Marko 11

1Mtano wekinasongerie Yerusalemi, hena Betfage na Betania nduwini ya zeituni, atuma weri waanalosha wakwe, 2awawurra, Mutonge henyu kaa imurongekia, chwi mukiingia munewona mwana njoe echungiwe, esikweika ni mundu, muchungueni mweteni. 3Mundu ekimburra, Muketaze? teteni, ti, Mzuri emkundie, chwi enemwingija aha. 4Wakatonga wakambona mwana njoe echungiwe mbengeni some, nzia ikinajunguluke, wakamchungua. 5Wandu weimuke uko wakawawurra, Mwareha kini mukimchungua mwana njoe? 6Wakawawurra sandu eghambe Yesu, wakawashigha. 7Wakamwete mwana njoe hena Yesu, wakatagha wanga yakwe suke jawo, akaikaa wanga yakwe. 8Weingi wakatandika suke jawo nzieni, wengi wakatema mani ghati ya miti wakamatandika nzieni. 9Werongore na weratere wakaloza wekiteta, Osanna! Mtasiwa ula eza hena izina la Mzuri; 10mtasiwa ufumwa uza ghati ya izina la Bwana, wa apa wetu Daud; Osanna ghati ya wanga!

11Akafika Yerusalemi, mtano hekaluni: ekinayoe vyose, ikioka magheri ma chamagheri, akafuma mtano Betania, hamwe nawo ikumi na weri. 12Mtano heyawo ekifuma ghati ya Betania akasikia nzaa, 13mtano ekiwona hae mtini mwenye ma ni akaza, kwakicha awone kindu ghati yakwe. Mtano ekiza tewonie kindu wanga yakwe nde mani, amu magheri ma tini hai. 14Akatalua Yesu akauwurra, Mundu asile ndunda ghati ya we mtano tendarasi. Waanalosha wakwe wakamsikia. 15Mtano wekifika Yerusalemi, Yesu akaingia ghati ya hekalu, akawoka kuwakinya wetagha na wezora ghati ya hekalu, akapulusha meza jawo wekoranya fetha, na vichumbi vyao wetagha mabeta, 16nete teshighie mundu atike kindu ghati ya hekalu. 17Akawalosha ekiwawurra, Teitamiwe, ti, Nyumba yangu ineitangwa nyumba ya kuomba hena mbare jose? Unywi muiareha mbanga ya wasoka. 18Wakasikia wetama na wakohani wabaha, wakaenda wawoneze kumtesha, amu wakaondoka, ya kuoka matorano mose wakarighiwa hena kichei chakwe. 19Mtano ikioka chamagheri, akafuma some ya kaa.

20Mtano heyawo wekivetia, wakawona mtini uomie ghati ya makolo. 21Ekikumbuka Petro amburra, Mzuri, yoa mtini urarie, waoma. 22Yesu ekitalua, awawurra, Muoke na luitikijo lwa Izuwa. 23Amu amin namburra, ti, ula eneiwurra nduwi ii, Ukuluke, utaghwe ndiweni; nete teitalwa ngoroni hakwe, nde eitikija ekiteta kineoka, kineoka hakwe sandu etetie. 24Amu iyo namburra, Vyose munevikunda ghati ya kuomba, mukiitikija ti muneuhia, kineoka henyu. 25Na unywi mwimukaho kuomba, mushighie, mukioka na kiteto wanga ya mundu, Wawee wenyu eoho wanga amushighie unywi kutekwa kwenyu. 26Musikashighie unywi, nete Wawee wenyu eoho wanga tenemshighia kutekwa kwenyu.

27Wakafikawa Yerusalemi, mtano ekisela ghati ya hekalu, wamzia wakohani wabaha na watama na waghosi, 28wamburra, Hena zinya ani uareha ama, na niani ekuingie zinya ii uwone kuareha ama? 29Yesu ekitalua akawawurra, Ninembujanya na mi kiteto kimwe, mkanitalua, nami ninemburra na zinya ani naareha ama. 30Lubatizo lwa Yohana luokie lwa wanga kana lwa waana wa Adamu? Munitalua. 31Wakaareha wakaituka wonawo wekiteta, Tukighamba, lwa wanga, eneghamba, Nikini tomwitikije? 32Tukighamba, lwa waana wa Adamu, wakaondoka wandu, amu wose wakamghura Yohana, ti ni mroti kididi. 33Wekitalua wamburra Yesu, Totutisiwa. Yesu ekitalua awawurra, Nete mi simburra na zinya ani namaareha ama.

Currently Selected:

Marko 11: TAVETA

Highlight

Copy