Mattayo 11
11
1Ikaoka ekinaidiwe Yesu kuwaagbanya waanalosha wakwe ikumi na weri, efumie uko akatonga kulosha na kutinda ghati ya viongo vyawo.
2Ekinasikie Yohana kichungoni ndima ya Masihi, akaingija waanalosha wakwe,
3Akamburra, Niwe ula eza, kana tumyoyie ungi?
4Yesu akatalwa akawawurra, Tongeni mumlie Yohana mburi ya vindu muvisikia na muviwona;
5Webajike‐meso wawona, wechingilika wasela; wesumura wazerrika, waming’ani wasikia; wefwie warushwa, wakiwa watindiwa sumu yedi:
6Na etasiwa ula esishishirwa nami.
7Nawo wekitonga, Yesu akawoka kuwawurra matorano mburi yakwe Yohana, Nikini mufumie shighati kuyoa? ighughu likidedemishwa na ngungu?
8Kake nikini mufumie kuyoa; Mundu edokiwe bafta. Yoa wala wedoka bafta weoho nyumbeni ha wafumwa.
9Kake nikini mufumie? kuyoa mroti? Ee, namburra, na wa kukela mroti.
10Uu niye etamiwe, Yoa, namtuma mwondo wangu msongorana wako, enearehia nzia yako msongorana wako.
11Kididi namburra, Ghati ya wawonwa ni wache temewuka mundu mbaha kukela Yohana Mbatizaji: kake mdongo ghati ya ufumwa wa wanga ni mbaha kukela ye.
12Too misi ya Yohana Mbatizaji mtano yoo ufumwa wa wanga waketwa ni zinya, na wandu wa zinya waugura.
13Amu waroti wose na wuchili warota mtano Yohana.
14Na mukikunda kukiuhia, uu niye Eliya, ula eneikaeze.
15Mwenye masikio ma kusikia, asikie.
16Na kini ninefwanyanya irika ili? Lafwanana na waana weikaa vichindeni, wekiwaiyia waghenje,
17Wekiteta, Twamubighia mitorito, musitoroka; twaiya, musishiniwa.
18Amu Yohana ezie esile nete esinywe, na waghamba, Ena luhungu.
19Mwana wa mundu ezie ekila na ekinywa, na waghamba, Yoa, mundu ekunda kula na mwengea, mbuyaa wa wauhi lushango na wenye ng’oki! Na kucha kwaisiswa nezo hena ndima yakwe.
20Akawoka magheri mala kuvibohia viongo, viarehikaho mihiro yakwe mibaha, amu tevichwa‐muti.
21Wukiwa hako, Korazin! Wukiwa hako, Betsaida! Amu kwakicha ghati ya Turo na Sidon iarehike mihiro mibaha ila, iarehike henyu, kwakicha wekichwa‐muti kae ghati ya sako na maivu.
22Kake namburra, hena Turo na Sidon ineoka kutikika musi wa kuchiliwa kukela henyu.
23Nawe Kapernaum, unekwejwa mtano wanga? Unesea mtano ahera: amu kwakicha mihiro mibaha ila iarehika hako iarehike ghati ya Sodoma, kwakicha ikiikaa mtano yoo.
24Kake namburra, hena Sodoma ineoka kutikika musi wa kuchiliwa kukela hako.
25Magheri mala akatalwa Yesu akaghamba, Nakuinga haika, Apa, Mzuri wa wanga na wa masanga, amu wawawisia wenye kucha na wechee vindu ivi, ukawajughuiya waana.
26Ee, Mzuri, amu nihuwo iokie kuiseja msongorana wako.
27Vyose nang’oliwa ni Apa wangu: nete tehena mundu emtisiwe Mwana, nde Apa; nete temtisiwe mundu Apa, nde Mwana, naye ose Mwana akunda kumjughuiya.
28Izoni hangu, unywi wose wenye ndima nyingi na mubundika, nami ninemusowosha.
29Kugereni kighogho changu, murekulosha hangu, amu mi ni mhoo na wa kinyenya ngoroni, na munekuwonia lusowoko ngoroni henyu.
30Amu kighogho changu kinyoiye, na mwagho wangu uanguhe.
Currently Selected:
Mattayo 11: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
