Mattayo 24
24
1Na Yesu ekifuma hekalu eokie ekitonga; waanalosha wakamzia nesa wambonje majengo ma hekalu.
2Ekitalwa akawawurra, Tomuviwona ivi vyose? Kididi namburra, telineshighwa aha ibwe wanga ya ibwe, lisighushwe.
3Naye ekiikaa nduwini ya Zeituni waanalosha wakamzia hena ngiliwata, wekighamba, Utuwurre, ivi vineoka rini? na nikini luwano lwa mizie yako, na lwa luidiwiko lwa masanga?
4Yesu ekitalwa akawawurra, Yoeni, mundu esimukenge.
5Amu weingi weneza hena izina langu, wekiteta, Mi nimi Masihi, na wenekenga weingi.
6Munesikia ngondo na mburi ja ngondo, yoeni musirishwa wukiwa; amu ivi tevina huwo kuoka; kake luidiwiko tolumefika.
7Amu mbare inewuka wanga ya mbare, na ufumwa wanga ya ufumwa: na jineoka nzaa na matetemeko handu.
8Ivi vyose nivyo kuwoka kwa wukiwa.
9Magheri mala wenemng’ola hena wukiwa, na wenemkoma, na muneshishirwa ni mbare jose hena lwa izina langu.
10Magheri mala weingi weneghushwa, weneng’olana, wenesuana.
11Na waroti weingi wa maongo wenewuka, na wenekenga weingi.
12Na amu ya owiwi kuneta, lukundo lwa weingi luneduhuka.
13Kake ula eikaa mtano kuidiwika, niye enekijwa.
14Na sumu yedi ii ya ufumwa inetindwa ghati ya masanga mose, kuoka luwondjomburi hena mbare jose; ikuade luneoka luidiwiko.
15Huwo mukiwona lusuwo lwa kunyamarwa, lutetiwe ni mroti Danieli, lwaimuka handu heshenete, (ula asoma, atwarije,)
16Magheri mala wala weoho Uyahudi wamatuke na nduwi:
17Na ula eoho wanga ya nyumba asisee nesa atike kindu ghati ya nyumba:
18Na ula eoho mtemeni asihunduke nyuma atike suke jakwe.
19Wukiwa hawo weemee na hawo werera misi ila!
20Ombeni kumatuka kwenyu kusioke magheri ma kisie, nete musi wa sabato.
21Amu uneoka hala wukiwa wingi, sandu usimeoke too kuwoka kwa masanga mtano na ingeriaha, nete touneoka.
22Na kwakicha misi ila teiduhuwe tekikia ose mwenye muri, kake hena lwa wasawurwa ineduhuwa misi ila.
23Magheri mala mundu ekimburra, Yoa Masihi ni kunu, kana kula, musiitikija.
24Amu wamasihi wa maongo na waroti wa maongo wenewuka, na weneng’ola maluwano mabaha na maitalo, mtano kukenga, ikiidimika, na wala wasawurwa.
25Yoa, namburra ini.
26Amu ii mundu ekimburra, Yoa, shighati eoho, musifume; Yoa, nyumba ja ndeni eoho, musiitikija.
27Amu sa kimereteko chafuma kifuma‐izuwa, na chawaa mtano kigwa‐izuwa, huwo ineoka mizie ya mwana wa mundu.
28Handu mning’a uoho, hala ndei jinewunganyika.
29Chwi kutera kwa wukiwa wa misi ila zano inegerwa kija, na mweji touneng’ola kiangaji chakwe, na ndondo jinegwa kufuma wanga, na zinya ja wanga jinededemishwa.
30Magheri mala lunewonwa luwano lwa mwana wa mundu wanga; na magheri mala mbare jose ja masanga jineiya, na wenembona mwana wa mundu ekiza wanga ya majumbi ma wanga na zinya na kirumi kibaha.
31Eneingija malaika wakwe na lughunda lwa ighonda ibaha, na wenewunganya wasawurwa wakwe kufuma ngungu nne, na mbai mwe ya wanga mtano ya keri.
32Hena mtini kulosheni mfwanano; mbagha yakwe ikisheghusha, na ikigera mani, mwatisiwa ti irukiruki lasongeria.
33Huwo na unywi, mukiwona ivi vyose, tisiweni ti asongeria, na mbengeni.
34Kididi namburra, irika ili telinevetia, vindu ivi vyose visimeoke.
35Wanga na si jinevetia, kake viteto vyangu tevivetiavyo.
36Kake mburi ya musi ula na magheri mala tehena eitisiwe, nete malaika wa wanga, nete Mwana, nde Apa mwenye.
37Sandu misi ya Nuhu, huwo ineoka mizie ya mwana wa mundu.
38Amu sandu weokie ghati ya misi ila kuwoka kwa mlombia, wekila na wekinywa, wekiaika na wekiowoyia, mtano musi ekinaingie Nuhu na safina,
39Wasitisiwe mtano mlombia uzie ukawawushija wose; na huwo ineoka mizie ya Mwana wa mundu.
40Weri weneoka mtemeni; mwe euhwa, mwe eshighwa.
41Wache weri weneoka wekishagha na kyana, mwe euhwa, mwe eshighwa.
42Amu ii cheweni, amu tomutisiwe musi ani mzuri wenyu eza.
43Kake tisiweni iki, mwenye nyumba kwakicha etisiwe magheri ani mhiwi eza, kwakicha ekichewa, nete tekishigha nyumba yakwe kubawa.
44Amu ii na unywi mukuarehie, amu magheri musimagheshijia Mwana wa mundu eza.
45Niani mzoro mwitikiji na mwenye kucha, mzuri emgera wanga ya wandu wa nyumba yakwe, awainge kidjo magheri mawo?
46Etasiwe mzoro ula, mzuri wakwe ekiza enembona ekiketa huwo.
47Kididi namburra, enemgera wanga ya vindu vyakwe vyose.
48Kake mzoro mbiwi ula ekighamba ngoroni, Mzuri wangu ashesha kuza,
49Ekiwoka kuwabigha waghenje, na kula na kunywa hamwe na waengeji;
50Mzuri wa mzoro ula eneza musi esikamwindia, na magheri esikatisiwe,
51Na enemchwa vihindi, na enemgera ifungu lakwe hamwe na wakeleki: kuneoka kuiya na kutafuna kwa majeghu.
Currently Selected:
Mattayo 24: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
