Mattayo 27
27
1Hekinaoke marekero wakohani wabaha wose na waghosi wa wandu wakachila wanga yakwe Yesu, nesa wamkome.
2Wakamchunga, wakamtika, wakamng’ola ha Pilato mchili.
3Na Yuda emng’olie, ekinawone ti echiliwa, akachwa‐muti, akavihundua vindu vya fetha makumi matatu ha wakohani wabaha,
4Ekiteta, Natekwa nikiing’ola sakame isina ng’oki. Wakaghamba, Nikini hetu? Uneyoa we.
5Akavitagha vindu vya fetha hekaluni, akatonga, akakunyama.
6Wakohani wabaha wekiiuha fetha wakaghamba, Si chedi kuigera na handu ha mali, amu ni luzoro lwa sakame.
7Wakateta mburi wakazora nayo mbuwa ya muwumbi, hena kujika wagheni.
8Amu ii mbuwa ila yaitangwa mbuwa ya sakame mtano yoo.
9Huwo kikafishwa kila kitetiwe ni mroti Yeremiya, ekiteta, Wakaviuha vindu vya fetha makumi matatu, luzoro lwakwe lwazorwa, wemzorie wala wa waana wa Israeli;
10Wakaving’ola hena mbuwa ya muwumbi, sandu Mzuri eniaghanyie.
11Yesu akaimuka msongorana wa mchili; mchili akambujanya ekiteta, Niwe Mfumwa wa Wayahudi? Yesu akamburra, Waghamba.
12Na ekinalinganywe ni wakohani wabaha na waghosi tetalwa kiteto.
13Pilato akamburra, Tousikia vindu vingi ani wekung’olia?
14Nete temtalwa kindu, mtano kiteto kimwe; mtano mchili erighiwe muno.
15Na ghati ya karamu mchili amanyerra kuwachunguiya matorano mchungwa mwe, wemkundie.
16Wakaoka na mchungwa mwenye kirumi, eitangwa Baraba.
17Amu ii wekinawunganyika Pilato akawawurra, Niani mwakunda nimchunguiye? Baraba, kana Yesu eitangwa Masihi?
18Amu etisiwe ti hena luneng’o wemng’ola.
19Ekinaoke ekikaa wanga ya handu ha wuchili, mche wakwe akamwingijia ekiteta, Usioke na kindu wanga ya ula mwenye ngalo, amu narishwa wukiwa wingi hena ndoto yoo hena lwakwe.
20Wakohani wabaha na waghosi wakaeleja wandu wamwombia Baraba, na wamteshe Yesu.
21Mchili akatalwa akawawurra, Ni uhi wa awa weri mwakunda nimchunguiye? Wakaghamba, Baraba.
22Pilato awawurra, Nikiniwa ninemketa Yesu eitangwa Masihi? Wamburra, Awanikwe.
23Akaghamba, Nikini? owiwi ani euketie? Wakaneta kuloza, wekiteta, Awanikwe.
24Pilato ekinawone ti tewe kiteto; nde kilozo chaneta kuoka, akauha mbombe akaoja mikono msongorana wa matorano, ekiteta, Mi sina kutekwa hena sakame ya mundu uu mwenye ngalo; unywi munewona.
25Wandu wose wakatalwa wakaghamba, Sakame yakwe wanga yetu, na wanga ya waana wetu.
26Akawachunguiya Baraba: na ekinaidiwa kumbigha Yesu akamng’ola nesa awanikwe.
27Asikari wa mchili, wekimtika Yesu na praitorio, wakamwunganyia lweriri lwose.
28Wakambushijia suke yakwe, wakamdoka kanzu ngundu.
29Wakaiwita lumerisia lwa mivwa wakamgera mtwini, na ighughu mkononi hakwe ha kuume, na wekidung’uta msongorana wakwe wakamsola wekiteta, Salaamu, Mfumwa wa Wayahudi.
30Wakamtufia mate, wakauha ighughu wakambigha mtwi.
31Wekinaidiwe kumsola, wakamhambua kanzu, wakamdoka suke jakwe, wakamtika awanikwe.
32Wekinafume wakawona Mkurene, izina lakwe Simon; wakamsingirija uu atike msalaba wakwe.
33Na wekifika handu heitangwa Golgotha, niho hatetwe, handu ha Kiborong’,
34Wakamwinga kunywa mawa merunganywa na nyongo; na ekinachame tekundie kunywa.
35Wekinaidiwe kumbanika wakaghawa suke jakwe wonawo, wekibigha kura.
36Wakaikaa si wakamyoa uko.
37Wakawika wanga ya mtwi wakwe kulinganywa kwakwe, kutamiwe,
“Uu niye Yesu Mfumwa wa Wayahudi.”
38Wasoki weri wakawanikwa hamwe naye, mwe hena kuume, na mwe hena kumoso.
39Nawo wevetia nzieni wakamrigha, wekikushakusha mitwi yawo,
40Wekiteta, Mwenye kuibaa hekalu na kuijenga hena misi mitatu, ukukije mwenye.
41Huwo na wakohani wabaha wekimsola hamwe na watami na waghosi wakaghamba,
42Ewakije wengi, teidima kukukija mwenye. Niye mfumwa wa Israeli, asee ingeriaha na msalaba, na tunemwitikija.
43Emwitikije Izuwa, amkije ingeriaha, ekioka emkundie; amu eghambie, nimi Mwana wa Izuwa.
44Huwo na wasoki wesulibishwa hamwe naye wakamrigha.
45Too saa ya katandatu kikaoka kija wanga ya isanga lose mtano saa ya kenda.
46Na sa saa ya kenda Yesu akaloza na ighonda ibaha, ekiteta, Eli, Eli, lama sabakthani? nikyo, Izuwa wangu, Izuwa wangu, nikini wanishigha?
47Wengi wawo weimuke uko, wekinasikia wakateta, Emwitanga Elias.
48Chwi mwe wawo akasara, akauha sifongo akaiizuja na siki, akaigera wanga ya ighughu, akamwinga anywe.
49Waghenje wakaghamba, Shigha, tuwone ti Elias eza kumkija.
50Yesu ekilozawa na ighonda ibaha, akang’ola ngoma.
51Na pazia ya hekalu ikabajika vihindi viri wanga mtano na si, si ikadedema, mabwe makabajika,
52Mbira jikajughuka, miri miingi ya washenete weshinjie ikaruka,
53Na wekifuma na mbira kutera kwa luruko lwakwe wakaingia kiongo kishenete, wakawonwa ni weingi.
54Njama na wala hamwe naye wekimyoa Yesu, wekinawone kudedema na vindu viarehike, wakaondoka muno, wekiteta, Kididi uu eokie Mwana wa Izuwa.
55Heokie na wache weingi wekiyoa na hae, niwo wemratera Yesu kufuma Galilaya, wakamwindia.
56Ghati ya awa heokie na Maryamu Magdaleni, na Maryamu mee Yakobo na Yose, na mee waana wa Zebedayo.
57Hekinaoke chamagheri, akaza mundu mmazi wa Arimathaya, izina lakwe Yusuf, naye mwenye mwanalosha wa Yesu;
58Uu ekimtongia Pilato akamwomba muri wakwe Yesu. Pilato akaaghanya ung’olwe.
59Yusuf ekiuuha muri akaukoda na suke nyewa,
60Akauwika ghati ya mbira yakwe sha, iforiwe naye ghati ya mabwe: akabingilisha ibwe ibaha mbengeni ha mbira, akatonga.
61Heokie na Maryamu Magdalene, na Maryamu ula ungi, wekiikaa msongorana wa mbira.
62Musi wa keri, nio kutera kwa Kuarehia, wakohani wabaha na Wafarisayo wakawunganyika hakwe Pilato,
63Wekiteta, Mzuri, twakumbuka ti mkeleki uu eghambie, ekioka na moo, Kutera kwa misi mitatu nineruka.
64Amu ii uaghanye mbira irindwe mtano musi wa katatu; wasize ngea waanalosha wakwe waremhiwa, na wawawurra wandu, Aruka ghati ya wefwie; na kutekwa kwa kuidiwika kuneoka kuwiwi kukela kula kwa kuwoka.
65Pilato akawawurra, Muna asikari: tongeni muirinde sandu mwaidima.
66Wakatonga wakairinda mbira muno, wakaligera ibwe luwano, hamwe na asikari.
Currently Selected:
Mattayo 27: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
