ibwe wesilikundie waesi, ili liokie ibaha la ngandeni; 11hena Mzuri yaoka ii, nayo ni kurighiwa mesoni hetu? 12Wakaenda wamghure, wakaondoka matorano: amu wakatwarija ti ateta fwanano wanga yawo: wekimshigha wakatonga hawo.

13Watuma hakwe wandu wa Wafarisayo na Waherodiano wamteshe hena kiteto. 14Wekiza wamburra, Mlosha, twakutisiwa mwenye kididi, nete toukusara hena mundu, amu touyoa wusho wa mundu, nde ulosha hena kididi nzia ya Izuwa. Kiwe kung’ola lushango hena Kaisari, kana sihuwo? 15Tung’ole, kana tusing’ole? Naye ekitisiwa ngileja jawo akawawurra, Nikini munighesha? nietieni dinari niiwone. 16Wakaete. Naye awawurra, Ni yakweni fwana ili na itamo? Wakamburra, Ni ya Kaisari. 17Ekitalua Yesu akawawurra, Hundueni hena Kaisari meoho ma Kaisari, namo meoho ma Izuwa hena Izuwa. Wakamrighiwa.

18Na Wasadukayo waza hakwe, watetawo ti tehena kuwuka, wakambujanya, wekiteta, 19Mlosha, Musa etutamie, ti, mundwawo mundu ekifwa, ekimshigha mche, nete waana teshigha, mundwawo amwuhe mche wakwe, aimushe uwonwa hena mundwawo. 20Haya, heokie wandwawo wafungate, wa kuwoka akauha mche, ekifwa teshighie waana. 21Wa keri akamwuha akafwa, nete ye teshighie waana, na wa katatu ni huwo. 22Wakamwuha wafungate, nete teweshighie waana. Kuidiwika kwa wose na mche akafwa. 23Haya, ghati ya kuwuka, weneikawuke, wa uhi wawo eneoka mche? amu wafungate weokie naye mche. 24Yesu ekitalua akawawurra, Si hena iyo mwateka, musitisiwa matamo, nete zinya ja Izuwa? 25Amu weneikawuke ghati ya wefwie, tewewoa nete tewewowa, kake weoho sa malaika ghati ya wanga. 26Ha wefwie, ti wawuka, tomusomie ghati ya kitamo cha Musa, wanga ya mfuro, sawundu Izuwa emburra, Mi ni Izuwa wa Ibrahimu, na Izuwa wa Isaak, na Izuwa wa Yakobo. 27Siye Izuwa wa wefwie, nde wa weoho na moo: amu ii unwi mwateka muno.

28Ekiza mwe wa watama ekiwasikia wekibujanyanana, ekitisiwa ti awataluiya nezo, akambujanya, Nikihi ekyo kiteto cha kuwoka hena vyose? 29Yesu akamtalua, ti, Cha kuwoka cha viteto vyose, Sikia, Israeli, Mzuri Izuwa wetu ni Mzuri mwe: 30nawe umkunde Mzuri Izuwa wako hena ngoro yako yose, na hena moo wako wose, na hena kucha kwako kwose, na hena zinya jako jose. Nikyo kiteto cha kuwoka. 31Na cha keri hena fwana lakwe, Umkunde walatya wako sa we mwenye. Ekyo kibaha kukela ivi tehena kiteto. 32Akamburra mtama, Ni kyedi, Mlosha, cha kididi wateta ti ni mwe Izuwa, nete tehena ungi nde ye; 33na kumkunda hena ngoro yose, na hena kucha kwose, na hena moo wose, na hena zinya jose, na kumkunda walatya sa mwenye, kuvetia matasi mose na ndaswa. 34Yesu ekimbona atalua sa mwenye kucha, akamburra, Si hae we ghati ya ufumwa wa Izuwa. Nete mundu tekariawa kumbujanya.

35Akatalua Yesu akateta ekilosha ghati ya hekalu, Waghambaze watama ti Masihi ni Mwana wa Daudi? 36Amu Daudi mwenye ateta hena Ngoma Yedi, Mzuri akamburra mzuri wangu, Uketi mkono wa kuume kwangu, mtano ninekaniwike maring’a mako si ya mawato mako. 37Haya Daudi mwenye emwitanga Mzuri, aokaze mwana wakwe? Weoho weingi ghati ya matorano wakamsikia hena kuizihirwa.

38Akawawurra ghati ya kulosha kwakwe, Yoeni watama, wekundawo kusela wenye suke ndeza, 39na kukeziwa kichindeni, na vichumbi vya kuwoka ghati ya masunagogi, na kuikaa wanga ghati ya karamu. 40Wela nyumba ja wache wefwiwe ni wome, na hena uwonjo weikaa ghati ya kuomba, awa weneingwa uchili ulelie.

41Ekiikaa Yesu ekikulotija handu ha mali ayoa wegherawo matorano fetha ghati ya handu ha mali, na wengi wenye mali wakaghera meingi. 42Ekiza mche mwe esina mume, mkiwa, naye akaghera kihindi pesa mbiri, niyo kodranto. 43Ekiwaitanga waanalosha awawurra, Amin namburra, ti mche uu esina mume mkiwa aghera nyingi kukela wose weghera ghati ya handu ha mali: 44amu wose wegherire ghati ya kuneta kwawo, uu ghati ya kuduhuka kwakwe aghera vyose ena, moo wakwe wose.

Currently Selected:

Marko 12: TAVETA

Highlight

Copy