Mattayo 21
21
1Wekinasongeria Yerusalemi, wakaza na Betania, na nduwi ya Zeituni, Yesu akaingija waanalosha wakwe weri,
2Ekiwawurra, Rongoreni na kaa ila msongorana wenyu, na chwi munewona njoe ichungwa na mwana njoe hamwe naye; chungueni, mureete.
3Na kwakicha mundu ekimburra kiteto, muneghamba, Mzuri niye ewaenda; chwi enewaingija.
4Ikaoka iki, nesa kifike kiteto cha mroti, ekighamba,
5Mburreni mwana wa Sayuni, Yoa mfumwa wako akuzia, mhoo na ekikwea njoe, na kanjoe mwana njoe.
6Waanalosha wakatonga, wakaketa sandu Yesu awaaghanyie.
7Wakawaete njoe na mwana, wakagera suke jawo wanga yawo, akaikaa wanga.
8Weingi wa matorano wakatoranya suke jawo nzieni; wengi wakatema mbagha ja miti, wakajitoranya nzieni.
9Na matorano werongora na weratera wakaloza, wekiteta, Hosanna hena mwana wa Daudi: etasiwe ula eza na izina la Mzuri: Hosanna wanga.
10Na ekinaingie na Yerusalemi, kiongo kyose kikadedemishwa, kikiteta, Niani uu?
11Matorano wakateta, Uu niye mroti, Yesu, wa Nazareti ya Galilaya.
12Akaingia Yesu na hekalu ya Izuwa, akakinya wose wetagha na wezora hekaluni, akaghusha meza ja wekoranya fetha na vichumbi vya wala wetagha mabeta,
13Akawawurra, Itamiwe, Nyumba yangu ineitangwa nyumba ya kuomba: kake unywi mwaiosha mbango ya wasoki.
14Webajike‐meso na wechingilika wakamzia hekaluni; akawahodja.
15Wakohani wabaha na wetama wekinawona maitalo emaarehe, na waana wala weloza hekaluni, wekiteta, Hosanna hena mwana wa Daudi, wakashishirwa;
16Wakamburra, Wasikia awa watetaze? Yesu akawawurra, Ee; tomusoma ti Kufuma itumbu la ngerengere na weamwa waareha luisiso?
17Akawashigha akafuma na shighati ya kiongo mtano na Betania; akatua uko.
18Na heyawo ekihunduka kiongoni akasikia nzaa.
19Na ekiwona mtini mwe nzieni akauzia, asiwone kindu hakwe nde mani tiki, akauwurra, Ndunda isifume hako mtano ndarasi. Chwi mtini ukanyaruka.
20Waanalosha wekiwona wakarighiwa wekiteta, Nize chwi mtini wanyaruka!
21Yesu ekitalwa akawawurra, Kididi namburra, ti mukioka na luitikijo, na musiitalwa, tomuketa iki cha mtini tiki, kake mukiiwurra nduwi ii, Wushijwa uretaghwa na ndiwa, ineketika.
22Na vyose muneenda na kuomba, mukiitikija, muneuhia.
23Na ekinaingie na hekalu wakohani wabaha na waghosi wa wandu wakamzia ekilosha, wekiteta, Hena zinya ani waketa ivi? na niani ekuingie zinya ii?
24Yesu ekitalwa akawawurra, Ninembujanya na mi kiteto kimwe, mkinitalwa, na mi ninemburra hena zinya ani naketa ivi.
25Lubatizo lwa Yohana lwafumahi? Ghati ya wanga kana ghati ya wandu? Wakaghambana wonawo, wekiteta, Tukighamba, ghati ya wanga, enetuwurra, Nikini musamwitikija?
26Tukighamba, ghati ya wandu, twaondoka matorano; amu wose wamgura Yohana sa mroti.
27Wakatalwa wakamburra Yesu, Totumaije. Naye akawawurra, Nete mi simburra hena zinya ani naketa ivi.
28Kake mwawonaze? Mundu eokie na waana weri; akamzia wa kuwoka, akamburra, Mwana, tonga, hira yoo ghati ya mizabibu.
29Ekitalwa akamburra, Sikundiemi: ikuade akachwa muti, akatonga.
30Akamzia wa keri, akamburra huwo. Ekitalwa akamburra, Natonga, mzuri: asitonge.
31Wa awa weri uhi niye earehe sandu wawee akunda? Waghamba, Wa kuwoka. Yesu awawurra, Kididi namburra, ti weuha lushango na wache weshindi wamurongoria unywi kuingia ufumwa wa Izuwa.
32Amu Yohana emzie na nzia ya ngalo, nete tomwitikija: kake weuha lushango na wache weshindi wemwitikija; na unywi mukiwona tomuchwe muti ikuade, nesa mumwitikije.
33Sikijeni mfwanano ungi. Heokie na mundu mwenye nyumba, ehandie mizabibu, akaijungulushia lusarigho, akafora uko iwongo la kufindia, akajenga mnara, akahakua waimi, akazoka.
34Na magheri ma ndunda mekinasongerie akawaingijia waimi wazoro wakwe, wauhie ndunda jakwe:
35Waimi wakauha wazoro wakwe, mwe wakambigha, mwe wakamkoma, mwe wakambiritia mabwe.
36Akaingijawa wazoro wengi weingi kukela wala wa kuwoka: wakawaketa huwo.
37Ikuade akawaingijia mwana wakwe ekiteta, Wenemguria nganyi mwana wangu.
38Waimi wekinambone mwana wakateta wonawo, Uu niye mhodji; haya, tumkome, na tugure uhodjo wakwe.
39Wakamuha wakamtagha shighati ya mizabibu, wakamkoma.
40Eneikaeze mzuri wa mizabibu, enewaketaze waimi wala?
41Wamburra, Enewanyamara viwiwi wawiwi wala, na eneng’ola mizabibu hena waimi weingi, wenemng’olia ndunda hena magheri mawo.
42Yesu awawurra, Tomusomie ghati ya vitamo, Ibwe wajengi welidae, ili liokie ibaha la nganda; iki chafuma ha Mzuri, na cha kuing’asija mesoni hetu.
43Amu ii namburra, ufumwa wa Izuwa unewushijwa henyu, na ineingwa mbare igera ndunda yakwe.
44Ula egwa wanga ya ibwe ili enebaikabaika: naye egwiwa nalo, linemhuahua.
45Wekinasikie wakohani wabaha na Wafarisayo mifwanano yakwe, wakatwarija ti niwo ewatetia.
46Wekinaende kumgura, wakaondoka matorano, amu wembonie kuoka mroti.
Currently Selected:
Mattayo 21: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
