Mattayo 9
9
1Akakwea ngalaweni, akakela, akafika kiongo chakwe ye.
2Wakamwetie mwenye kuwia eyejwe wuini. Na Yesu ekiluwona luitikijo lwawo akamburra mwenye kuwia, Ngoro yako idinde, mwana, wawushijiwa ng’oki jako.
3Na yoa, watami wengi wakaghamba ngoroni, Uu ateta owiwi.
4Yesu ekitisiwa makusaro mawo akaghamba, Hena kini mwakusara viwiwi ngoroni henyu?
5Amu nikihi kianguhe? kughamba, Wawushijiwa ng’oki jako? kana ndekughamba, Imuka, uresela?
6Kake nesa mutisiwe ti Mwana wa mundu niye mwenye zinya masangeni kuwushija kutekwa (amburra mwenye kuwia), Imuka, uwushije wui wako, utonge nyumbeni hako.
7Akaimuka akatonga nyumbeni hakwe.
8Matorano wekiwona wakaituka, wakamwisisa Izuwa ewaingie wandu zinya sa iji.
9Na ekinafume kula Yesu, akawona mundu eikee handu ha kushangiwa, eitangwa Mattayo: Akamburra, Niratera. Akawuka, akamratera.
10Ikaoka ekinaikae nyumbeni, yoa, wauhi lushango weingi na wenye ng’oki wakaikaa hamwe na Yesu na waanalosha wakwe.
11Wafarisayo wekiwona wakawawurra waanalosha wakwe, Hena kini mlosha wenyu ela na wauhi lushango na wenye ng’oki?
12Ekisikia akaghamba, Wenye zinya teweenda mughanga, nde wala wewadjua.
13Tongeni murekulosha nikini iki, Nakunda lusario, nete si itasi: amu siziemi kuitanga wenye ngalo, nde wenye ng’oki.
14Magheri mala wemzia waanalosha wa Yohana, wekighamba, Hena kini uswi na Wafarisayo twachunga keingi, kake waanalosha wako tewechungawo?
15Yesu akamburra, Waana wa ngasu waidima kuchunga, magheri mwenye ngasu eoho hamwe nawo? misi ineza mwenye ngasu eneikaewushijwe hawo, niho weneikawechunge.
16Tehena mundu egera kidame cha suke sha wanga ya suke isakae, amu ila ya kuarehia yauha ya suke, na yaneta kubajika.
17Nete tewegera mawa masha ghati ya vikuchu visakae: kwakicha si huwo, vikuchu vyabajika, na mawa maitika, vikuchu vikanyamarika: kake wagera mawa masha ghati ya vikuchu visha, na vyose viri vyakia.
18Ekinaoke ekiwawurra vindu ivi, mchili mwe aza akamwinamia, ekiteta, Mwana wangu wa kiche ingeriaha afwa, kake uze uremgera mkono wako, enehoa.
19Akawuka Yesu akamratera, na waanalosha wakwe.
20Na yoa, mche eokie na kufumwa ni sakame miaka ikumi na miri, ezie nyuma, akamkuwara lutiriwo lwa suke yakwe.
21Amu etetie ngoroni, Kwakicha nakuwara tiki suke yakwe, ninekia.
22Yesu ekigharuka na ekimbona akaghamba, Ngoro yako idinde, mwana wa kiche, luitikijo lwako lwakukija. Mche akakia too saa ila.
23Ekinafike Yesu nyumbeni ha njama, akawona wabighi mtorito, na matorano meiya,
24Akaghamba, Wukeni, amu mbora tefwaye; ateshinjia. Wakamsola muno.
25Matorano mekinang’olwe akaingia akamgura mkono, mbora akawuka.
26Na mburi ii ikarumishwa ghati ya isanga lila lose.
27Ekinavetie Yesu kufuma uko webajike‐meso weri wakamratera wekiiya na wekiteta, Utusarie, mwana wa Daudi.
28Ekinaingie nyumbeni webajike‐meso wakamzia; na Yesu awawurra, Mwaitikija ti naidima kuketa iki? Wamburra, Ee, Mzuri.
29Akawakuwara meso ekighamba, Hena luitikijo lwenyu muwone.
30Meso mawo makajughuka. Yesu akawaaghanya muno, ekiteta, Yoeni, mundu asikitisiwe.
31Kake wekifuma wakatoranya mburi yakwe ghati ya isanga lila lose.
32Na wekinafume, yoa, wakamwetie bubu mwenye luhungu.
33Na luhungu lukinakinywa, bubu ula akateta. Matorano wakarighiwa, wekiteta, Teiwonwa pia huwo ghati ya Israeli.
34Wafarisayo wakaghamba, Hena njama wa maluhungu emakinya maluhungu.
35Akajunguluka Yesu ghati ya viongo vyose na kaa, ekilosha ghati ya masunagogi, na ekitinda sumu yedi ya ufumwa, na ekihodja ndwari jose na wufaa wose.
36Ekinawone matorano akawasaria, amu weokie werishwa wukiwa na weghawanyika, sa magonji mesina mrisha.
37Akawawurra waanalosha wakwe, Mafindiko nimo mabaha, wahira ndima niwo wafaa:
38Amu ii mwombeni mzuri wa mafindiko, ti aingije wahira ndima ghati ya mafindiko makwe.
Currently Selected:
Mattayo 9: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
