Marko 14

1Iokie Pasaka na isichachwa kutera kwa misi miri, wakaenda wakohani wabaha na watami wawoneze kumghura hena kucha na kumkoma. 2Wakateta, Si ghati ya karamu, isioke kilinganya ghati ya wandu.

3Ekioka ye ghati ya Betania nyumbeni ha Siman mwenye ukoma, ekiikaa mezeni, akaza mche mwenye alabastro ya marhamu ya nardo pistikesi ya zora mbaha, ekiibaa alabastro, akaimiminia mtwini hakwe. 4Weoho wereghije na ndeni, wakateta, Nikini waoka uteko uu wa marhamu? 5Amu marhamu ikitaghwa na kukela kwa dinari maghana matatu, na kung’olwa hena wakiwa: wakamnunuwikia. 6Akateta Yesu, Mshigheni, nikini mumghera wukiwa? Aketa nezo hangu. 7Amu misi yose mna wakiwa hamwe na unywi, na mukakunda muidima kuwaketa nezo; mi tomuoho nami misi yose. 8Aketa vila eoho navyo, arongora kughera muri wangu marhamu hena kujikwa kwangu. 9Amin namburra, handu hose ineikaghambwe Anjili ii ghati ya masanga mose, navyo eviketa uu vinetetwa hena kukumbusha kwakwe.

10Na Yuda Iskariota, mwe wawo waikumi na weri akatonga ha wakohani wabaha amng’ole hawo. 11Wekisikia wakaizihirwa, wakatemiana kumwinga fetha. Akaenda awoneze kumng’ola magheri ma kuwawe.

12Mtano musi wa kuwoka wa isichachwa, wekinasinze Pasaka, waanalosha wakwe wamburra, Nihi ukundie tutonge tureareha uile Pasaka? 13Akatuma weri wa waanalosha wakwe, ekiwawurra, Mtonge henyu ghati ya kaa, enemtorana mundu etikie nyungu ya mbombe, mratereni: 14na hala enehoingia, mburreni mwenye nyumba, Mlosha ateta, Nihi ha kusowoka nile Pasaka na waanalosha wangu. 15Naye enembonja ghu mbaha itandikwe ikaidiwike: uko mwarehie. 16Wakafuma waanalosha wakwe, wakaza kaa, wakawona sandu ewawurire, wakaareha Pasaka. 17Ikioka chamagheri eza hamwe nawo waikumi na weri. 18Nawo wekiikaa mezeni na kula, atete Yesu, Amin namburra, ti mwe wenyu ekila nami enening’ola. 19Wakawoka kuingiwa ni wukiwa, na kumburra mwe mwe, Ni mi? 20Na ungi, Ni mi? Ekitalua akawawurra, Mwe wa waikumi na weri etoweja hamwe nami ghati ya ibongo. 21Mwana wa Adamu atonga hakwe sawundu etamiwe: wukiwa hakwe mundu ula emng’ola Mwana wa Adamu! ekioka keba ye esiwoneka mundu ula.

22Nawo wekila, Yesu ekiuha ibumunda, ekitasia, akabaa, akawainga akateta, Uheni, leni, niyo muri wangu. 23Ekiuha ndemwa, ekiomba, akawainga, wakainywa wose. 24Akawawurra, Niyo sakame yangu ya luaghano lusha iitike hena weingi. 25Amin namburra, ti sinenywawa ya ugherwa wa mzabibu, mtano musi ula nineikaunywe msha ghati ya ufumwa wa Izuwa.

26Wekiidiwa kuwina wakafuma mtano nduwi ya zeituni. 27Yesu awawurre, Muneshishirwa wose hena mi kio iki, amu itamiwe, Ninembigha mrisha, na maghonji meneghawanyika. 28Kake nineikaidiwika kuwuka, ninemurongoria kutonga Galilaya. 29Petro akamburra, Na wose wekishishirwa, si mi. 30Amburre Yesu, Amin nakuwurra, ti we yoo, kio iki, kuwoka nguruwi isimeiya kandu keri, unenikania kandu katatu. 31Naye akaneta muno kuteta, Mtano ikiniwe kufwa nawe, sinekukania. Huwo wakateta na wose.

32Nawo weza handu izina lakwe Gethsemane awawurre waanalosha wakwe, Ikaeni aha, mtano nineikaniombe. 33Auha Petro na Yakobo na Yohana hamwe naye, akawoka kuing’asiwa na kuingiwa ni wukiwa. 34Awawurre, ngoro yangu ina wukiwa wiingi mtano kufwa, ikaeni aha muchewe. 35Ekitonga kurongora hadongo, akagwa si, akaomba kwakicha kuidima kuketika, magheri mamwetie: 36Akateta, Abba, Apa, we waidima vyose; nitikie ndemwa ii; nde sioho nikundie mi, nde we. 37Ekiza awawona weshinjie; amburre Petro, Siman, washinjia? Touna zinya ya kuchewa saa mwe? 38Cheweni ndeombeni, musiwone kuingia ghati ya kugheshwa: ngoro ianguhe, muri mnana. 39Ekitongawa akaomba, ekiteta kiteto kilakila. 40Mtano ekihunduka akawawona weshinjiewa, amu meso mawo maemea, nete tewetisiwe kumtalua. 41Ekiza ya katatu, awawurre, Shinjieni ishighajike, musowoke: yafika, magheri maza; Mwana wa Adamu ang’olwa mikononi hawo wenye kutekwa. 42Wukeni, tutonge, ula ening’ola asongeria.

43Chwi ekioka ghati pa kuteta, afika Yuda, eye mwe wa waikumi na weri, na hamwe naye matorano mengi na mihandi na marungu, wefumie ha wakohani wabaha na watami na waghosi. 44Naye eng’ola awainga luwano, ekiteta, Ula ninemnyonyoza, niye; mghureni, mumtike nezo. 45Ekiza chwi ekimtongia ateta, Rabbi, Rabbi; akamnyonyoza muno.

46Wala wakamghera mikono yawo, wakamghura. 47Mwe wawo weimukie, ekijuta muhandi, akambigha mzoro wa mkohani mbaha, akamtema isikio. 48Ekitalua Yesu, akawawurra, Sa wanga ya msoka mwafuma na mihandi na marungu, muniuhe? 49Misi na misi neikee henyu ghati ya hekalu nikilosha, nete tomunighurire: nde matamo mawone kufishwa: 50wekimshigha wose wakamatuka. 51Na kabwange kamwe akamratera, edokie suke wanga ya utuhu; wabwange wakamghura. 52Naye ekiishigha suke akawamatukia tuhu.

53Wakamtika Yesu ha mkohani mbaha, wakawunganyika hakwe wose wakohani wabaha, na waghosi na watama. 54Na Petro akamratera hae mtano ndeni ghati ya nyumba ya mkohani mbaha; akaoka ekiikeesi nawo wazoro, akaota moto. 55Wakohani wabaha na lumungu lose wakakunda wanga ya Yesu mburi ya kumfwija, nete tewewonie. 56Amu weingi wakamng’olia mburi ya maongo, nete mburi yawo si mwe. 57Mtano wengi wekiimuka wakamng’olia mburi ya maongo, 58wekiteta, Uswi twamsikia ekiteta, ti, mi ninelinyamara hekalu ili, liarehike na mikono, na hena misi mitatu ninejenga lingi lisiarehike na mikono. 59Nete huwo mburi yawo si mwe. 60Ekiimuka ghati mkohani mbaha akambujanya Yesu ekiteta, Toutalua kiteto? 61Awa wakung’olia mburi ani? Akahuja, nete tatalua kiteto. Mkohani mbaha akambujanyawa, ekimburra, Niwe Masihi, Mwana wakwe etasiwe? 62Yesu akateta, Nimi, na unywi munembona Mwana wa Adamu eikee mkono wa kuume wa zinya, na ekiza na majumbi ma wanga. 63Mkohani mbaha akabaja suke yakwe, ekiteta, Tukundiezewa weng’ola mburi? 64Musikie utiri: muwonaze? Wose wakamchilia yambe kufwa. 65Wakawoka wengi kumtufia mate, na kumfinikira wusho, na kumbigha na maluhi, na kumburra, Ukete uroti: wazoro wakambigha luhi.

66Ekioka Petro ghati ya nyumba si, aza mwe wa wazoro wa kiche wa mkohani mbaha: 67ekimbona Petro ekiota moto akamyoa ekiteta, Na we uokie hamwe na Mnazareti Yesu. 68Akakana, ekiteta, Sitisiwe, nete sisikie vila uviteta. Akafuma some mrangoni, nguruwi ikaiya. 69Mzoro wa kiche akambonawa akawoka kuwawurra weimuke afuhi, ti, Uu ni wa hawo. 70Akakanawa. Kutera hadongowa weimuke afuhi wakamburra Petro, We kididi wa hawo, amu na Mgalilaya, na viteto vyako nivyo. 71Akawoka kusesa na kurara, ti, Simtisiwe mundu uu mumteta. 72Chwi ya keri nguruwi ikaiya. Petro akakumbuka kiteto ekimburire Yesu, ti, Kuwoka kwa kuiya nguruwi kando keri, unenikania kando katatu. Akagheshijia akaiya.

Currently Selected:

Marko 14: TAVETA

Highlight

Copy