Mattayo 10
10
1Akawaitanga waanalosha wakwe ikumi na weri, akawainga zinya wanga ya maluhungu mawiwi, wamakinye, na wahodje ndwari jose na wufaa wose.
2Na mazina mawo waondo ikumi na weri ni ama; wa kuwoka Simon eitangwa Petro, na Andrea mundwawo; Yakobo wa Zebedayo, na Yohana mundwawo;
3Filipo na Bartolomayo; Tomaso na Mattayo mwuhi lushango; Yakobo wa Alfayo na Thaddayo;
4Simon Mkananaya, na Yuda Iskariota, niye emng’olie.
5Awa ikumi na weri Yesu akawaingija akawaaghanya, ekiteta, Ghati ya nzia ya Mbare musitonge, nete ghati ya kiongo cha Wasamariya musiingie;
6Keba mutonge hena maghonji metekie ma nyumba ya Israeli.
7Na ghati ya nzia tindeni, mukighamba, Ufumwa wa wanga wasongeria.
8Hodjeni wala wewadjua, rusheni wefwie, zerrijeni wenye kusumura, kinyeni maluhungu; mwauhia huwo, ng’oleni huwo.
9Musitike thahabu nete fetha nete shaba ghati ya ngana jenyu;
10Nete kikuchu cha kuzokia, nete kanzu mbiri, nete viratu, nete isibo; amu yambe mhiri awahache yakwe.
11Na kiongo chose kana kaa mwaingiaho, endeni niani eoho aidima, ikaeni uko mtano muneikamufume.
12Na mukiingia nyumbeni, ikezieni.
13Na nyumba ikioka yedi, luworo lwenyu luizie; kake kwakicha si yedi, luworo lwenyu lumugharukie.
14Na mundu esimtigha, nete esivisikija viteto vyenyu, mkifuma na shighati ya nyumba kana kiongo kila mukutekute hae purughushe ioho maghuuni henyu.
15Kididi namburra, ineoka kutikika hena Sodoma na Gomorra musi wa wuchili kukela hena kiongo kila.
16Yeoni, namwingija sa maghonji ghati ya mabau; amu ii muoke wechee sa nyoka, na wazerre sa mabeta.
17Mukuyoe hena wandu; amu wenemung’ola hena sunedrim, na ghati ya masunagogi wenembigha:
18Munetikwa msongorana wa wachili na wafumwa hena lwangu, hena luwonjo‐mburi lwa Mbare.
19Weneikawemung’ole, musikurisha wukiwa viteto ani kana kini muneteta; amu muneingwa saa ila nikini muneteta.
20Amu si unywi mwateta, nde Ngoma ya Waweo wenyu iteta ndeni henyu.
21Mundu enemng’ola mundwawo, na wawee mwana, hena kufwa; na waana wenewawukia wawona wawo, na wenewafwija.
22Na muneoka mkishishirwa ni wandu wose hena lwa izina langu, kake ula egumiria mtano kuidiwika, enekijwa.
23Wekimkinya ghati ya kiongo kimwe, matakuni na cha keri. Amu kididi namburra, tomuneidiwa viongo vya Israeli, mtano eneikaeze Mwana wa mundu.
24Mwanalosha si wanga ya mlosha, nete mzoro wanga ya mzuri wakwe.
25Yamfika mwanalosha kuoka sa mlosha, na mzoro sa mzuri wakwe. Wekioka wemwitanga mwenye nyumba Beelzebul, teweneta kuwaitanga wala wa nyumbeni hakwe?
26Amu ii musiwaituke: amu tehena kindu kifinikirwa, kisijughuke ikuade, nete kiwiswe, kisitisiwike ikuade.
27Kila namburra kijeni, ghambeni kiangajini: na kila mukisikia isikioni, tindeni wanga ya nyumba.
28Na musiituke wala wekoma muri, wasiidime kukoma ngoma; keba mwitukeni ula eidima kukoma na muri na ngoma na jehannum.
29Videghe viri tevitaghwa ni pesa mwe? Na kimwe chawo tekigwa si kisioho na Waweo wenyu.
30Mtano na nyui ja mitwi yenyu jatarika jose.
31Amu ii musiituke, unywi wakela videghe viingi.
32Amu ii ose enenighamba mi msongorana wa wandu, nami ninemghamba msongorana wa Apa wangu eoho wanga.
33Na ose enenikania mi msongorana wa wandu, nami ninemkania msongorana wa Apa wangu eoho wanga.
34Musighambe ti nizie kuingija luworo masangeni, sizie kuingija luworo, nde muhandi.
35Amu nizie kuwasuanya mundu na wawee, na mche na mee, na mkwe na mkwewe;
36Na wazo wa mundu weneoka wala wa nyumba yakwe.
37Emkundie wawee kana mee kukela mi, teimbe mi, na emkundie mwana wa kiume kana wa kiche kukela mi, teimbe mi.
38Naye esiuha msalaba wakwe aniratera mi, teimbe mi.
39Ula euwona moo wakwe eneutesha; na ula eutesha moo wakwe hena lwangu eneuwona.
40Emuhia unywi, eniuhia mi; eniuhia mi, emuhia ula eningije.
41Emuhia mroti hena izina la mroti, eneingwa awahache ya mroti; naye euhia mwenye ngalo hena izina la mwenye ngalo, eneingwa awahache ya mwenye ngalo.
42Na ose enemwinga mwe wa awa wadongo ndemwa ya mbombe ya mbeho tiki hena izina la mwanalosha, kididi namburra, Tenesowaye awahache yakwe.
Currently Selected:
Mattayo 10: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
