Mattayo 26
26
1Ikaoka ekinaidiwe Yesu viteto ivi vyose akawawurra waanalosha wakwe,
2Mwatisiwa ti kutera kwa misi miri Pasaka yaoka, na mwana wa mundu eneng’olwa nesa awanikwe.
3Magheri mala wakawunganyika wakohani wabaha na waghosi wa wandu ha lumungu lwa mkohani mbaha eitangwa Kayafa,
4Wakateta mburi ti wamgure Yesu hena kichei na wamkome:
5Wakaghamba, Si magheri ma karamu, kisioke kilozo ghati ya wandu.
6Yesu ekinaoke Betania, nyumbeni hakwe Siman mwenye kusumura,
7Akamzia mche mwenye chupa alabastron ya mafuta ma zoro nyingi, akammiminia mtwini ekiikaa.
8Waanalosha wakwe wekinawone wakaregija, wekiteta, Hena kini lutesho ulu?
9Amu ama maidima kutaghwa na viingi, na wakiwa kuingwa.
10Yesu ekitisiwa akawawurra, Nikini wamrisha wukiwa mche? amu enihiria ndima yedi.
11Amu misi yose muna wakiwa hamwe na unywi, mi tomnami misi yose.
12Amu ekinimiminia muri wangu mafuta ama eniarehia hena kujikwa kwangu.
13Kididi namburra, handu hose sumu yedi ii inetindwa ghati ya masanga mose, na iki ekiareha kinetetwa hena lukumbusho lwakwe.
14Na mwe wa wala ikumi na weri, eitangwa Yuda Iskariota, akatonga hena wakohani wabaha,
15Ekighamba, Nikini mwakunda kuniinga, nami ninemng’ola henyu? Wakaarehana naye hena vindu vya fetha makumi matatu.
16Na too magheri mala akaenda magheri ma kumng’ola.
17Na musi wa kuwoka wa mabumunda mesichachwe waanalosha wakamzia Yesu wekighamba, Nihi ukundie tukuarehia kula pasaka;
18Akaghamba, Tongeni kiongoni hena mundu nganya, mremburra, Mlosha aghamba, Magheri mangu ni afuhi; naareha pasaka hako na waanalosha wangu.
19Waanalosha wakaareha sandu Yesu ewaaghanyie, wakaareha pasaka.
20Ikinaoke chamagheri akaoka ekiikaa na waanalosha wakwe ikumi na weri.
21Na wekioka wekila aghamba, Kididi namburra, ti mwe wenyu enening’ola.
22Na wekishiniwa wakawoka mundu ose kumburra, Mzuri, nimi niye?
23Akatalwa akaghamba, Ula edunya mkono kimwe nami ghati ya mwanje, niye enening’ola.
24Mwana wa adamu atonga, sandu etamiwe, kake wukiwa hakwe mundu ula, mwana wa mundu ang’olwa naye; kyedi hakwe kwakicha asawoneka mundu ula.
25Akatalwa Yuda, ula emng’ola, Nimi, Mzuri? Amburra, Waghamba.
26Na wekioka wekila Yesu ekiuha ibumunda na ekitasia, akalibaa, akawainga waanalosha, akaghamba, Uheni, leni; uu ni muri wangu.
27Akauha ndemwa, na eking’ola haika akawainga, ekiteta, Nyweni wose nayo;
28Amu ii ni sakame yangu ya luaghanyo, iitike hena weingi hena luwushijio lwa ng’oki.
29Namburra, sinywa too ingeriaha ya ndunda ii ya mzabibu, mtano musi ula nineikaninywe na unywi sha ghati ya ufumwa wa Apa wangu.
30Wekinaidiwe kuvina wakafuma kutonga nduwini ha Zeituni.
31Yesu akawawurra, Unywi wose muneshishirwa hena lwangu kio iki; amu itamiwe, Ninembigha mrisha, na magonji ma ifio meneghawanyika.
32Kake kutera kwa kurushwa kwangu ninemurongoria kutonga Galilaya.
33Petro akatalwa akamburra, Wose wekishishirwa hena lwako, mi sineshishirwami ndarasi.
34Yesu akamburra, Kididi nakuwurra, ti kio iki, nguruwi isimeiya, unenikania keri.
35Petro amburra, Ikioka yaniwe kufwa mwe nawe, sinekukaniami. Huwo na waanalosha wose wakaghamba.
36Akafika Yesu hamwe nawo handu haitangwa Getsemane, na awawurra waanalosha wakwe, Ikaeni kunu, nikioka nitonga kula kuomba.
37Akawauha Petro na waana weri wakwe Zebedayo akawoka kushiniwa na kuoka na wukiwa wingi.
38Awawurra, Ngoro yangu ina wukiwa wingi mtano na kufwa; ikaeni kunu murechewa nami.
39Na ekitonga kadongo akagwa wushoni hakwe ekiomba na ekiteta, Apa wangu, kwakicha yaidimika, ndemwa ii inivetie; kake si sandu nikundie mi, kake sandu we.
40Naye awazia waanalosha, awawona weshinjia, na amburra Petro, Tomuidima kuchewa nami mtano saa mwe?
41Cheweni na ombeni, nesa musiingie ghati ya kugheshwa; ngoro niyo ianguhe, kake muri mnana.
42Akatongawa keri akaomba ekiteta, Apa wangu, kwakicha ii teiidima kuvetia, nisiinywe, sandu ukundie kiketike.
43Ekizawa akawawona weshinjia, amu meso mawo meemee.
44Akawashigha akatongawa akatonga katatu, ekitetawa kiteto kila.
45Ikuade ewazia waanalosha, na awawurra Shinjieni ingeriaha mresowoka; yoa, magheri nimo afuhi, na Mwana wa mundu ang’olwa mikononi hawo wenye ng’oki.
46Wukeni, tutonge; yoeni, ula ening’ola ni afuhi.
47Na ekinaoke ekiteta, yoa, Yuda, mwe wawo ikumi na weri, akaza, na kimwe naye matorano mabaha na mihandi na marungu, wefumie ha wakohani wabaha na waghosi wa wandu.
48Na ula emng’ola ewaingie luwano, ekiteta, Ula ninemnyonyoza niye; mgureni.
49Chwi ekimzia Yesu akaghamba, Salaamu, Rabbi, akamnyonyoza.
50Yesu akamburra, Mbuya, areha kila wakizia. Wakaza wakamgera Yesu mikono, wakamgura.
51Na yoa, mwe wawo kimwe na Yesu ekirongesha mkono akang’ola muhandi wakwe, akambigha mzoro wakwe mkohani mbaha, akamchwia isikio.
52Na Yesu amburra, Hundua muhandi wako na mbone; amu wose weuha muhandi weneteka hena muhandi.
53Wagheshijia mi siidima kumwomba Apa wangu, na ingeriaha eneniinga malaika weingi kukela legioni ikumi na mbiri?
54Matamo meidimaze kufishwa, ti yawe kuoka huwo?
55Magheri mala Yesu akawawurra matorano, Sandu wanga ya msoki mwafuma na mihandi na marungu kunigura? musi hena musi neikae hekaluni nikilosha, musinanigure.
56Kaka ama magheri menyu, nesa matamo ma waroti mafishwe. Waanalosha wose wakamshigha wakamatuka.
57Nawo wemgura Yesu wakamwingija ha Kayafa mkohani mbaha, wewunganyikaho watami na waghosi.
58Petro akamratera hae mtano na lumungu lwa mkohani mbaha, akaingia ndeni akaikaa na wazoro, akuwone kuidiwika.
59Wakohani wabaha na sunedrim yose wakaenda mburi ya maongo wanga yakwe Yesu nesa wamfwije,
60Wasiiwone; wekiza wenye mburi ya maongo weingi.
61Ikuade wakaza weri, wakaghamba, Uu eghambie, Naidima kuibaa hekalu ya Izuwa, na kuijenga hena misi mitatu.
62Akaimuka mkohani mbaha, akamburra Toutalwa kiteto? Mburi ani awa wekuwondjia?
63Kake Yesu akahuja. Mkohani mbaha akamburra, Nakuraria hena Izuwa mwenye moo, utuwurre, we niwe Masiya, Mwana wakwe Izuwa.
64Yesu amburra, We waghamba; kake namburra, too yoo munembona Mwana wa mundu ekiikaa ha kuume kwa zinya na ekiza na majumbi ma wanga.
65Mkohani mbaha akabaja suke yakwe ekighamba, Aghamba mawiwi; nikini tuendawa wenye mburi? Yoeni, ingeriaha mwasikia mawiwi makwe; mwawonaze?
66Wakatalwa wakaghamba, Yambe kufwa
67Wakamtufia mate wushoni, wakambigha: wengi wakambigha luhi,
68Wekiteta, Uturotie, Masihi, niani niye ekubigha?
69Petro akaoka ekiika shighati lumunguni: mbora mwe akamzia, ekiteta, Na we uokie hamwe na Yesu wa Galilaya.
70Akakana msongorana wa wose ekiteta, Sitisiwemi nikini wateta.
71Ekinafume mbengeni ungi akambona, na awawurra wala weoho, Na uu eokie hamwe na Yesu Mnazareti.
72Akakanawa na kurigha, Simtisiwe mundu uo.
73Kutera kadongo wala weimuka wakaza wakamburra Petro, Kididi na we ni ghati yawo; amu kuteta kwako kwakuwondja.
74Akawoka kurigha na kurara, Simtisiwe mundu uo. Chwi nguruwi ikaiya.
75Petro akakumbuka kiteto ekitetie Yesu, ti Kuwoka isimeiya nguruwi unenikana kandu katatu: akafuma na shighati akaiya na wukiwa.
Currently Selected:
Mattayo 26: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
